Oluka 18 - Ohwihwim Olehe

Egŋe eshri ashe-eshaku ta la are la a sõ ombgu

¹ Eyesu a ta egŋe he lo a da moanwyeotum baŋ okyku o nye mo, okyku o da mo a fa olu ombamba pyeŋ nga a zga eso ekyekyeŋ.

² A lu mi le, Oskukyeŋ are la a sõ ombgu a wo ma. A kpo eyli Ahogbrẽ mbo, nga a tsi arekyeŋ a mbo a ghwo ayi mbo.

³ Osku he lo nga, ashe-eshaku a wo ma. Ashe lo a la a ba okro baŋ ombamba pyeŋ, a la a wu okũ a lu mi le, Arekyeŋ a pyi me. O wo boŋ o bmi le, o sheŋ gi odlo!

⁴ Alom la a sõ ombgu a bmi mbo engyi oshushku. Ambo ambla nga aŋa a lu pa la eŋa a lu mi le, Ame e yi ba ame e kpo eyli Ahogbrẽ mbo, nga ame e tsi arekyeŋ a mbo mbo,

⁵ ambo okyku ba ashe-eshaku hi a la a kpo me ewu, ame é sheŋ ŋa ombgu lo. O mbo le aŋa á dzu a bmye me egʼba ovo.

⁶ Eyesu a lu mi le, Agimi e gno ekplo ba are la a sõ ombgu ba akpro hi a lu.

⁷ Eyesu a zhĩ mo a lu mi le, Ahogbrẽ a la a kpo a ghwo la moarehwi baŋ la a wu okũ egi ayi baŋ okyukyku ta la olulum mbo? Á ngli ayga á ba a kpo á ghwo la mo?

⁸ Ame e lu e da gimi, Ahogbrẽ á ngli tsi mbo, á kpo á ghwo la mo. E gno, omba ba Anwye Arehwĩ á bla á ba obiŋ hi ondakyeŋ, á hwiŋ moa la a bmi ba adlidzi bgu?

Egŋe eshri are ba Efarisi ta la are la a yga ewaŋ

⁹ Eyesu a ta egŋe he a ygi moare la a ka oshasha mo, nga moa adzi moahwõ.

¹⁰ Eyesu a lu mi le, Moarehwi aha a gre Anyuŋ-akulu okyku o fa olu. Akyeŋ eshki mo a wo a ba Efarisi, ahwõ nga a wo are la a yga ewaŋ.

¹¹ A ba Efarisi a kso angyeŋ nga a fa olu a lu ta la eŋa a lu mi le, Ame e vye la ŋo Ahogbrẽ okyku ba ame e wo are la a kpo envre mbo, nga e la e kpo abibli mbo, nga e la e kpo ayakplo ba eshre eka moahwõ mbo. Ame e vye la ŋo okyku ba ame e wo eka are la a yga ewaŋ mi mbo.

¹² Ame e la e nyom eshri me algo engyi eha asati. Nga ame e la e zgi ogʼba okyeŋ eshki egʼba okʼpo ba anzho me e shri e doŋ.

¹³ Ambo are la a yga ewaŋ a tspi eŋa ogyugyuŋ nga a zhiŋ ayi baŋ a mbo a ka ongyeŋ mbo. A bmmi abgo eshaku nga a lu mi le, Ahogbrẽ ame e wo are odlobi angyiŋ! O ka me ayiekŋe!

¹⁴ Eyesu a lu mi le, Ame e lu e da gimi, alom la a yga ewaŋ he a hwiŋ onyuŋokpo agʼbaha baŋ ta la Ahogbrẽ omba baŋ a gre odne. Alom ahwõ mi angyiŋ mbo. Okyku eka he areyaŋ a mbo la a sko eshri baŋ a zga la anyuanyuŋ, moa á sko ŋa á zga akplokyeŋ mbo. Are la a sko eshri baŋ a zga akplokyeŋ mbo angyiŋ moa á sko ŋa á zga la anyuanyuŋ.

Eyesu a fa anyuadzi a ygi moanwye afifi

¹⁵ Moarekyeŋ a shri moanwye afifi mo a ba okro Eyesu okyku a daŋ a shri abgo baŋ a shki mo eshri nga a fa anyuadzi a ygi mo. Ambo moanwyeotum a ka mo eka he nga, moa a shrom mo okyku ekplo moa a kpo.

¹⁶ Ambo Eyesu a bzi moanwye lo a ba okro baŋ nga a lu mi le, Agimi e da moanwye afifi a ba okro me! Agimi e nyom mo mbo, okyku eshi Oreŋ Ahogbrẽ o wo okyku edgu moahi lo angyiŋ.

¹⁷ Agimi e ngli atuŋ e gno! Areyaŋ a mbo la a yga Oreŋ Ahogbrẽ eka ba anwye afifi mbo le, á kpo á gbu baŋ a yi Oreŋ Ahogbrẽ mbo.

Areangyiŋ

¹⁸ Andakʼpokyeŋ ba Eyahuda a nyuŋ Eyesu a lu mi le, Are-odne la a wo shasha, ame é kpo eshi okyku o da me e hwiŋ eso ba gbagbu-amo?

¹⁹ Eyesu a zhĩ alom lo a lu mi le, Okyku eshi aŋo o lu mi ma ame e wo shasha? Arekyeŋ a wo shasha mbo o wo le Ahogbrẽ sha a wo shasha.

²⁰ Aŋo o yi odaŋ la o lu mi le, Aŋo o ri eshra mbo, aŋo o bga ebga mbo, aŋo o si esi mbo, o sheŋ akpro mbo, nga o fa olbi o da adoŋ ta la anoŋ?

²¹ Alom he lo a tno ma a lu mi le, Omba ba ame e yi e wo ola anwye ame e sheŋ e kpaŋ odaŋ he lo pyeŋ.

²² Ambla ba Eyesu a gno eka he nga, a nyuŋ ŋa a lu mi le, Ekplo ekyeŋ e yi e ra boŋ o kpo. O yi o shri ekployaŋ a mbo boŋ o wo la alo ma o shri o gbmo nga o shri amgbaŋ lo o gʼba moaekŋe, aŋo ó hwiŋ angyiŋ Ongyeŋ, nga o ba o lu me ma.

²³ Ambo ambla ba alom he lo a gno eka he nga, eso e tpi ŋa ayi e gre eshri okyku eshi a wo la angyiŋ nzenze ma.

²⁴ Eyesu a ka a tspi ba eso e bili alom he lo, okyku eka he nga a lu mi le, O wo ewu nzenze ba moa la a wo angyiŋ ma á ba a gre a yi Oreŋ Ahogbrẽ!

²⁵ O wo ewu ba are angyiŋ a gre Oreŋ Ahogbrẽ o gre ba arakumi a gre ewyle adne.

²⁶ Moare la gno odlo he pyeŋ a zhĩ a lu mi le, O wo eka he le, ayi angyiŋ á ba a gro?

²⁷ Eyesu a tno mo ma a lu mi le, Ekplo la e gre abgo okro moarehwi e kpo e gbu okro Ahogbrẽ.

²⁸ Ambla he nga, Ebitru a lu mi le, O ka, agi e dzu adne bi e zga okyku o lu ŋo ma.

²⁹ Eyesu a nyuŋ mo a lu mi le, O wo eka he lo angyiŋ. Ame e lu e da gimi, areyaŋ a mbo la a dzu odne, o mbo le ashe, o mbo le moanáŋ, o mbo le moadaŋ, o mbo le moanwye baŋ, a zga okyku Oreŋ Ahogbrẽ le,

³⁰ á hwiŋ nzenze omba he, nga á hwiŋ eso ba gbagbu-amo omba la ó yi ó ba mi.

Eyesu a lu odlo eshri eku baŋ odga otra

³¹ Eyesu a da moanwyeotum baŋ a gre agba ka la ŋa nga a nyuŋ mo a lu mi le, Agimi e ngli atuŋ e gno! Agi é yi Orushalima, ahe lo nga ekployaŋ a mbo moarehwi ba Ahogbrẽ a hom otum a ta eshri Anwye Arehwĩ é bli.

³² Moa a ta a lu mi le, Moa á shri ŋa á da moa la a wo moaEyahuda mbo, nga moa á lu ega á ygi ŋa, nga moa á dzĩ ŋa, nga moa á ta akyi á ygi ŋa.

³³ Nga moa á taŋ ŋa andzu nga á bga ŋa, ambo olum onda otra Ahogbrẽ á kso ŋa ongybi.

³⁴ Moanwyeotum a ka ekplokyeŋ baŋ a lu a bmye mbo. Ayakplo he lo a ghre mo, moa a yi ekplo baŋ a lu mbo.

Eyesu a shaŋ avgayi

³⁵ Eyesu a ba a gbu osusku ta la Ejeriko. Avgayikyeŋ a dzu akaŋ ozhẽ nga a vẽ algo.

³⁶ Omba baŋ a gno ba eshki e la e ba e bre osusku ka la ŋa e yi nga, a zhĩ a lu mi le, Eshi e la e kpo?

³⁷ Moare a tno ŋa ma a lu mi le, Eyesu ba Anazarata angyiŋ a la a ba a bre a yi.

³⁸ Avgayi lo a ta enzi angyeŋ a lu mi le, Aŋo Eyesu! Anwye Adawuda! O ka me ayiekŋe!

³⁹ Moare la a tspi egi ayi moa a shrom ŋa ma a dzu tki. Ambo a ta enzi a ta ma o ta angyiŋ. A sa a lu mi le, Aŋo Anwye Adawuda! O ka me ayiekŋe!

⁴⁰ Eyesu a tspi nga a lu ma moa a daŋ a ba. A ba nga Eyesu a zhĩ ŋa a lu mi le,

⁴¹ Aŋo o klo ba ame e kpo ŋo eshi? A tno ma a lu mi le, Andakʼpo, ame e klo o ka okro.

⁴² Ambla he nga Eyesu a nyuŋ ŋa a lu mi le, Aŋo o ka okro! Obmi ba adlidzi boŋ angyiŋ o shaŋ ŋo.

⁴³ Omba he lo, ayi baŋ a hwile nga a ka okro. A lu Eyesu ma nga a la a vye la Ahogbrẽ. Omba moare a ka eka he nga, moa mvye a hlu Ahogbrẽ eshko.