MoaOroma 16 - Ohwihwim Olehe

Oblus a shko mo

¹ Ame e lu e da gimi, Afibi a wo anigi-alashle ba moa a bmi ka la ŋa angyiŋ. Aŋa a la a kpo otum Eshki ba Ekristi ba Ekenkriya.

² Agimi e yga ŋa eshko ba Adigi-odne, eka moa la a lu Ahogbrẽ ma a la a kpo. Nga agimi e shri ekployaŋ a mbo baŋ a klo e shri e daŋ. Okyku eshi aŋa a kpo a ghwo la moare nzenze, nga a kpo a ghwo la me a mbo.

³ Ame e shko Ebriskila ta la Akila. Moahi lo moa a la a kpo otum ba Ekristi Eyesu pa la me otsotse.

⁴ Eso mo e ba e yla okyku me. Ame e vye la mo e gre eshri. Ame sha angyiŋ e vye la mo mbo, ambo moa la a wo moaEyahuda mbo la a lu Ahogbrẽ ma mvye a mbo a vye la mo.

⁵ Ame e shko Eshki ba Ekristi la e shki odne mo a mbo. Ame e shko akyemeazba ba adlidzi, Ebanitu. Aŋa angyiŋ a wo arehwĩ ba ori la a bmi ba adlidzi ta la Ekristi ogʼba obiŋ ba Asiya.

⁶ Ame e shko Emeri, aŋa a kpo otum a gre eshri okyku gimi.

⁷ Ame e shko Adroniku ta la Ojumiya, moahi lo moa a wo moaEyahuda angyiŋ. Agi e lom aku otsotse. Moa la a nyum oshpa a yi moahi lo zhezheŋ. Moa a lu Ekristi ma a sku me.

⁸ Ame e shko Ampliyatu, aŋa a wo akyemeazba ba adlidzi angyiŋ ekpom ba Adigi-odne.

⁹ Ame e shko Obana, aŋa a la a da gi e kpo otum ba Ekristi otsotse, nga ame e shko Estaki akyemeazba ba adlidzi.

¹⁰ Ame e shko Abelese ba areyaŋ a mbo a ka okyekye baŋ otum ba Ekristi zheŋ. Ame e shko moare ba ogu ba Aristobulu.

¹¹ Ame e shko Ehirodiyoŋ, aŋa a wo a ba Eyahuda, nga ame e shko moanáŋ ba ozhẽ Ekristi la a wo ogu ba Enasiso.

¹² Ame e sa e shko Etrafena ta la Etrafosa, moahi lo moa a kpo otum Adigi-odne, nga ame e shko akyemeazba ba adlidzi Ebesi. Aŋa a kpo otum nzenze okyku Adigi-odne.

¹³ Ame e shko Orufu. Aŋa a gbu eshko otum ba Adigi-odne. Ame e shko anaŋ, okyku eshi aŋa a sko me a zga eka ba anwye baŋ angyiŋ.

¹⁴ Ame e shko Asinkritu, ta la Eflegoŋ, ta la Ehemese, ta la Ebatraba, ta la Ehemase, pa la moanáŋ la a lu Ekristi ma la a wo pa la mo mvye.

¹⁵ Ame e sa e shko Efilologo, ta la Ojuliya, ta la Eniriyu, ta la anáŋ-alashle, ta la Olimpa, nga ame e sa e shko moa la a lu Ahogbrẽ ma mvye la a wo pa la mo.

¹⁶ Agimi e shko areyaŋ a mbo adzadzi. Moa la a lu Ekristi ma mvye moa a shko gimi.

Onyenye ba amom-abgo

¹⁷ Ame e shĩ gimi anáŋ, agimi e nyuŋ e ka okyku moa la a shri oslokroayi a la a ba, nga a la a tpi obmi ba adlidzi moare ayi. Moahi lo a la a tla edgu onyenye bimi e yga. Agimi e ngʼba e sku mo.

¹⁸ Okyku eshi moa la a kpo eka he lo, moa a la a lu Ekristi Adigi-odne angyiŋ e ma mbo, ambo moa a lu eshri emo angyiŋ. Moa a la a lu arareŋ odlo nga moa a la a bile moarehwi la a wo la adlidzi ma.

¹⁹ Areyaŋ a mbo a sheŋ a gno eka bimi e tspi osheshye ta la obmi ba adlidzi ta la Oshpaodzadzi lo. Okyku eka he, ame e la e gno oraŋ ka la gimi e gre eshri. Ame e klo bimi e tne aga ogyugyuŋ eshri ayakplo la a wo adzi, nga e tla ayakplo la a wo abi.

²⁰ O wo bimi e la e tspi eka he angyiŋ le, Ahogbrẽ á ngli ayga á ba a sha Eshitaŋ adga bimi mbo. Okpoghwo ba Adigi-odne Eyesu o dzu ka la gimi.

²¹ Etimoti, are la a la a kpo otum pa la me a la a shko gimi. Nga Olusiyu a mbo, ta la Ejasoŋ, ta la Ososibita, moa a shko gimi. Moahi lo moa a wo moaEyahuda angyiŋ.

²² Ame Etatiyu, la e ta akpa he, ame e shko gimi eshko ba Ekristi.

²³ Adime-odne la a ri Egayu, aŋa arehwĩ ba Eklisiya la e shki eshki odne baŋ, aŋa a mbo a shko gimi. Erastu la a wo are la a shri amgbaŋ a zga ba osku lo ta la anigi Ekwatu, moa a shko gimi. [

²⁴ Okpoghwo ba Adigi-odne Eyesu Ekristi o dzu ka la gimi. Amin.]

Olu ba amom-abgo okyku o hlu eshko

²⁵ E da gi e hlu Ahogbrẽ eshko! Okyku eshi aŋa a kpo a gbu baŋ a da gimi e tspi la osheshye obmi ba adlidzi bimi. O wo eka he angyiŋ Oshpaodzadzi ba ame e nyum he lo. O wo eshri ba Eyesu Ekristi. O wo eka ba eshyẽ ba adlidzi he lo ba moa a ta lo edzi. Alo o mbi o ghre ba ogbyigbyi.

²⁶ Ambo ohuhuhi moarehwi ba Ahogbrẽ a hom mo otum, moa a ta odlo he lo akpekpa, okyku o da areyaŋ a mbo a yi adlidzi lo. Nga okyku odaŋ ba Ahogbrẽ ba gbagbu-amo a jygu gi, moa a shri odlo ba adlidzi he lo a kom moarehwi ba obiŋ hi pyeŋ, okyku o da mo a bmi ba adlidzi ta la lo nga a kpaŋ lo.

²⁷ Agi e ka Ahogbrẽ akyakyeŋ la a wo la okaobmye pyeŋ, la ekekʼpo eshko ba Eyesu Ekristi gbagbu-amo. Amin.