Otum 13 - Ohwihwim Olehe

Moa a hom Abarnaba ta la Eshawlu otum

¹ Eklisiya osku ba Antakiya, moarehwi ba Ahogbrẽ a hom otum, pa la moa la a nye moare odlo Ahogbrẽ a wo ma. Moahi lo a ri Abarnaba, ta la Esimiyo ba moa a bzi ŋa Ahwĩ, ta la Olusu ba Esirini, ta la Amaniyi anwye-odne ba ogomna Ehirudu, ta la Eshawlu.

² Omba moa a la a hlu Ahogbrẽ eshko nga moa a nyom eshri mo algo, Ogbgaodzi o nyuŋ mo o lu mi le, Agimi e sla Abarnaba ta la Eshawlu e zga agba okyku otum ba ame e bzi mo okyku lo.

³ Moa a nyom eshri mo algo nga, moa a fa olu nga moa a shki mo abgo eshri a khwo nga, moa a da mo a gre.

Obiŋ ba Esapru

⁴ Ogbgaodzi o da Abarnaba ta la Eshawlu a gre Eselusiya, nga moa a zgi ahe lo a gre anwye-obiŋ moa a bzi lo ma Esapru. Anyuŋ-ondzu a ta lo a kpaŋ.

⁵ Omba moa a gbu osku ba Esalami, moa a nyum oshpa ba Ahogbrẽ anwyeakulu moaEyahuda nzenze. Eyohana Amarku a ba pa la mo okyku o kpo o ghwo a mo.

⁶ Moa a zgi ahe lo a gre osku ba Apafo. Ahe lo moa a ri a sheŋ alomakyeŋ la a la a kpo agum. Eshko baŋ e ri Ba-Eyesu. Aŋa a wo arehwĩ ba Eyahuda. Aŋa a lu ma Ahogbrẽ angyiŋ a hom ŋa otum.

⁷ A wo akyeŋazba ba ogomna ba anwye-obiŋ. Eshko ogomna lo e ri Esagi Obulu. Aŋa a yi eda a gre eshri. Ogomna a bzi Abarnaba ta la Eshawlu okyku o da mo a nyum oshpa ba Ahogbrẽ a daŋ a gno.

⁸ Ambo alom la a la a kpo agum lo, eshko baŋ ba Egrise e ri Elima, aŋa a klo ba ogomna a gno oshpa lo mbo.

⁹ Okyku eka he Eshawlu ba eshko baŋ e ba oha e ri Oblus, Ogbgaodzi o kpo otum ka la ŋa. A ka Elima dzo nga a nyuŋ ŋa a lu mi le,

¹⁰ Aŋo o wo anwye Eshitaŋ angyiŋ! Aŋo o wo afpu ekployaŋ a mbo la e wo edzi. Aŋo o wo la obile ma o gre eshri, nga aŋo o la o zga ngre okyku o zhiŋ adlidzi ba odlo Ahogbrẽ o da lo a dzu akpro.

¹¹ Okyku eka he aŋo ó ka ekʼpo Ahogbrẽ ohuhuhi. Aŋo ó vga ayi. Aŋo ó ka okro mbo okyku omba fi. Elima a dzu nga, ayi baŋ a gbu evbu nga aŋa a la a mom abgo a klo are la a shri ŋa opi.

¹² Ogomna a bmi ba adlidzi ta la oshpa moa a nyum, omba baŋ a ka ekplo la e kpo. A ka egbregbre a gre eshri ta la onyenye eshri ba Adigi-odne.

Osku ba Antakiya ba Ebisidiya

¹³ Oblus ta la moakyeŋazba moa a ba Epega obiŋ ba Ebamfiliya. Ahe lo angyiŋ Eyohana Amarku a dzu mo a zga nga a bla a gre eŋa Orushalima.

¹⁴ Moa a zgi Epega a gre Antakiya ba Ebisidiya. Onda Asabat nga moa a gre anwyeakulu moaEyahuda nga moa a dzu ma.

¹⁵ Ambla moa a tsi engla akpa ba odaŋ ba Omusa a khwo nga, moa a sa a tsi akpekpa moarehwi ba Ahogbrẽ a hom mo otum a ta. Moandakʼpo ba anwyeakulu lo a vẽ mo a lu mi le, Agimi anáŋ, agi e klo bimi e lu odlo ta la eshki o wo bimi e wo odlo ma okyku o shĩ mo.

¹⁶ Oblus a kso angyeŋ nga a si abgo baŋ nga a lu mi le, Agimi anáŋ ba Esrayila pa la moa la a wo moaEyahuda mbo la a wo ahe, la e lu Ahogbrẽ ma, agimi e ngli atuŋ e gno odlo me.

¹⁷ Ahogbrẽ moarehwi ba Esrayila he lo, a sla moadigi, nga a sko mo a zga la olbi egi ayi moarehwi omba ba moa a dzu moazhẽ obiŋ Amasla. Ahogbrẽ nga a se mo a sku obiŋ ba Amasla la ekʼpo egregre baŋ.

¹⁸ Ahogbrẽ a ka mo ayiekŋe omba moa a wo akla eyi ekʼpoenyi.

¹⁹ Ahogbrẽ a jygi egu efoha obiŋ ba Akana, nga a da moarehwi baŋ a dzu moa-obiŋ ba Akana lo.

²⁰ Moa a dzu obiŋ he lo okyku eyi endgae—nyi la ekʼpoetno. Ambla he nga a shri moa la a sõ ombgu a da mo, ma-me a gbu omba ba Asamuyila arehwĩ ba Ahogbrẽ a hom ŋa otum.

²¹ Omba ba moa a klo areŋ nga, Ahogbrẽ a shri Osol anwye Ekish a da mo. A wo a ba ogu ba Ebenjami. A ri oreŋ okyku eyi ekʼpoenyi.

²² Ambla moa a kypi ŋa oreŋ, Ahogbrẽ a da Adawuda a dzu areŋ moaEyahuda. Ahogbrẽ a lu odlo eshri Adawuda a lu mi le, Ame e ka, Adawuda anwye Ejese angyiŋ a wo edgu are ba ame e la e gno oraŋ ka la ŋa. Aŋa á kpo ekployaŋ a mbo ba ame e klo baŋ a kpo.

²³ Eyesu a wo a ba ogu ba Adawuda. Ahogbrẽ a da Eyesu a dzu Areoshla moaEsrayila eka baŋ a hwim.

²⁴ Omba ba Eyesu a ba a wo mbo, Eyohana a nyum oshpa a ygi moare a lu mi le, Agimi e kyu ayakplobi bimi e la e kpo abgo okyku o da me e kpo gimi abaptisma.

²⁵ Omba ba Eyohana a wo osusku ba o kpo otum baŋ a khwo nga, a nyuŋ moare a lu mi le, Eka bimi e ka, ame e wo ayi angyiŋ? Ame angyiŋ e wo are bimi e la e ka ayi ozhẽ mbo! Ambo agimi e ka! Aŋa á ba ambla me, nga ame e tse ma ba ame e ngla akpadga baŋ mbo.

²⁶ Agimi anáŋ, agimi anwye ba Ebrahim, pa la moa la a wo moaEyahuda mbo, la a wo ahe mvye la a la a hlu Ahogbrẽ eshko, moa a shri oshpa ba oshla he lo a kom gi angyiŋ!

²⁷ Moarehwi la a dzu Orushalima pa la moandakʼpo mo, moa a yi baŋ angyiŋ a wo Areoshla mbo. Nga moa a ka odlo Ahogbrẽ moa a la a tsi onda Asabatyaŋ a mbo a bmye mbo. Odlo he lo o wo odlo moarehwi ba Ahogbrẽ a hom mo otum a lu, eshri obobga moa a bga Eyesu, odlo lo o bli.

²⁸ Moa a hwiŋ akpukyeŋ eshri baŋ mbo nga moa a hwiŋ ŋa la ombgu ba eku mbo, ambo moa a da Ebilatu a sõ ŋa ombgu ba eku.

²⁹ Ambla moa a kpo ŋa ekployaŋ a mbo eka ba Akpa ba Ahogbrẽ a lu, moa a gile ŋa egŋe aki nga moa a ngybi ŋa.

³⁰ Ambo Ahogbrẽ a kso ŋa ongybi.

³¹ Moare la a dzi ka la ŋa a zgi Orushalima a gre Egalili, moa a ka ŋa engyi oshushku. Moahi lo angyiŋ a wo moaegŋe egi ayi moarehwi ba Esrayila.

^32-33 Agi e ba ahe okyku o shri Oshpaodzadzi he lo e da gimi. Ahogbrẽ a sheŋ a hwim pa la moadigi, ma aŋa á kpo eka he lo. A bli ohwihwim lo ka la gi moanwye mo ohuhuhi, okro oksongybi ba Eyesu a kso. Moa a ta lo akpa ba Ohlueshko ekplu ba oha, a lu mi le, Aŋo o wo Anwye me angyiŋ. Nga anye ame e dzu Adoŋ.

³⁴ Eshri oksongybi baŋ, baŋ á ba a vrẽ nga mbo ku-ku, Ahogbrẽ a lu mi le, Ame é shri owlama ba esesla la ó bre mbo é shri é doŋ. Owlama ba ame e hwim ta la Adawuda.

³⁵ Akpa lo a lu okrokyeŋ nganga a lu mi le, Ahogbrẽ á da Anwye-odne baŋ ba adlidzi a vrẽ mbo.

³⁶ Adawuda a kpo otum Ahogbrẽ omba baŋ a wo ma. Omba baŋ a kpu, moa a ngybi ŋa engu moadaŋ, nga a vrẽ.

³⁷ Ambo ahi lo, a vrẽ engu mbo okyku eshi Ahogbrẽ a kso ŋa.

^38-39 Ame e klo bimi anáŋ mvye e yi zhezheŋ ba ame e nyum oshpa he lo eshko Eyesu angyiŋ e ygi gimi. Oshpa he lo o wo oshpa moa a la a kyu moare abgo odlobi. O raŋ o gre bimi e yi ba moa á ba a kyu areyaŋ a mbo abgo odlobi baŋ. Ohe lo odaŋ ba Omusa o kpo lo o gbu mbo.

⁴⁰ Agimi e nyuŋ e kpo-kpo okyku o da ekplo moarehwi ba Ahogbrẽ a hom otum a lu e kpo ka la gimi mbo. Moa a lu mi le,

⁴¹ Agimi la e dzi moare! E fu eha nga é kpu! Okyku eshi otum ba ame e kpo omba bimi hi, Agimi é bmi ba adlidzi ta la lo mbo, O wo ba arekyeŋ a sla lo a ygi gimi a mbo!

⁴² Omba ba Oblus, ta la Abarnaba a zgi anwyeakulu, moare a vẽ mo okyku o da mo a ba onda Asabat ahwõ nga a nyum oshpa nganga.

⁴³ Ambla ba eshki e som ayi e khwo nga, moaEyahuda pa la moa la a wo moaEyahuda mbo la a zhiŋ a sõ ozhẽ moaEyahuda, moa a lu Oblus ta la Abarnaba ma. Moa a sa a nyum oshpa, a shĩ mo ma moa a kom adlidzi ba Ahogbrẽ gble.

⁴⁴ Onda Asabat ba oha nga moare ba osku lo nzenze a ba okyku o gno odlo ba Adigi-odne.

⁴⁵ Omba ba moaEyahuda a ka eshki nzenze eka he nga, moa a kpo efpu nga moa a lu odlo ototno ta la Oblus, nga moa a klo odlo ka la ŋa.

⁴⁶ Ambo ekakahelo, Oblus ta la Abarnaba, moa a nyum oshpa osheshye a lu mi le, O dzu omgbybi moa a nyum oshpa ba Ahogbrẽ a ygi gimi ori. Agimi e gno lo nga e tla lo. Agimi e ka owlama eso ba gbagbu-amo mbo, okyku eka he agi é dzu gimi é zga nga é yi okro moa la a wo moaEyahuda mbo.

⁴⁷ Adigi-odne a jygu gi odaŋ a lu mi le, Ame e sla gimi okyku o da gimi e dzu ayimom egi ayi moa la a wo moaEyahuda mbo, Okyku o da gimi e dzu ozhẽ ba oshla okyku obiŋ hi mvye.

⁴⁸ Omba moa la a wo moaEyahuda mbo a gno eka he nga, moa a gno oraŋ nga moa a vye Adigi-odne okyku odlo baŋ. Nga moarehwi ba Ahogbrẽ a sheŋ a sla mo okyku eso ba gbagbu-amo, moa a bmi ba adlidzi.

⁴⁹ Odlo Ahogbrẽ o ngla o tsi o gre yoŋ ogʼba obiŋ hi lo.

⁵⁰ Ambo moaEyahuda a som moandakʼpo ba osku he lo, ta la moashe moa la a wo moaEyahuda mbo ayi. Moashe he lo a zhiŋ a la a hlu Ahogbrẽ eshko. MoaEyahuda a zga esi o kpo Oblus ta la Abarnaba ewu, nga moa a kpo nga moa a kyku mo a sku ogʼba obiŋ hi lo.

⁵¹ Moa la a nyum oshpa lo a ndza abgo mo nga moa a gre emo osku ba Ekoniyom.

⁵² Moanwyeotum la a wo Antakiya a gno oraŋ a gre eshri. Ahogbrẽ nga a bli mo la Ogbgaodzi.