Otsotsa 1 - Ohwihwim Olehe

¹ Moa a ta ayakplo ba Eyesu Ekristi a tsa angyiŋ akpa he lo. Ahogbrẽ a shri ayakplo he lo a shri a daŋ, okyku o daŋ a tsa moawahgrẽ ba Ahogbrẽ ayakplo la á ba a kpo ambla fi. Ekristi a da anwyeadga baŋ a gre ibu ba Eyohana awaghrẽ baŋ nga, a daŋ a tsa ŋa ayakplo he lo.

² Eyohana a lu oshpa ayakplo baŋ a ka pyeŋ. Oshpa baŋ he lo o wo eshri oshpa ba Ahogbrẽ a shri a ba ta la adlidzi ba Eyesu Ekristi a tsa.

³ Are la a tsi akpa he lo á wo la ovye ma. Nga moare la a ngli atuŋ a gno odlo ba moa a ka nga a lu, nga a kpaŋ ekplo ba moa a ta lo akpa he lo le, moa á wo la ovye ma! Omba o wo osusku a mo ba ayakplo he lo á ba a kpo.

E shko Eklisiya efoha

⁴ Akpa he lo a zgi abgo ba Eyohana a yi abgo ba moaEklisiya efoha ba egʼba obiŋ ba Asiya. Okpoghwo ta la opyapyaŋ la o zgi okro ba Ahogbrẽ o ba, o dzu o bimi. Ahogbrẽ he lo angyiŋ a wo ma ohuhuhi, nga aŋa angyiŋ a wo ma ayga, nga aŋa angyiŋ á ba a ba. Okpoghwo ta la opyapyaŋ he lo nga o zgi okro ba egbga efoha la e wo egi ayi ba emgbakyiŋ oreŋ ba Ahogbrẽ a mbo,

^5-6 ta la okro ba Eyesu Ekristi la a wo egŋe ba adlidzi. Aŋa angyiŋ a wo Anwye ba moa a mbre ŋa ori, nga ba moa a kso ŋa eku. Aŋa angyiŋ a wo are la a ri ekʼpo eshri moareŋ ba obiŋ hi pyeŋ. Aŋa a la a klo gi. Nga ibu ba eku baŋ angyiŋ a shla gi abgo ba odlobi bi, nga a da gi e dzu oreŋ ba moandakʼpo olu ba Ahogbrẽ okyku o da gi e kpo Ahogbrẽ baŋ la a wo Adaŋ, otum. Esesla ta la ekʼpo, e dzu e ba Eyesu Ekristi gbagbu gbagbu-amo! Amin.

⁷ Agimi e ka, aŋa á ba ta la etabro! Areyaŋ a mbo, pa la moa la a bzu ŋa egʼba baŋ, á ka ŋa. Nga areyaŋ a mbo obiŋ hi á wu okũ okyku ŋa. Alo o wo adlidzi eka he lo angyiŋ! Amin.

⁸ Adigi-odne Ahogbrẽ la a wo ekʼpo pyeŋ a lu mi le, Ame angyiŋ e wo Alfa ta la Omega. Aŋa angyiŋ a wo ma ohuhuhi, nga aŋa angyiŋ a wo ma ayga, nga aŋa angyiŋ á ba á ba.

Eyohana a ka Ekristi

⁹ Ame angyiŋ e wo Eyohana anigimi. Nga ibu okŋeogba ta la Eyesu angyiŋ, ame e pu ka la gimi ewu ba agimi e kpo, nga ame e sa e pu ka la gimi Oreŋ baŋ ta la ota esõ akpyli. Moa a shri me a gre a yi a ta anwye-obiŋ ba moa a bzi lo ma Abatmo okyku ba ame e nyum oshpa ba odlo ba Ahogbrẽ ta la adlidzi ba Ekristi a tsa.

¹⁰ Olum onda ba Adigi-odne lo nga, Ogbgaodzi o ri oshye me, nga ame e gno enzi egagre egi okũ me. Enzi he lo e zhle eka ba egbaru.

¹¹ E lu mi le, Aŋo o ta ayakplo boŋ o ka, ambla he nga o shri akpa he lo o shri o kom moaEkilisiya efoha he lo. Moa a wo osku ba Afisu, ta la Esemana, ta la Epegamum, ta la Etatira, ta la Esadi, ta la Efiladelfiya, ta la Eladosiya.

¹² Ame e zhiŋ okyku o ka are la a la a lu odlo pa la me. Ambo ame e ka emgbakha ovo ba azurfa efoha e tspi obiŋ.

¹³ Eshki mo, arekyeŋ la a zgi arehwĩ a tspi ma. Are he lo a ygi ariga la a dzõ a fu apre-adga la obiŋ. Nga ashye akpa ba azurfa a bre eshaku baŋ.

¹⁴ Amasẽ eshri baŋ a wo akyle pse. Nga eyayi baŋ e shka ayi eka ovo.

¹⁵ Adga baŋ nga a shka ayi eka ba ahwre abme ba moa a yla lo ashle nga ba moa a sa a khwa lo adzadzi, nga enzi baŋ e zhle eka ba ami la a gile aku a ygi obiŋ osheshye.

¹⁶ A kom éyi enzo efoha obgori baŋ. Nga akõ anyu aha la a ri hihihli a zgi anyu baŋ. Nga eyayi baŋ e wo ŋaŋaŋla eka omba ba olum o vueshri.

¹⁷ Ame e tsi e gbu eka okom ototno egi ayi baŋ omba ba ame e ka ŋa. Ambo a shri obgori baŋ a lom egʼba me nga a lu mi le, O kpo eyli mbo! Ame angyiŋ e wo a ba ori, ta la a ba amom-abgo.

¹⁸ Ame angyiŋ e wo are la a wo la esõ ma! Ame e mbi e kpu, ambo aŋo o ka, ambo ame e wo la esõ gbagbu gbagbu-amo ma. Ame e wo la ekʼpo eshri ba eku, ta la obiŋ ba moarehwĩ la a sheŋ a kpu a wo ma.

¹⁹ Okyku eka he aŋo o ta ayakplo boŋ o ka lo akpa. O ta ayakplo la a kpo ohuhuhi, ta la ayakplo la á ba a kpo ambla.

²⁰ Aŋo o ka eshyẽ ba éyi enzo efoha boŋ o ka lo obgori me ta la emgbakha ovo efoha ba azurfa. Éyi enzo efoha he lo e dzu moanwyeadga ba moaEklisiya efoha. Nga emgbakha ovo efoha ba azurfa he lo e dzu moaEklisiya efoha angyiŋ.