Otum 19 - Ohwihwim Olehe

Oblus a wo Afisu

¹ Omba ba Apolos a wo Okorinti, Oblus a zhiŋ a sõ edzidzi obiŋ ba Asiya nga a ba Afisu. Aŋa a hwiŋ moa la a bmi ba adlidzi ahe lo.

² A zhĩ mo a lu mi le, Agimi e hwiŋ Ogbgaodzi omba bimi e bmi ba adlidzi? Moa a tno ma a lu mi le, Agi e gno ondakyeŋ ku-ku ba Ogbgaodzi o wo ma mbo.

³ Oblus a sa a zhĩ mo a lu mi le, Edgu abaptismayaŋ agimi e hwiŋ? Moa a tno ma a lu mi le, Agi e hwiŋ abaptisma ba Eyohana.

⁴ Oblus a tno ma a lu mi le, Abaptisma ba Eyohana a wo okyku moa la a sheŋ a zhiŋ bgu. Eyohana a nyuŋ moarehwi ba Esrayila a lu mi ma moa a bmi ba adlidzi ta la are la á ba a ba ambla baŋ. Aŋa a mi a wo Eyesu.

⁵ Omba moa a gno eka he nga, moa a da mo a kpo mo abaptisma eshko ba Adigi-odne Eyesu.

⁶ Oblus a shri abgo a shki mo eshri nga moa a hwiŋ Ogbgaodzi. Moa a hwiŋ Ogbgaodzi a khwo nga moa a lu odlo la elom andandandim, nga moa a nyum oshpa ba Ahogbrẽ.

⁷ Moare he lo a wo otsko.

⁸ Oblus a gre anwyeakulu moaEyahuda. Aŋa a la a nyum oshpa osheshye a da moare, nga a la a kla odlo pa la mo. A zga gble okyku o da mo a ka Oreŋ ba Ahogbrẽ a bmye. A kpo eha etra ahe lo.

⁹ Ambo moakyeŋ a shye eshri a gre eshri, okyku eka he moa a bmi ba adlidzi mbo. Moa a lu odlobi eshri Ozhẽ ba Adigi-odne egi ayi ba eshki mvye. Okyku eka he nga, Oblus pa la moa la a bmi ba adlidzi moa a zhiŋ ogbu nga a dzu mo a zga. Aŋa a la a kla odlo elulum pa la moare aku engla ba Etiranu.

¹⁰ Moa a kpo eka he lo okyku eyi eha. Okyku eka he moare la a wo obiŋ ba Asiya mvye, moaEyahuda pa la moa la a wo moaEyahuda mbo, moa a ba okyku o gno odlo Ahogbrẽ.

Moanwye Esiva

¹¹ Ahogbrẽ a la a kpo ayakplo ba egbregbre abgo ba Oblus.

¹² Etaŋ oknye ta la ashye oknye baŋ a la a kpo otum ta la lo a mbo, moa a tslo lo a shri a kom moa la a no olo nga moa a gba a shaŋ. Egbgabi nga e la e zgi e knye.

¹³ MoaEyahuda-kyeŋ a la a dzi nga a la a se egbgabi. Moa a klo o kpo otum la eshko Adigi Eyesu nga o se egbgabi. Moa nyuŋ egbgabi a lu mi le, Eshko Eyesu ba Oblus a la a nyum oshpa baŋ, agimi e zgi.

¹⁴ Moanwye afoha ba anyuŋ-andakʼpo olu moaEyahuda angyiŋ a la a kpo eka he lo. Eshko ba adimo e ri Esiva.

¹⁵ Ambo ogbgabi o nyuŋ mo o lu mi le, Ame e yi Eyesu, ame e yi Oblus, ambo agimi e wo moa ayi angyiŋ?

¹⁶ Alom ba ogbgabi o kpo otum ka la ŋa a kpo ambgu pa la mo nga a kpo mo efye. Moa mvye a knye a sku odne lo. Moa a fa ero nga aknye moa a gba a dle.

¹⁷ MoaEyahuda pa la moa la a wo moaEyahuda mbo mvye la a wo Afisu a gno oshpa ekplo la e kpo. Okyku eka he moa a kpo eyli, nga moa a ka eshko Adigi-odne Eyesu la ekekʼpo.

¹⁸ Moare nzenze la a bmi ba adlidzi moa a ba nga, moa a bmi nga a lu ayakplo moa a la a kpo a da moare.

¹⁹ Moare la a kpo agum moa a shri akpekpa mo a shri a ba nga moa a ta lo ovo egi ayi moare. Amgbaŋ akpekpa ba moa a ta lo ovo a wo eka Enaira ezbietno.

²⁰ Ozhẽ egbregbre he lo, odlo Adigi-odne o ngla o ta ma-ma, nga o tspi osheshye.

Moa a kpo ambgu osku ba Afisu

²¹ Ambla ba ayakplo he a kpo nga, Oblus a zga eso ba o yi Amasidoniya nga o yi Egrise, nga o bla o ba o yi Orushalima. Oblus a lu mi le, Ambla ba ame e gre a mi lo bgu le, ame é bre é yi Oroma.

²² Okyku eka he nga, a hom Etimoti, ta la Erastu otum a da mo a gre Amasidoniya. Moahi lo a la a kpo a ghwo a ŋa. A ta abyi obiŋ ba Asiya ple ayga.

²³ Omba he lo a mi, moa a kpo ambgu Afisu okyku Ozhẽ ba Adigi-odne.

²⁴ Alomakyeŋ la a ndga ondga a wo ma, eshko baŋ e ri Edametriyu. Aŋa a la a ndga aku olo ba ahogbrẽ moa a bzi ŋa Atami pepeple la ahwre ba azurfa nga a la a shri lo a la a gbmo. Aŋa pa la moa la a la a kpo otum he lo, moa a la a hwiŋ ma nzenze.

²⁵ Edametriyu a bzi moahi lo mvye, pa la moa la a kpo edgu otum he lo, nga a nyuŋ mo a lu mi le, Agimi e sheŋ e yi ohwihwiŋ bi mvye o wo otum he lo sha angyiŋ.

²⁶ Agimi e ka nga e sa e gno eka alom moa a bzi ŋa ma Oblus a la a kpo. Aŋa a lu mi ma moahogbrẽ moa a ndga la abgo, ma alo a wo moahogbrẽ angyiŋ mbo. A hwiŋ ozhẽ a zhiŋ moare nzenze osku ba Afisu nga a gba a kpo o zhiŋ obiŋ ba Asiya mvye a mo.

²⁷ Okyku eka he otum bi hi, ó kpo ó tsi ó gbu. Nga o dzu mbo, aku olo ba ahogbrẽ Atami, á dzu ekplokyeŋ nga mbo, nga ekʼpo baŋ é kpu. Moarehwi ba obiŋ ba Asiya ta la obiŋ hi pyeŋ moa a la a hlu ahogbrẽ he lo eshko!

²⁸ Ambla moare a gno odlo he a khwo nga, eso e tpi mo ayi nga moa a ygi okũ a lu mi le, Atami ba Afisu a wo la anyua-nyuŋ!

²⁹ Odlo he lo o kso eso moare osku lo mvye. Moare a gre a yi a vu Egayu, ta la Aristaku. Moaha he lo a wo moarehwi ba Amasidoniya angyiŋ. Moa a la a dzi ta la Oblus. Moa a vu mo a shri a gre anyuŋ aku moa a la a shki ma.

³⁰ Oblus a klo e mbi o yi aku lo o sku moare, ambo moa la a bmi ba adlidzi a tla baŋ a yi.

³¹ Moandakʼpo ba obiŋ lo la a wo moakyeŋazba a mbo, moa a hom otum a shri a kom ŋa ma aŋa a yi aku lo mbo.

³² Omba he lo eshki e tpi ayi e gre eshri. Moare a la a lu odlo wayawaya ototno. Moakyeŋ a lu ohi, moakyeŋ a lu omi. Moare nzenze eshki lo moa a yi ekplo moa a shki okyku lo mbo.

³³ Moakyeŋ a lu mi ma Alaksanda angyiŋ a da mo a shki, okyku eshi moaEyahuda a daŋ a gre ozhẽ. Okyku eka he Alaksanda a tsa abgo nga, a klo o lu odlo la o shla eshri baŋ egi ayi moare.

³⁴ Omba moa a ka baŋ a wo a ba Eyahuda nga, moa a ygi okũ awa aha a lu mi le, Atami ba Afisu a wo la anyuanyuŋ!

³⁵ Ambla he nga atengla ba osku he lo a gbu eshki eso obiŋ. A nyuŋ eshki a lu mi le, Agimi arehwĩ ba Afisu! Are-yaŋ a mbo a yi ba aku olo ba Atami la a wo anyuanyuŋ, ta la ezhim ba Ohlueshko la e zgi ongyeŋ e ba e gbu obiŋ, e wo osku ba Afisu.

³⁶ Arekyeŋ a kpo a gbu baŋ a dzu evom ekplokyeŋ ohe lo ku-ku mbo. Okyku eka he agimi e da eso e gbu gimi obiŋ, e kpo ekplokyeŋ ba ototno mbo.

³⁷ Moare hi moa a ka a si emakyeŋ aku olo bimi mbo, nga moa a lu ekplokyeŋ ebi eshri ahogbrẽ bimi lo a mbo mbo, ambo agimi e vu mo e shri e ba ahe.

³⁸ O wo ba Edametriyu pa la moa la a kpo edgu otum he lo ka la ŋa, a wo ekplokyeŋ ta la arekyeŋ le, elum moa a shki a sõ ombgu e wo ma, moandakʼpo a sa a wo ma. Moa a yi a kla ekplo lo okro mo.

³⁹ O wo bimi e klo ekplokyeŋ e gre eka he le, o raŋ o gre moa a yi a lu lo eshki moare mvye omba moa a shki.

⁴⁰ Okyku eshi agi é gre ewu eka ba moa a sko gi a yi egi ayi ombgu okyku osom okro ayi la o kpo anye he. Enomekyeŋ e wo ma okyku osom okro ayi he lo la e kpo anye he mbo. Ekplokyeŋ owlama ba agi e ba e lu e wo ma mbo.

⁴¹ Ambla baŋ a lu eka he a khwo nga, a kyu eshki abgo.