Otum 23 - Ohwihwim Olehe

¹ Oblus a ka moa la a sõ ombgu nga a lu mi le, Agimi anáŋ! Eso me e wo zhezheŋ odzudzu me egi ayi Ahogbrẽ ma-me e bli olum anye he.

² Anyuŋ-andakʼpo olu ba Ahogbrẽ moa a bzi ŋa Ahananiya, a da moa la a tspi osusku ta Oblus a yla ŋa anyu.

³ Oblus a nyuŋ ŋa a lu mi le, Ahogbrẽ á yla ŋo, aŋo la o wo areabi. Aŋo o dzu ahe o la o sõ me ombgu eka ba odaŋ o lu ambo aŋo o kpaŋ lo mbo, okyku boŋ o da mo a yla me!

⁴ Moare la a wo osusku ta la Oblus a nyuŋ ŋa a lu mi le, Aŋo o dzĩ anyuŋ-andakʼpo olu ba Ahogbrẽ!

⁵ Oblus a tno mo ma a lu mi le, Agimi anáŋ, ame e yi baŋ a wo anyuŋ-andakʼpo olu ba Ahogbrẽ mbo. Akpa Ahogbrẽ a lu mi le, Arekyeŋ a lu odlobi eshri are la a ri ekʼpo pa la moare bimi mbo.

⁶ Omba ba Oblus a yi ba moakyeŋ eshki lo a wo moaEsaduki, nga moakyeŋ a wo moaEfarisi, a nyuŋ moa la a sõ ombgu a lu mi le, Agimi anáŋ! Ame e wo a ba Efarisi anwye moaEfarisi. Moa a sõ me ombgu hi okyku ba ame e bmi ba adlidzi moa la a kpu á ba a sa á kso!

⁷ Ambla baŋ a lu eka he a khwo nga, moaEfarisi pa la moaEsaduki moa a klo ambgu nga eshki e gʼba eŋa.

⁸ MoaEsaduki a la a lu mi ma oksongybi o wo ma mbo, nga moa a la a lu mi ma moanwyeadga ba Ahogbrẽ ta la egbga e wo ma mbo. Ambo moaEfarisi a bmi ba ayakplo atra he lo a wo ma.

⁹ Okyku eka he nga moa a kla ayakplo. Moare la a nye odaŋ moa a wo a ba eshki moaEfarisi, moa a kso a lu odlo osheshye a lu mi le, Agi e hwiŋ akpukyeŋ ta la alom he lo mbo! O dzu mbo ogbga-kyeŋ o mbo le anwyeadga ba Ahogbrẽ angyiŋ a lu odlo ka la ŋa.

¹⁰ Okla ayakplo he lo o ta ma-ma nga, anyuŋ-andakʼpo moanwyeakyuŋ a kpo eyli ma o dzu mbo, moa á bga Oblus. Okyku eka he a da moanwyeakyuŋ baŋ a gre eshki nga moa a vu Oblus a ba a shri a gre apu moanwyeakyuŋ.

¹¹ Okyukyku onda he lo nga, Adigi-odne a tspi egi ayi Oblus a nyuŋ ŋa a lu mi le, Aŋo Oblus o ghwo eso! Aŋo o sheŋ o zgi egŋe me Orushalima bgu, nga aŋo ó kpo ekaka-helo Oroma.

Moa a fu eshri okyku o bga Oblus

¹² Endigiŋ onda oha nga, moaEyahuda a shki otsotse nga moa a hwim a lu mi ma moa á ri nga á wa mbo, o wo le moa a bga Oblus ayga dne.

¹³ Moare la a hwim eka he lo, a gre moarehwi ekʼpoenyi.

¹⁴ Ambla he nga moa a gre okro moandakʼpo olu ba Ahogbrẽ pa la moandakʼpo, nga moa a lu mi le, Agi e sheŋ e hwim osheshye ba agi é ba e ri emakyeŋ mbo o wo le agi e bga Oblus ayga dne.

¹⁵ Okyku eka he, agi e klo bimi pa la moa la a sõ ombgu, e hom otum okro anyuŋ-andakʼpo moanwyeakyuŋ ba Oroma, okyku o daŋ a da Oblus a ba. Agimi e lu eka bimi e klo e mbli odlo lo e ka adzadzi. Ambo agi é hwim okyku o bga ŋa omba baŋ á ba.

¹⁶ Ambo anwye anáŋ-alashle ba Oblus a gno oshpa ekplo moa a hwim. Okyku eka he anwyealom he lo a gre a yi a lu a da Oblus apu moanwyeakyuŋ.

¹⁷ Ambla he nga Oblus a bzi akyeŋ eshki moandakʼpo moanwyeakyuŋ nga a nyuŋ ŋa a lu mi le, O ta anwye he e yi okro anyuŋ-andakʼpo, anwye he lo a klo o lu ekplokyeŋ o daŋ.

¹⁸ Andakʼpo lo ta la anwye a gre okro anyuŋ-andakʼpo nga a nyuŋ ŋa a lu mi le, Oblus are moa a vu hi angyiŋ a da me e shri anwye he lo e shri e ba. A wo ekplokyeŋ ba olu-lu okyku o lu o doŋ.

¹⁹ Anyuŋ-andakʼpo a vu anwye lo obgo nga a dzi otsotse ka la ŋ a nga a zhĩ ŋa a lu mi le, Aŋo o wo eshi ma okyku o lu o da me?

²⁰ Anwye lo a tno ma a lu mi le, MoaEyahuda a hwim moa á ba a doŋ o da Oblus a yi akuombgu okyku o da mo a mbli odlo baŋ a ka adzadzi.

²¹ Aŋo o bmi ta la ekplokyeŋ moa á ba a lu mbo, okyku eshi moare la a gre ekʼpoenyi, moa á ba a ghre nga á dzu á bli ŋa okyku o bga ŋa. Moa a hwim osheshye a lu mi ma moa á ri mbo nga á wa mbo, o wo le moa a bga ŋa ayga dne. Moa a nyuŋ a kpo mvye. Moa a dzu a gno ekployaŋ a mbo boŋ ó ba o lu sha a mo.

²² Anyuŋ-andakʼpo a nyuŋ anwye lo a lu mi le, O lu o da arekyeŋ boŋ o ba o lu odlo he o ygi me mbo. A lu eka he a khwo nga a da anwye a gre eŋa.

Oblus egi ayi ogomna Efliki

²³ Anyuŋ-andakʼpo moanwyeakyuŋ a bzi moandakʼpo moanwyeakyuŋ aha a nyuŋ mo a lu mi le, Agimi e sla moanwyeakyuŋ endgaeha okyku moa á ba a yi Esizariya, ta la ényma ekʼpoefoha, pa la moa la a ta etazhi endgaeha. Agimi e nyuŋ e kpo bimi é ba e kso amgbaŋ atronyi okyukyku hi.

²⁴ E nyuŋ enyma e kpo okyku ba Oblus á ba a vre. Nga e shri ŋa e yi okro ogomna Efliki opyapyaŋ.

²⁵ Ambla he anyuŋ-andakʼpo lo a ta akpa a lu mi le,

²⁶ Akpa he a zgi okro me Ekladiyu Elisiya, a ba okro boŋ arehwĩ ba anyuanyuŋ ogomna Efliki. Ame e shko ŋo.

²⁷ MoaEyahuda a vu alom he lo nga moa á ba a bga ŋa. Moa a lu a da me ma aŋa a wo arehwĩ ba Oroma angyiŋ, okyku eka he ame e gre pa la moanwyeakyuŋ me nga e yi e shla eso baŋ.

²⁸ Ame e mbi e klo e yi e ka ekplo la e kpo nga moa a vu Oblus, okyku eka he ame e shri ŋa e gre akuombgu mo.

²⁹ Ame e ka tki, aŋa a kpo ekplokyeŋ moa a sõ ŋa ombgu eku, o mbo le a shri ŋa a ta aku mbo. Ombgu moa a shri a bʼbu ŋa o wo eshri odaŋ moaEyahuda lo angyiŋ.

³⁰ Ambla moa a lu a da me ma moaEyahuda a hwim ba o bga ŋa nga, ame e ka lo o raŋ o gre ba ame e daŋ a ba okro boŋ. Ame e nyuŋ mo la a vu ŋa la ombgu ma moa a shri odlo lo a shri a yi okro boŋ.

³¹ Moanwyeakyuŋ a kpo eka ba moa a lu a da mo. Moa a shri Oblus okyukyku he lo a shri a ba Antibatri.

³² Onda oha nga, moanwyeakyuŋ la a dzi moa la a ta etazhi lo, a sa a bla a ba apu mo nga moa a da moa la a shri ényma a zgi Antibatri a gre Esizariya ta la Oblus otsotse.

³³ Moa a shri Oblus a gbu Esizariya nga, moa a shri akpa lo a shri a da ogomna, nga moa a shri Oblus a daŋ.

³⁴ Ogomna a tsi akpa lo a khwo nga, a zhĩ Oblus obiŋ baŋ a wo a ba alo. Omba ba ogomna a yi ba Oblus a wo a ba Esilisiya,

³⁵ a nyuŋ ŋa a lu mi le, Ame é gno odlo boŋ omba ba moa la a wo ombgu ka la ŋo lo a ba. A da mo a shri Oblus a zga odne Ehirudu.