MoaOroma 12 - Ohwihwim Olehe

Odzudzu otum ba Ahogbrẽ

¹ Agimi anáŋ, okyku okayiekŋe ba Ahogbrẽ baŋ a wo la alo ma nzenze okyku gi angyiŋ, ame e shĩ gimi, agimi e shri eshri bimi e ndba okyku otum ba Ahogbrẽ, nga e shri eso bimi e zga otum baŋ, nga e kpo otum baŋ a gno oraŋ ka la gimi. Ohe lo angyiŋ o wo otum odzadzi la o raŋ o gre bimi e kpo.

² Agimi e kpo otum okyku o da obiŋ hi angyiŋ o gno oraŋ ka la gimi mbo, ambo agimi e da Ahogbrẽ angyiŋ a kpo otum eso bimi nga a zhiŋ gimi pyeŋ. O wo baŋ a zhiŋ gimi le, agimi é kpo é gbu bimi é ka okoklo ba Ahogbrẽ é bmye. Agimi é kpo é gbu bimi é yi aga baŋ la a wo adzadzi nga a raŋ ŋa eso nga a wo zhezheŋ.

³ Okyku ototno ba okayiekŋe ba Ahogbrẽ a shri a da me, ame e lu e da gimi mvye, agimi e sko egimi e zga la ekʼpo e gre eshri mbo, ambo agimi e nyuŋ e kpo-kpo eka bimi e tne aga. Areyaŋ a mbo nga a sa a kpo otum ta la obmi ba adlidzi ba Ahogbrẽ a shri a daŋ.

⁴ Egʼba bi e wo evgi ma nzenze. Otum mo a mbo o wo andandandim ekakahelo.

⁵ Nga eka ba agi e wo nzenze he a mbo, agi e wo okyekyeŋ angyiŋ eshko Ekristi, nga moa a kŋe gi mvye a bga eka ba egʼba ekyekyeŋ.

⁶ Okyku eka he o raŋ o gre ba areyaŋ a mbo a kpo otum ta la oyioyi ba Ahogbrẽ a shri a daŋ, okyku o bli ekplo ba Ahogbrẽ a klo bi e kpo. O wo ba oyiyi ba Ahogbrẽ a shri a da gi o wo okyku onyumoshpa angyiŋ le, o raŋ o gre bi e nyum lo la obmi ba adlidzi bi e wo la alo ma.

⁷ O wo ba alo o wo okyku o kpo o ghwo la moahwõ angyiŋ le, o raŋ o gre bi e kpo e ghwo eka he lo. O wo ba alo o wo okyku onyenye angyiŋ le, o raŋ o gre bi e nye eka he lo.

⁸ O wo ba alo o wo okyku o shĩ moahwõ angyiŋ le, o raŋ bi e shĩ moahwõ eka he lo. Areyaŋ a mbo la a la a kpo a ghwo la moahwõ la ekplo baŋ a wo la alo ma le, o raŋ o gre baŋ a kpo lo la eso ekyle. Nga areyaŋ a mbo la moa a shri ekʼpo a daŋ okyku o daŋ a kpo otumokyeŋ le, o raŋ o gre baŋ a kpo lo la adlidzi, nga a kpo lo la osheshye. Areyaŋ a mbo la a kpo a ghwo la arekyeŋ le, o raŋ o gre baŋ a kpo lo la anyu eŋo-eŋo.

⁹ O raŋ o gre ba oklo bi o dzu oklo ba adlidzi. O raŋ o gre ba agimi e tla ayakplo la a wo abi, nga e bmi ta la ayakplo la a wo adzi.

¹⁰ Agimi e klo egimi adzadzi okyku eshi agimi e wo moanáŋ angyiŋ eshko ba Ekristi, nga agimi e la e fa olbi e da egimi la oklo.

¹¹ Areyaŋ a mbo a kpo otum ngre, nga a kpo oreŋ mbo. Areyaŋ a mbo a kpo otum Ahogbrẽ la osheshye.

¹² Agimi e la e ka ayi ozhẽ la ovyevye, nga e ghwo eso omba bimi e kpo ewu, nga e fa olu ombamba mvye.

¹³ E gʼba ayakplo bimi e wo la alo ma pa la moanigimi la a wo ekŋe, nga agimi e yga moazhẽ adne bimi.

¹⁴ E vẽ Ahogbrẽ okyku o daŋ a kpo a ghwo la moa la a kpo gimi ewu, agimi e vẽ ŋa okyku o daŋ a hre anyu a ygi mo angyiŋ mbo, ambo a kpo a ghwo la mo.

¹⁵ O kpo ovye pa la moa la a kpo ovye, nga o wu okũ pa la moa la a wu okũ.

¹⁶ Agimi e da moare a dzu okyekyeŋ ka la gimi. Agimi e nyom egʼba mbo, e yga edgu otumyaŋ a mbo moa a shri a da gimi, nga e sko eshri bimi e zga eka bimi e yi eda e gre eshri mbo.

¹⁷ O wo ba arekyeŋ a kpo gimi ekplokyeŋ la e wo ebi le, agimi e bla lo e kpo ŋa ma mbo. E zga gble nga e kpo ekplo ba areyaŋ a mbo a gno oraŋ ta la alo.

¹⁸ E kpo ekployaŋ a mbo bimi e kpo e gbu, okyku o da gimi e dzu opyapyaŋ ta la areyaŋ a mbo.

¹⁹ Agimi akyemeazba, agimi e bla ekplobi e kpo arekyeŋ mbo, agimi e da Ahogbrẽ angyiŋ a kpo lo ababgo baŋ la olom baŋ, okyku eshi Akpa ba Ahogbrẽ a lu mi le, Ame é kpo are lo ma, ame é nyiŋ e da are lo. Ahogbrẽ a lu eka he.

²⁰ O kpo eka ba Akpa Ahogbrẽ a lu mi le, O wo ba embyle e kpo afpu ŋo le, o shri algo o daŋ a ri. O wo ba oŋo o kpo ŋa le, o shri ami o daŋ a wa. O wo boŋ o la o kpo eka he le, aŋa á gbu anzi.

²¹ Agimi e da ayakplobi a kpo a gre gimi mbo, ambo agimi e kpo e gre ayakplobi la odlodzi.