Oluka 21 - Ohwihwim Olehe

Ofaodi ba ashe-eshaku

¹ Eyesu a zhiŋ a ka moare la a wo angyiŋ a shri ofaodi mo a shri a ygi angongo Anyuŋ-akulu.

² Ambo a ka ashe-eshaku la a wo la ekŋe a gre eshri, a shri anini aha a ygi angongo lo.

³ Eyesu a nyuŋ moare a lu mi le, Ame e lu e da gimi, ashe-eshaku he lo la a wo la ekŋe egyagi a mbo, a fa a da Ahogbrẽ a gre areyaŋ a mbo.

⁴ Moahwõ a fa ofa angyiŋ eshki ekplo nzenze ba moa a wo la alo ma, ambo ashe-eshaku hi, la a wo la ekŋe, a shri ekplo baŋ a wo la alo ma pyeŋ angyiŋ a shri a di.

Eyesu a lu ba moa á kypi Anyuŋ-akulu

⁵ Moakyeŋ eshki mo a lu odlo eshri Anyuŋ-akulu, eka ba alo a wo adzadzi a gre eshri, okyku ézhim ba moa a mbdzi lo e wo ozba nzenze. Nga moa a sa a lu odlo eshri ofaodi ba moare a la a shri a da Ahogbrẽ okyku lo. Eyesu a lu mi le,

⁶ Ayakplo he pyeŋ ba agimi e ka he, omba o yi ó ba ba ezhim ekyeŋ a mbo é ba e ra é fki la eŋa okro he mbo. Moa á kypi lo pyeŋ á ygi obiŋ.

Ewu andandandim

⁷ Moa a zhĩ Eyesu a lu mi le, Andakʼpo, ohe lo ó kpo ombayaŋ? Egŋeyaŋ é ba e tsa ba edgu ayakplo he lo é ba e kpo?

⁸ Eyesu a tno mo ma a lu mi le, Agimi e nyuŋ e ka, okyku o da mo a bile gimi mbo. Okyku eshi moare nzenze á ba eshko me nga á lu mi le, Ame angyiŋ e wo Emisiya, nga le, Omba lo o kpo. Agimi e bmi pa la moare edgu he lo mbo.

⁹ E kpo eyli omba bimi e gno moa a ta eko nga moa a kpo ambgu mbo. O dzu omgbybi ba edgu ayakplo he lo á ba a kpo ayga, ekakahelo a mbo, omba ba obiŋ hi ó kso angyiŋ o kpo a wo mbo.

¹⁰ Eyesu a lu mi le, Obiŋ ó ta eko ta la obiŋ, oreŋ nga ó kpo ambgu ta la oreŋ.

¹¹ Obiŋ hi ó zhga ara nzenze. Embyle, ta la ololo ó kpo moare ewu ayaŋ a mbo. Ayakplo la a gbu eyli á kpo, nga moa á ka ayakplo egbregbre ahrẽ.

¹² Omba ba edgu ayakplo he lo a kpo a wo mbo, moa á vu gimi, nga á kpo gimi ewu, nga moa á shri gimi á di okyku o da mo a sõ gimi ombgu anwyeakulu, nga moa á shri gimi á ygi aku. Nga moa á vu gimi á shri á ba okro moareŋ okyku eshko me.

¹³ Omba he lo ó dzu ozhẽ angyiŋ okyku o da gimi e lu Oshpaodzadzi e da mo.

¹⁴ Omba he lo agimi e tne aga eka ekplo bimi é ba e lu okyku o zgi eshri bimi mbo.

¹⁵ Okyku eshi omba he lo ame é shri edgu odlo bimi é ba e lu é da gimi. Nga ame é shri okaobmye é da gimi, nga moafpu gimi á kpo á gre gimi a gbu mbo, nga á tla odlo bimi a gbu mbo.

¹⁶ Moadigimi, pa la moanigimi, pa la moa ba ogu bimi, pa la moa la a ri ekpom ka la gimi, moa á kpyi gimi. Nga moa á bga moakyeŋ eshki bimi.

¹⁷ Areyaŋ a mbo á tla gimi okyku bimi e lu me ma.

¹⁸ Ekakahelo a mbo, ekplokyeŋ tsitsi a mbo é kpo gimi mbo.

¹⁹ E da egʼba e shki gimi ami mbo, okyku eshi, ozhẽ he lo sha angyiŋ, agimi é ba e gro.

Ekplo la é ba e kpo ta la Orushalima

²⁰ Omba ba agimi e ka moanwyeakyuŋ a ta Orushalima a kpaŋ le, omba he lo agimi e ka e bmye ba moa á ba a kypi lo.

²¹ Omba he lo, o raŋ o gre ba areyaŋ a mbo, a zgi obiŋ ba Eyahuda a knye a yi akukũ. Areyaŋ a mbo la a wo osku lo eshyẽ, á knye á zgi. Areyaŋ a mbo la a wo okrokyeŋ omba he lo le, a bla a ba osku lo eshyẽ mbo.

²² Omba he lo o wo omba ba ewu angyiŋ. Ohe lo ó kpo okyku o bli ekplo ba Ahogbrẽ a lu.

²³ Ó dzu ekplo eyli nzenze omba he lo pa la moashe la a wo onyi, pa la moashe la a shri moanwye able! Ayakplo ba ayiekŋe á kpo ta la obiŋ hi, nga Ahogbrẽ á kpo moarehwi he lo ewu.

²⁴ Moa á bga moarehwi la ákõ, nga moa á vu mo eka moawaghrẽ á shri á yi ebiŋ andandandim. Nga omba he lo moa la a wo moaEyahuda mbo moa á kpo ekʼpo Orushalima o tsa ba omba mo o khwo.

Oba-ba ba Anwye Arehivĩ

²⁵ Moa á ka egŋe nzenze olulum ta la ohwa, ta la eyi enzo. Obiŋ hi pyeŋ ó wu okũ, nga ó kpo eyli ba akyuŋ ba anyuŋ-ondzu a kpo, ta la eka ba ami ba alo fa ksa, a fa ksa.

²⁶ Moarehwi moa á yla la eyli, omba moa a ka ayakplo ba moa a gno oshpa ba alo a kpo obiŋ hi pyeŋ. Omba he lo ayakplo egbregbre la e wo ahrẽ, moa á gʼbu á sku ezhẽ mo.

²⁷ Omba he lo angyiŋ, Anwye Arehwĩ á ba a gnyu. Á ba la etabro, la ekʼpo egagre, pa la ayimom ba esesla.

²⁸ Omba ba edgu ayakplo he lo a zga esĩ a kpo le, e ka ayi ozhẽ okyku eshi omba oshla bimi o wo osusku a mo.

Onyenye eshri esĩ ebro

²⁹ Ambla he nga Eyesu a ta egŋe he pa la mo, a lu mi le, Agimi e nye eda eshri esĩ ebro ta la asĩ aki ahwõ.

³⁰ Omba ba moa a hwom aya le, agimi e ka e tspi ma ongʼbo o wo osusku a mo.

³¹ Okyku eka he nga, omba ba agimi e ka edgu ayakplo he a kpo le, agimi e ka e bmye ba Oreŋ Ahogbrẽ o wo osusku a mo.

³² Agimi e gno! Ohe lo pyeŋ ó kpo ayga, areyaŋ a mbo la a wo ma obiŋ hi ohuhuhi á ba a kpu.

³³ Ongyeŋ ta la obiŋ hi moa á bre á yi, ambo odlo me ó bre ó yi ku-ku mbo.

E nyuŋ eshri bimi e zga

³⁴ Agimi e nyuŋ eshri bimi e zga! Agimi e da oriabgo, ta la owa-ami, ta la ogroayi ba anzho ba obiŋ hi o bile gimi mbo, o mbo le onda mi lo ó ba o gnyu gimi ó gnyu.

³⁵ Onda mi lo ó vu moarehwi okroyaŋ a mbo obiŋ hi, eka ba amgbaŋ ba moa a ta.

³⁶ Ambo agimi e dzu e kʼpu ombamba pyeŋ, nga e fa olu okyku o da gimi e hwiŋ oshye bimi e ba e kpo e gre edgu ayakplo la á ba a kpo, nga e tspi egi ayi ba Anwye Arehwi.

³⁷ Eyesu a nye moare Anyuŋ-akulu omba he lo. La olum-ore a la a zgi a yi Akũ Olivi nga a la a kpo okyukyku pyeŋ ahe lo.

³⁸ La endigigiŋ nga moare mvye a kʼpi a gre okyku o yi o gno onyenye baŋ Anyuŋ-akulu.