Otum 22 - Ohwihwim Olehe

¹ Agimi arealom pa la moanáŋ, pa la moadigi, agimi e ngli e gno odlo ba ame e lu e da gimi!

² Omba ba moa a gno baŋ a lu olom ba Eyahuda nga moa a ngli atuŋ a gno, nga Oblus a lu odlo.

³ A lu odlo a lu mi le, Ame e wo a ba Eyahuda angyiŋ. Moa a mbre me osku ba Atarsu ba Esilisiya. Ame e tsi engla Orushalima abgo ba Egamaliya. Moa a nye me edgu odaŋ moadigi a fu ma, nga ame a mbo e shri eshri me e da Ahogbrẽ eka bimikyeŋ la e wo ahe anye he.

⁴ Ame e kpo moa la a sõ ozhẽ he lo ewu nga e bga mo. Ame e vu moarealom pa la moashe nga e shri mo e ygi aku.

⁵ Anyuŋ-andakʼpo olu ba Ahogbrẽ pa la moa la a sõ ombgu mvye, moa a yi ba ame e lu adlidzi angyiŋ. Ame e yga akpekpa ba moa a ta a kom moanáŋ ba Eyahuda la a wo Adamasku. Okyku eka he ame e gre a mi lo okyku o vu moa la a lu ozhẽ he lo nga e ta mo aslika nga e shri mo e ba Orushalima okyku o da mo a kpo mo ewu.

Oblus a lu odlo eka baŋ a zhiŋ

⁶ Omba ba ame e gbu osusku ta la Adamasku nga, omba he lo olum o vu eshri. Ayimom la a shka ayi a gre eshri a gnyu a zgi ongyeŋ a ba a tra egi ayi me.

⁷ Ame e tsi e gbu obiŋ nga ame e gno enzi e la e lu mi le, Eshawlu, Eshawlu! Okyku eshi aŋo o la o kpo me ewu?

⁸ Ame e zhĩ, Aŋo o wo ayi angyiŋ Adigi? Enzi lo e tno ma e lu mi le, Ame angyiŋ e wo Eyesu ba Anazarata boŋ o la o kpo me ewu.

⁹ Moare la a wo pa la me a ka ayimom lo ambo moa a gno enzi are la a lu odlo pa la me mbo.

¹⁰ Ame e zhĩ e lu mi le, Adigi, ame e kpo eshi? Adigi-odne a tno ma a lu mi le, Aŋo o kso nga o yi Adamasku eshyẽ, nga moa á lu ekployaŋ a mbo ba Ahogbrẽ a klo boŋ o kpo á da ŋo.

¹¹ Ame e vga ayi okyku ayimom lo. Okyku eka he moa la a dzi pa la me moa a shri me opi a shri a gre Adamasku eshyẽ.

¹² Alomakyeŋ a wo ma eshko baŋ e ri Ahananiya. A wo are la a lu Ahogbrẽ ma adzadzi, nga a la a kpaŋ odaŋ Ahogbrẽ. MoaEyahuda pyeŋ la a wo Adamasku a la a ka ŋa la olbi.

¹³ A ba okro me nga a nyuŋ me a lu mi le, Anime Oblus, ayi boŋ a hwile okyku o doŋ o ka okro! Ebuebu ayi me a hwile nga ame e ka ŋa.

¹⁴ A nyuŋ me a lu mi le, Ahogbrẽ moadigi angyiŋ a sla ŋo okyku o doŋ o ka eso baŋ o bmye, nga okyku o doŋ o ka Anwye baŋ la a wo odlodzi, nga okyku o doŋ o gno enzi baŋ.

¹⁵ Okyku eshi aŋo ó zgi egŋe okyku ŋa egi ayi moarehwi pyeŋ, eka ekplo boŋ o ka nga o gno.

¹⁶ Ohuhuhi, okyku eshi aŋo o la o tpi omba ayi? O kso angyeŋ nga o da mo a kpo ŋo abaptisma, nga okyku o da mo a kyu ŋo abgo odlobi boŋ eshko ba Eyesu.

Moa a bzi Oblus okyku onyumoshpa egi ayi moa la a wo moaEyahuda mbo

¹⁷ Ame e bla e gre Orushalima. Omba ame e fa olu Anyuŋ-akulu nga, ame e ka otsotsa.

¹⁸ Otsotsa he lo ame e ka Adigi-odne a nyuŋ me a lu mi le, O kpo shoshoŋ o kso osku ba Orushalima okyku eshi moare a bmi a yga oshpa boŋ ó ba o nyum eshri me ahe mbo.

¹⁹ Ame e tno ma e lu mi le, Adigi-odne, moa a yi zhezheŋ ba ame e la e gre anwyeakulu e yi e la e vu moare la a bmi ba adlidzi ka la ŋo, nga e la e taŋ mo andzu.

²⁰ Omba ba moa a bga Estifanu la a zgi egŋe boŋ, ame e wo ma, nga ame e bmi ta la ekplo moa a kpo. Ame angyiŋ e la e kʼpu aknye moa la a bga ŋa.

²¹ Adigi-odne a nyuŋ me a lu mi le, Aŋo o yi, okyku eshi ame e hom ŋo otum ogyugyuŋ okro moa la a wo moaEyahuda mbo.

²² Moare a la a ngli atuŋ a gno odlo Oblus ma-me o tsa baŋ a lu odlo he lo a khwo. Ambla he nga moa a lu odlo angyangyeŋ a lu mi le, E da mo a ngʼba edgu are he a sku obiŋ hi! E bga ŋa! A tse ma ba o dzu ma mbo.

²³ Moa a ta akhi nga moa a shri aknye mo a la a ta a gre ongyeŋ nga moa a fa ombo a vom ekro.

²⁴ Anyuŋ-andakʼpo moa-nwyeakyuŋ ba Oroma a da mo a shri Oblus a gre apu moa-nwyeakyuŋ nga a da mo ekʼpo ma moa a bga Oblus andzu, okyku o daŋ a lu ekplo e la e da moaEyahuda a la a ta akhi eka he eshri baŋ.

²⁵ Ambla moa a bʼbu ŋa endzi a khwo nga, moa á ba a yla ŋa nga, Oblus a nyuŋ andakʼpo la a tspi okro lo a lu mi le, O boŋ o ka, alo o wo shasha angyiŋ moa a bga arehwĩ ba Oroma andzu eka he? Moa a ka a sõ ŋa ombgu a mbo mbo nga moa a hwiŋ ŋa la akpu mbo.

²⁶ Ambla ba andakʼpo he lo a gno eka he nga a gre okro anyuŋ-andakʼpo nga a zhĩ ŋa a lu mi le, Aŋo o kpo eshi eka he? Alom he lo a wo a ba Oroma angyiŋ!

²⁷ Okyku eka he anyuŋ-andakʼpo a gre okro Oblus nga a zhĩ ŋa a lu mi le, O lu o da me, aŋo o wo a ba Oroma angyiŋ? Oblus a bmi.

²⁸ Anyuŋ-andakʼpo a nyuŋ ŋa a lu mi le, Ame e hre amgbaŋ nzenze ayga e dzu a ba Oroma. Oblus a tno ŋa ma a lu mi le, Moa a mbre me a ba Oroma angyiŋ.

²⁹ Ebuebu nga moa la a gre okyku o zhĩ Oblus ayakplo, moa a sa a se okũ. Eyli e kpo anyuŋ-andakʼpo omba baŋ a yi ba Oblus a wo a ba Oroma, okyku eshi a da mo a ta ŋa aslika.

Oblus a gre akuombgu

³⁰ Anyuŋ-andakʼpo moanwyeakyuŋ a klo a ka eshyẽ ekplo la e da moaEyahuda a la a kpo Oblus ewu okyku lo. Okyku eka he a da mo a ngla aslika lo a sku Oblus, nga a da mo a bzi moandakʼpo olu ba Ahogbrẽ pa la moandakʼpo ba akuombgu, okyku o da mo a shki eshki. Anyuŋ-andakʼpo moanwyeakyuŋ a da Oblus a kso a tspi egi ayi mo.