Otum 21 - Ohwihwim Olehe

Oblus a gre Orushalima

¹ Agi e shri oyiamo e shri e da mo nga e gre egi. Ambla ba agi e bmyi ongre amgblami e khwo nga agi e ba Okos. Onda oha agi e gre Orodi, agi e zgi ahe lo e gre Obatara.

² Ahe lo agi e hwiŋ amgblami la a yi Efonisha. Agi e gre ma nga e gre.

³ Agi e gbu osusku ta la Esapru, agi e sõ egi ero ba obiŋ lo, nga e bre e gre Esiriya. Agi e tspi akaŋ Ataya. Moa a se anzho a sku amgblami ahe lo.

⁴ Agi e hwiŋ moa la a bmi ba adlidzi ahe lo. Agi e dzu pa la mo okyku asati akyeŋ. Ekʼpo Ogbgaodzi o tsa mo o da mo a nyuŋ Oblus ma a yi Orushalima mbo.

⁵ Ambla bi e dzu dum ma ple nga agi e gre egi. Moa a mvye pa la moashe mo, pa la moanwye mo, moa a dzi gi a ta ozhẽ a sku osku lo. Agi mvye e kʼpu obiŋ akaŋ anyuŋ-ondzu lo nga e fa olu.

⁶ Ambla he nga agi e shri oyiamo e da egi, nga agi e gre egi amgblami, nga moa a gre odne.

⁷ Agi e gre amgblami e zgi Ataya e gre Obotalami. Ahe lo agi e kpo moanáŋ eshko nga e dzu e vbu ahe lo, olum okyeŋ.

⁸ Agi e kso ahe lo nga onda oha agi e gbu Esizariya. Agi e gre odne ba alom la a nyum oshpa, moa a bzi ŋa Efilibu. Agi e tum odne baŋ angyiŋ. Aŋa a wo eshki moarehwi afoha moa a sla Orushalima.

⁹ Aŋa a wo la moanwyeshe anyi la a kyu eble mbo. Moa a la a nyum oshpa ba Ahogbrẽ.

¹⁰ Agi e dzu ahe lo okyku elum ple. Alomakyeŋ moa bzi ŋa Agabu a zgi Eyahuda a ba okro bi Esizariya. A wo arehwĩ ba Ahogbrẽ a hom otum angyiŋ.

¹¹ A ba okro bi nga a ngla ashye akpa ba Oblus a bʼbu adga baŋ ta la abgo baŋ nga a lu mi le, Ogbgaodzi o lu mi ma are ashye akpa hi, ma moaEyahuda Orushalima á vu ŋa á bʼbu eka he nga moa á shri ŋa á da moa la a wo moaEyahuda mbo.

¹² Ambla bi e gno eka he nga, agi pa la moare la a wo okro lo e vẽ ŋa okyku o daŋ a yi Orushalima mbo.

¹³ Ambo a tno ma a zhĩ gi a lu mi le, Agimi e kpo eshi eka he? Agimi e wo okũ nga e kpla me eso e gbu okyku eshi? Ame e bmi okyku o da mo a bʼbu me endzi sha Orushalima mbo, ambo ame e bmi okyku o kpu okyku Adigi-odne Eyesu.

¹⁴ Agi e kpo e gbu bi e nyom ŋa mbo. Okyku eka he agi e kyu ŋa abgo nga e nyuŋ ŋa e lu mi le, O kpo ekplo ba Ahogbrẽ a tsa ŋo.

¹⁵ Agi e ta abyi ahe lo ple e khwo nga, agi e vu anzho bi abgo nga agi e gre Orushalima.

¹⁶ Moanwyeotumakyeŋ a zgi Esizariya a gre Orushalima ka la gi. Moa a shri gi a gre odne alom ba agi e yi e tum odne baŋ. Eshko alom lo e ri Emanasoŋ. Aŋa a wo a ba Esapru. Aŋa a bmi ba adlidzi ogbyigbyi a mo.

Oblus a gre a yi a ka Eyakubu

¹⁷ Omba bi e gbu Orushalima, moanáŋ a shri obamo a shri a da gi adzadzi.

¹⁸ Onda oha nga Oblus a gre ka la gi okyku o ka Eyakubu pa la moandakʼpo ba Eklisiya la a wo ma.

¹⁹ Oblus a shko mo a khwo nga, a tsi oshpa ba ekployaŋ a mbo ba Ahogbrẽ a kpo okro otum baŋ egi ayi moa la a wo moaEyahuda mbo.

²⁰ Ambla moa a gno oshpa he lo a khwo nga, moa a hlu Ahogbrẽ eshko. Nga moa a nyuŋ Oblus a lu mi le, Anáŋ o ka eka ba ayakplo a wo. MoaEyahuda nzenze la a bmi ba adlidzi a wo ma, moa a la a kpaŋ odaŋ ba Omusa lo adzadzi.

²¹ Moa a gno oshpa eka bimi e la e nye moaEyahuda la a wo obiŋ moa la a wo moaEyahuda mbo, ma moa a kpaŋ odaŋ ba Omusa nga mbo. Nga ma aŋo o la o nye mo o la o lu mi ma moa a sheŋ moanwye mo ongyum nga mbo, nga ma moa a la a kpaŋ odzudzu moaEyahuda nga mbo.

²² O wo efu oha mbo, moa a gno boŋ o gbu bgu. Agi é kpo eshi ohuhuhi?

²³ O raŋ o gre boŋ o kpo ekplo bi e lu e da ŋo. Moarehwi anyi a wo ahe. Moa a hwim emakyeŋ.

²⁴ Aŋo o tslo moare he lo o yi o kpo abgo ba o nglo eshrlu pa la mo. O shri ekployaŋ a mbo o di okyku abgo he lo. Okyku o da mo a kpo a gbu a hwre eshri mo. O wo boŋ o kpo eka he le, areyaŋ a mbo á yi ba odlo moa a la a lu eshri boŋ o wo adlidzi mbo. Okyku eshi ohe lo o tsa boŋ a mbo o la o kpo ekployaŋ a mbo eka ba odaŋ Omusa o lu.

²⁵ Ambo moa la a wo moaEyahuda mbo la a bmi ba adlidzi, agi e ta akpa e kom mo e lu mi ma moa a ri algo ololo mbo, nga a wa amanzhli mbo, nga a taŋ ebyi moa a kplu lo oto mbo mbo, nga moa a kpo ayakplo eshre mbo.

²⁶ Ambla he nga, onda oha Oblus a tslo mo a da mo a kpo abgo ba o nglo eshrlu otsotse. A gre Anyuŋ-akulu a yi a tsi elum la e ra moa a ba a kpo abgo ba o nglo eshrlu a da mo, nga a sa a lu omba baŋ á ba a shri ofaodi ba areyaŋ a mbo á shri á di.

Moa a vu Oblus Anyuŋ-akulu

²⁷ Omba ba elum efoha e wo osusku obibli a mo nga, moa-Eyahudakyeŋ ba obiŋ ba Asiya, moa a ka Oblus Anyuŋ-akulu. Moa a shri ambgu a ba eshki nga moa a vu Oblus.

²⁸ MoaEyahuda la a zgi Asiya a ba a nyuŋ eshki a lu mi le, Agimi arehwĩ ba Esrayila, e kpo e ghwo! E ka, alom hi angyiŋ a la a yi ekro andandandim a la a nye moare a da mo a dzi moarehwi ba Esrayila ta la odaŋ ba Omusa, ta la Anyuŋ-akulu hi. E ka, ohuhuhi, aŋa a shri moa la a wo moaEyahuda mbo a ba Anyuŋ-akulu eshyẽ. A tpi okro ba esesla ayi.

²⁹ Moa a lu eka he okyku eshi moa a ka Otrofimu alomakyeŋ la a zgi Afisu a ba ta la Oblus otsotse Orushalima. Moa a la a ka ma o dzu mbo, ma Oblus a shri alom lo a gre Anyuŋ-akulu eshyẽ.

³⁰ Moa a som osku lo mvye ayi. Moare mvye a knye otsotse a gre a yi a vu Oblus nga moa a kom ŋa a dra a sku Anyuŋ-akulu lo. Ambla he nga moa a shki ayizhẽ ba Anyuŋ-akulu.

³¹ Moare a klo o bga Oblus ambo oshpa o gro o gbu atuŋ anyuŋ-andakʼpo ba eshki moanwyeakyuŋ ba Oroma, ba moare mvye ba osku ba Orushalima a kpo ambgu.

³² Anyuŋ-andakʼpo lo a gno eka he a khwo nga, a da moandakʼpo pa la moanwyeakyuŋ a knye a gre eshki lo. Omba moare a ka ŋa pa la moanwyeakyuŋ nga, moa a kyu o bga Oblus andzu.

³³ Anyuŋ-andakʼpo a gre keŋ nga a vu Oblus, nga a da mo a bʼbu ŋa la aslika aha. Ambla he nga a zhĩ a lu mi le, Alom he lo a wo ayi angyiŋ? Aŋa a kpo eshi?

³⁴ Moare a la a lu odlo wayawaya ototno. Odlo moa a lu o so anyuŋ-andakʼpo ayi, nga a ka eka ekplo la e kpo a bmye mbo. Okyku eka he a da moanwyeakyuŋ a sko Oblus a gre a yi a zga apu moanwyeakyuŋ.

³⁵ Moa a dzi ka la ŋa a gre ámbgu lo, moanwyeakyuŋ a sko ŋa a shri okyku eshi eshki lo e la e kpo ambgu.

³⁶ Moa mvye a la a lu angyangyeŋ, a lu mi le, E bga na!

Oblus a tspi okyku eshri baŋ

³⁷ Omba moa a klo o sko Oblus o shri o yi apu moanwyeakyuŋ nga, Oblus a zhĩ anyuŋ-andakʼpo a lu mi le, Aŋo o bmi ba ame e lu ekplokyeŋ ka la ŋo ma? Anyuŋ-andakʼpo lo a zhĩ Oblus a lu mi le, Aŋo o gno Egrise?

³⁸ Anyuŋ-andakʼpo a sa a zhĩ ŋa a lu mi le, O wo eka he le, aŋo angyiŋ o wo alo-makyeŋ ba Amasla mbo, la a klo o shri eyi ebi o fu eso moarehwi ezbienyi la a kpo ogʼga, a shri mo a gre akla?

³⁹ Oblus a tno ŋa ma a lu mi le, Ame e wo a ba Eyahuda angyiŋ. Moa a mbre me osku ba Atarsu obiŋ ba Esilisiya. Ame e wo are-hwĩ ba osku la o wo anyuanyuŋ angyiŋ. O wo boŋ o bmi le, o da me e lu odlo pa la moare he lo.

⁴⁰ Anyuŋ-andakʼpo lo a bmi, okyku eka he Oblus a vre ambgu nga a ta moare abgo. Omba ba moare a dzu tki nga, a lu odlo la olom moaEyahuda.