MoaOroma 6 - Ohwihwim Olehe

Okpukpu ibu ba odlobi, ambo eso ibu ba Ekristi

¹ Agi nga e lu la eshi? Agi e dzu e la e kpo odlobi okyku o da odlodzi ba Ahogbrẽ o ta ma-ma nzenze?

² O wo eka he angyiŋ mbo! Agi e sheŋ e kpu ta la odlobi bgu. O wo odzi bi e sa e dzu ta la alo nga nga?

³ Adlidzi, agimi e yi ohe lo, omba moa a kpo gi abaptisma okyku okŋeobga ba Eyesu Ekristi, moa a kpo gi abaptisma okyku okŋeobga ibu eku baŋ.

⁴ Ozhẽ ba abaptisma moa a kpo gi o dzu eka moa a ngybi gi ka la ŋa, nga ba agi e kpu ka la ŋa. O wo eka ba moa a kso Ekristi ongybi la anyuŋ ekʼpo ba Adigi, okyku o da gi a mbo e sa e hwiŋ eso elehe ozhẽ he lo.

⁵ O wo bi e dzu okyekyeŋ ka la ŋa nga e kpu eka baŋ a kpu, ekakahelo angyiŋ, agi é sa e dzu okyekyeŋ ka la ŋa, nga moa á kso gi ongybi eka moa a kso ŋa.

⁶ Agi nga e yi ba moa a gŋe egʼba bi elegbyi egŋe aki ta la Ekristi okyku o da mo a nyiŋ aga ba odlobi la a wo eso bi. Okyku o da gi e dzu moawaghrẽ ba odlobi nga mbo.

⁷ O wo ba are a kpu le, odlobi o wo ekʼpo eshri baŋ nga mbo.

⁸ O wo bi e kpu ta la Eyesu le, agi e bmi ba adlidzi ba agi é sa e dzu ma ka la ŋa.

⁹ Okyku eshi agi e yi ba moa a kso Eyesu ongybi, aŋa á sa a kpu nga mbo. Eku e wo ekʼpo eshri baŋ ku-ku mbo.

¹⁰ Eku baŋ a kpu, alo e wo okyku odlobi bi angyiŋ, a kpu eku lo odgo okyekyeŋ sha. Ohuhuhi aŋa a dzu ma okyku Ahogbrẽ a mo.

¹¹ O raŋ o gre bimi e tne aga eka bimi e kpu okyku odlobi, ambo e sa e dzu ma okyku Ahogbrẽ okŋeobga ta la Ekristi Eyesu.

¹² Agimi e da odlobi o kpo ekʼpo ta la egʼba bimi hi mbo, okyku o da gimi e bmi ta la ekhwo ba egʼba bimi mbo.

¹³ Nga agimi e bmi e shri okrokyeŋ egʼba bimi e da odlobi mbo, nga e shri lo e kpo ekplokyeŋ ba eshre ta la lo mbo. Ambo agimi e shri eshri bimi e da Ahogbrẽ, eka moarehwi la a zgi eku a hwiŋ eso, nga agimi e shri eshri bimi e da Ahogbrẽ la eso ekyekyeŋ, okyku o daŋ a kpo otum odlodzi ta la lo.

¹⁴ Okyku eshi odlobi ó hwiŋ ekʼpo eshri bimi nga mbo, okyku eshi agimi e wo ódaŋ nga mbo, ambo agimi e wo okpoghwo ba Ahogbrẽ a mo.

Moawaghrẽ odlodzi

¹⁵ Eshi angyiŋ? O wo odzi bi e la e kpo odlobi, okyku ba agi e wo okyku okpoghwo ba Ahogbrẽ? O wo eka he angyiŋ mbo!

¹⁶ Agimi e yi mbo? O wo bimi e shri eso la eso ekyekyeŋ e shri e di okyku o da gimi e kpo arekyeŋ otum eka moawaghrẽ le, adlidzi angyiŋ agimi e wo moawaghrẽ are he lo. O wo ba gimi e dzu moawaghrẽ ba odlobi le, ohi lo o shri eku angyiŋ o shri o ba. O wo bimi e wo moawaghrẽ la a tsi odlo, ohi lo o shri onyuŋokpo o zga agʼbaha bimi ta la Ahogbrẽ.

¹⁷ Agi e vye la Ahogbrẽ! Okyku eshi ayga, agimi e wo moawaghrẽ ba odlobi angyiŋ, ambo ohuhuhi agimi e yga adlidzi eka moa a nye lo, la eso bimi ekyekyeŋ.

¹⁸ Moa a kyu gimi abgo odlobi bimi nga, agimi e zhiŋ e dzu moawaghrẽ ba odlodzi.

¹⁹ Ame e la e kpo otum ta la odlo la o wo hli, okyku osheŋonye bimi. Ayga agimi e dzu moawaghrẽ ba akplo eshre, ta la ayakplobi, okyku o kpo ayakplobi. Ekakahelo, ohuhuhi, e shri eshri bimi e shri e di eka moawaghrẽ ba odlodzi okyku o da gimi e dzu la esesla.

²⁰ Omba bimi e wo moawaghrẽ ba odlobi, ekplokyeŋ e kŋe gimi e bga ta la odlodzi mbo.

²¹ E ka, agimi e hwiŋ eshi la e wo owlama okyku o kpo ayakplo bimi e la e ka lo la eshre ohuhuhi? Egbre ba ayakplo hi lo e wo eku sha angyiŋ!

²² Ambo ohuhuhi moa a kyu gimi abgo ibu ba odlobi, nga agimi e zhiŋ e dzu moawaghrẽ ba Ahogbrẽ a mo. Okyku eka he, moa a nyuŋ eso bimi a kpo okyku ŋa sha. Nga agimi é kpo nga é hwiŋ eso ba gbagbu-amo.

²³ Okyku ba egbre odlobi e wo eku angyiŋ, ambo ototno ba Ahogbrẽ o wo eso ba gbagbu-amo ibu ba Ekristi Eyesu Adigi-odne.