MoaOroma 4 - Ohwihwim Olehe

Edgu odzudzu ba Ebrahim

¹ Agi nga é lu eshi eshri Ebrahim la a wo adigi? A hwiŋ eshi?

² Moa a shri opyapyaŋ a zga agʼbaha baŋ ta la Aho-gbrẽ okyku ayakplo baŋ a kpo angyiŋ e mbi, aŋa a kpo a gbu baŋ a nyom egʼba. Ambo aŋa a kpo a gbu baŋ a nyom egʼba egi ayi ba Ahogbrẽ mbo.

³ Odlo Ahogbrẽ o lu mi le, Ebrahim a mbo a bmi ba adlidzi ta la Ahogbrẽ, nga okyku obmi ba adlidzi baŋ Ahogbrẽ a sko ŋa a zga eka arehwĩ ba odlodzi.

⁴ Are la a kpo otum akplokyeŋ le, moa a la a hre ŋa. Ohre he lo o dzu eka ototno angyiŋ mbo, ambo o dzu eka ohre okyku otum baŋ a kpo angyiŋ.

⁵ Ambo are la a kpo otum akplokyeŋ mbo a mbo, o wo baŋ a bmi ba adlidzi pa la Ahogbrẽ, la a la a zhiŋ areodlobi, a daŋ a dzu areodlodzi le, nga, Ahogbrẽ a la a kpo otum ta la obmi ba adlidzi ba are he lo angyiŋ okyku o daŋ a shri opyapyaŋ a zga agʼbaha mo.

⁶ Adawuda a tne aga ohi lo angyiŋ omba baŋ a lu mi ma are la ba Ahogbrẽ a yga ŋa ozhẽ otum mbo, ambo ozhẽ odlodzi angyiŋ le, ma are he lo a la a gno oraŋ.

⁷ Moa la ba Ahogbrẽ a kyu mo abgo odlobi mo, moa a la a gno oraŋ a gre eshri. Moare he lo, Ahogbrẽ á shki odlobi mo!

⁸ Are la ba Ahogbrẽ a sko odlobi baŋ a zga ekplokyeŋ mbo, aŋa a la a gno oraŋ a gre eshri.

⁹ Ognoraŋ ba Adawuda a lu odlo eshri lo hi, o wo okyku moare ba moa a sheŋ mo ongyum sha? O wo okyku moare ba moa a sheŋ mo ongyum mbo bubgu, o wo okyku moare ba moa a sheŋ mo ongyum sha angyiŋ mbo. Agi e tsi Odlo ba Ahogbrẽ la o lu mi le, Ebrahim a bmi ba adlidzi ta la Ahogbrẽ nga okyku lo Ahogbrẽ a sko ŋa a zga eka ba arehwĩ ba odlodzi.

¹⁰ Ohi lo o kpo ombayaŋ? O kpo omba ba Ebrahim a da mo a sheŋ ŋa ongyum a wo mbo le, ambla lo? O kpo omba ba moa a sheŋ Ebrahim ongyum a wo mbo.

¹¹ Moa a sheŋ ŋa ongyum ambla lo angyiŋ. Nga osheŋongyum baŋ lo o wo okyku o tsa ba obmi ba adlidzi ba Ebrahim angyiŋ, Ahogbrẽ a yga ŋa eka ba arehwĩ ba odlodzi, ayga moa a sheŋ ŋa ongyum. Okyku eka he, Ebrahim angyiŋ a wo adigi ba ozhẽ Ahogbrẽ mvye, nga a sa a wo adimo la a bmi ba adlidzi ta la Ahogbrẽ, nga moa a yga mo eka moarehwi la a wo la odlodzi ma, ambo moa a ka a sheŋ mo ongyum mbo.

¹² Aŋa a wo adimo la moa a sheŋ mo ongyum a mbo, ambo o wo okyku ba moa a sheŋ ongyum angyiŋ mbo, ambo okyku ba moa a bmi ba adlidzi eka ba Ebrahim a bmi ba adlidzi omba ba moa a sheŋ ŋa ongyum a wo mbo.

Agi e hwiŋ egbre ba Ahogbrẽ ibu obmi ba adlidzi

¹³ Ahogbrẽ a hwim ta la Ebrahim, pa la moanwye baŋ, baŋ á ba a shri obiŋ hi mvye á shri á daŋ. Ohwihwim he lo, moa a kpo lo okyku ba Ebrahim a kpaŋ odaŋ angyiŋ mbo, ambo okyku baŋ a bmi ba adlidzi angyiŋ. Okyku eka he nga Ahogbrẽ a yga ŋa eka ba arehwĩ ba odlodzi.

¹⁴ Okyku eka he, o wo ba Ahogbrẽ a la a bli ohwihwim baŋ pa la moare okyku moa a la a kpaŋ odaŋ angyiŋ le, obmi ba adlidzi ba t arehwĩ, ta la ohwihwim ba Ahogbrẽ, o wo o ba ototno angyiŋ.

¹⁵ Odaŋ o la o tsa gi owluayi ba Ahogbrẽ. Odaŋ ó wo ma mbo le, ekplokyeŋ eka opreodaŋ é wo ma mbo.

¹⁶ Ohwihwim he lo, moa a sko lo a zga ibu ba obmi ba adlidzi, okyku o da mo a tsa ba alo o wo ototno ba Ahogbrẽ angyiŋ okyku moanwye ba Ebrahim mvye. O wo okyku moare la a kpaŋ odaŋ sha mbo, ambo okyku moa la a bmi ba adlidzi eka ba Ebrahim a bmi ba adlidzi, okyku eshi Ebrahim angyiŋ a wo adigi ba ozhẽ Ahogbrẽ mvye.

¹⁷ Odlo Ahogbrẽ o lu mi le, Ame e sla ŋo okyku o doŋ o dzu ada ba embre moarehwi nzenze. Okyku eka he ohwihwim lo o wo odzi egi ayi ba Ahogbrẽ ba Ebrahim a bmi ba adlidzi ka la ŋa. Ahogbrẽ la a la a kso ekom, nga baŋ a la a da ekplo la e wo ma mbo e wo ma okro odaŋ baŋ.

¹⁸ Ebrahim a bmi ba adlidzi nga a la a ka ayi ozhẽ omba ba okayiozhẽ-okyeŋ o wo ma ku-ku mbo. Okyku eka he a kpo nga a ba a dzu ada ba embre moarehwi nzenze. O kpo okyku ba odlo Ahogbrẽ o lu mi le, Moanwye boŋ moa á wo nzenze.

¹⁹ A kpo eka eyi endga, ambo eso e tpi ŋa ayi omba baŋ a yi baŋ a sheŋ a gbu ogro mbo. Ohe lo o suŋ obmi ba adlidzi baŋ mbo ku-ku. A ka a da odlo ba ashe baŋ Asaratu omba baŋ a kpo a gbu baŋ a mbre nga mbo, o tpi ŋa eso ayi mbo.

²⁰ A fu obmi ba adlidzi baŋ oha mbo ku-ku. A fu oha ta la ohwihwim ba Ahogbrẽ mbo. Obmi ba adlidzi baŋ o sa o ta ma-ma, nga aŋa a la a hlu Ahogbrẽ eshko.

²¹ Okyku eshi aŋa a yi zhezheŋ ba Ahogbrẽ á ba a kpo ekplo baŋ a hwim.

²² Okyku eka he lo angyiŋ Ahogbrẽ a yga Ebrahim okyku obmi ba adlidzi baŋ, nga a sko ŋa a zga are ba odlodzi.

²³ Moa a ta ba moa á yga ŋa sha angyiŋ okyku baŋ a wo are odlodzi mbo.

²⁴ Moa a ta eshko bi a mbo, ba moa á yga gi eka ba moarehwi ba odlodzi, nga okyku bi e bmi ba adlidzi ta la Ahogbrẽ la a kso Eyesu Adigi eku angyiŋ.

²⁵ Moa a daŋ a kpu okyku odlobi bi, nga moa a daŋ a sa a kso okyku o daŋ a shri opyapyaŋ a zga agʼbaha bi ta la Ahogbrẽ.