MoaOroma 11 - Ohwihwim Olehe

Okayiekŋe ba Ahogbrẽ eshri ba moaEsrayila

¹ Ame e la e zhĩ, alo o dzu eka ba Ahogbrẽ a tla moarehwi baŋ angyiŋ? O wo eka he angyiŋ mbo! Ame eshrishri me a mbo ame e wo a ba Esrayila angyiŋ. Ame e wo anwye ba ogu ba Ebrahim nga ame e wo a ba ogu ba Ebenjami.

² Ahogbrẽ a tla moarehwi baŋ tsitsi a mbo mbo. Moahi lo angyiŋ aŋa a sla mo oriori. Agimi e yi ekplo Akpa ba Ahogbrẽ a lu omba ba Eliya a wu okũ eshri ba moaEsrayila a lu mi le,

³ Ahogbrẽ, moaEsrayila moa a bga moarehwi boŋ o hom otum mvye, nga moa a kypi ambgu boŋ mvye. O ka, ame sha angyiŋ e ra a mo, nga moa a gba a klo o mom me o bga.

⁴ Ahogbrẽ a tno ŋa ma a lu la eshi? Ahogbrẽ a tno ma a lu mi le, Ame e sheŋ e kpaŋ moarehwi ezbiefoha okyku eme bgu. Moahi lo, moa á zhiŋ á lu ahogbre ba akpro moa a bzi lo ma Abal ma nga mbo.

⁵ O wo ekakehelo angyiŋ ohuhuhi. Moarehwi ple ba Ahogbrẽ a sheŋ a sla a yi a ra. A kpo eka he okyku okayiekŋe baŋ a wo la alo ma angyiŋ.

⁶ Ososla baŋ a sla lo, aŋa a kpo okyku okayiekŋe baŋ a wo la alo ma. Ahogbrẽ a sla moare okyku otumokyeŋ ba moa a kpo angyiŋ mbo, ambo a sko otum moarehwi a la a kpo angyiŋ a zga esĩ e mbi, agi e ka adlidzi ba okayiekŋe ba Ahogbrẽ mbo.

⁷ Eshi nga? Moarehwi ba Esrayila, moa a hwiŋ ekplo ba moa a klo mbo. Moare ple ba Ahogbrẽ a sla sha, moa a hwiŋ lo. Moa la a ra nga, moa a tla o gno obzi ba Ahogbrẽ.

⁸ Akpa ba Ahogbrẽ a lu mi le, Ahogbrẽ a da eso mo e zhĩ, nga ma-me o ta anye he, moa a kpo a gbu moa a gno nga a ka a bmye mbo.

⁹ Adawuda a lu mi le, O da oriabgo mo o dzu ekyeŋ ta la amgbaŋ, Ta la ekplo ba osheŋevgo. Alo angyiŋ o dzu egbre mo.

¹⁰ O da mo a dzu moa la a vga ayi, okyku o da mo a ka mbo, Nga o da ewu mo e dzu okro mo ombamba pyeŋ.

¹¹ Ame e la e zhĩ, omba ba moaEyahuda a sheŋ evgo, o dzu eka ba moa a jygi ekpyemgbyeŋ angyiŋ a mo? O wo eka he angyiŋ mbo! Ambo okyku moaEyahuda a kpo odlobi angyiŋ, moa la a wo moaEyahuda mbo a hwiŋ oshla lo. Ohe lo o kpo okyku o da moaEyahuda a zga gble nga a hwiŋ lo.

¹² Okyku moaEyahuda a kpo odlobi, obiŋ hi mvye moa hwiŋ owlama nzenze. Otsuogbu moaEyahuda o shri owlama o kom moa la a wo moaEyahuda mbo o gre eshri. Owlama lo ó sa ó ta ma nzenze o wo ba moaEyahuda a mbo a ka lo a bmye!

Oshla ba moa la a wo moaEyahuda mbo

¹³ Ame e sa e lu odlo ka la gimi la e wo moaEyahuda mbo ohuhuhi. Ame e wo are la a nyum oshpa okyku bimi, okyku eka he ame é zga gble otum me.

¹⁴ O dzu mbo ame é kpo é gbu ba ame é tsa moarehwi ba embre me é da mo a ka a bmye, okyku o da moakyeŋ a hwiŋ oshla.

¹⁵ Moarehwi obiŋ hi a zhiŋ a dzu moakyeŋ azba ba Ahogbrẽ okyku ba Ahogbrẽ a tla moaEyahuda. Eshi é ba e kpo omba ba moa a yga moaEyahuda? O dzu eka moa la a sheŋ a kpu a sa a hwiŋ eso angyiŋ!

¹⁶ O wo ba moa a shri angʼbazhga agbro ba oriori a da Ahogbrẽ, o dzu eka ba agbrotsa lo mvye a wo a ba Ahogbrẽ angyiŋ. Nga o wo ba moa a shri emgbʼbo ba aki a shri a da Ahogbrẽ le, embgu lo a mbo e dzu e baŋ angyiŋ.

¹⁷ E ka, embguebze ba aki ba olivi ba odne lo, moa a ngʼba lo a ygi a bi, nga moa a shri ombgu ba aki ba olivi la a wo akla, a shri a ba nga moa a shri lo a ba a bʼbu lo eble ta la olivi ba odne. Agimi la e wo moaEyahuda mbo e wo eka ba olivi ba akla angyiŋ, nga ohuhuhi agimi e la e pu oraŋ ta la esõ-egbubiŋ pa la moaEyahuda otsotse.

¹⁸ Okyku eka he ame e lu e da gimi, agimi e dzĩ moaEyahuda ba moa a ngʼba mo eka embgu a sku aki lo mbo. Agimi nga e nyom egʼba ekayaŋ? Agimi e wo ombgu sha angyiŋ. Agimi e wo oshye ba emgbʼbo lo mbo, emgbʼbo lo angyiŋ e wo oshye bimi.

¹⁹ O dzu mbo agimi e la e lu mi le, Agi e yi, moa a ngʼba embgu lo okyku o hwile ozhẽ okyku gi angyiŋ.

²⁰ O wo adlidzi. Moa a ngʼba mo a ygi a bi, okyku moa a bmi ba adlidzi mbo. Ambo moa a ra gimi a zga ma okyku bimi e bmi ba adlidzi. Ambo agimi e ygi egʼba okyku ekplo la e kpo mbo, ambo agimi e dzu la eyli.

²¹ Agimi e ka, Ahogbrẽ a dzu moaEyahuda la a wo esĩ ba embgu lo a zga mbo. Eka bimi e ka, o wo ba agimi e kpo eka moa a mbo a kpo le, á dzu gimi á zga?

²² Ahe, agi e ka eka ba okayiekŋe ta la olom ba Ahogbrẽ o wo. Aŋa a la a kpo olom pa la moa la a tsu a gbu, ambo a ka gimi ayiekŋe. O wo bimi e tspi kye eka he lo le, agimi é hwiŋ okpoghwo ba Ahogbrẽ. O wo bimi e tspi kye eka he lo mbo le, aŋa á ndbi gimi á ta.

²³ O wo moaEyahuda a sa a bmi ba adlidzi moa á yga mo, okyku eshi Ahogbrẽ a wo la ozhẽ ma baŋ a bla mo a yga.

²⁴ Agimi la e wo moaEyahuda mbo, agimi e wo eka ba ombgu esĩ aki ba olivi ba akla. Moa a ngʼba lo nga, ekplo egbregbre, moa a shri lo a bʼbu eble ta la olivi ba odne. MoaEyahuda, moa a wo eka ba esĩ aki ba olivi ba odne angyiŋ. Okyku eka he, o wo hli o gre, ba Ahogbrẽ a sa a bla embgu baŋ a ngʼba lo he a bla a bre ma.

Okayiekŋe ba Ahogbrẽ okyku areyaŋ a mbo

²⁵ Agimi anáŋ, adlidzi la a ghre ba ame e klo o da gimi e yi lo a wo ma. Agimi é yi lo angyiŋ le, alo á da gimi e tne aga eka bimi e yi eda e gre eshri mbo. Ekplo lo a mi hi, Oshyeshri moaEsrayila he lo o wo gbagbu angyiŋ mbo. MoaEyahuda á tla Ahogbrẽ eka he, o wo le, moa la a wo moaEyahuda mbo a zhiŋ a lu Ahogbrẽ ma ayga dne.

²⁶ MoaEsrayila mvye moa á gro eka ba Akpa ba Ahogbrẽ a lu mi le, Areoshla á zgi Ezayoŋ angyiŋ á ba a ba. Aŋa á se ayakplobi á sku ogu ba Eyakubu mvye.

²⁷ Ame é fa omba ba ame é ba e sko odlobi moa a la a kpo.

²⁸ Okyku moaEyahuda a tla Oshpaodzadzi, moaEyahuda a zhiŋ a dzu moafpu ba Ahogbrẽ okyku gimi la e wo moaEyahuda mbo. Ambo okyku ososla ba Ahogbrẽ a sla okyku moadimo, moa a zhiŋ a dzu moakyeŋazba.

²⁹ E ka, Ahogbrẽ a la a nyiŋ eso baŋ o wo baŋ a klo o sla are, o mbo le o wo baŋ a klo o shri owlama o da are mbo.

³⁰ Ambo agimi la e wo moaEyahuda mbo, agimi e tla Ahogbrẽ ayga, ambo okyku moaEyahuda a tla Ahogbrẽ, agimi e sa e hwiŋ okayiekŋe ba Ahogbrẽ.

³¹ Okyku okayiekŋe ba Ahogbrẽ ba agimi e hwiŋ, moaEyahuda ohuhuhi ekakahelo, moa a la a tla Ahogbrẽ. Alo o kpo okyku o da mo a mbo a sa a hwiŋ okayiekŋe baŋ.

³² Ahogbrẽ a da moare mvye a dzu moawaghrẽ ba oshyeshri okyku o daŋ a tsa areyaŋ a mbo okayiekŋe baŋ.

Agi e vye la Ahogbrẽ

³³ Owlama ba Ahogbrẽ o gre eshri! Okaobmye ba Ahogbrẽ ta la oyioyi baŋ o gre eshri! Ayi a kpo a gbu baŋ a tsa ekplo ba Ahogbrẽ a hwim? Ayi nga a kpo a gbu baŋ a ka otum ba Ahogbrẽ a bmye?

³⁴ Akpa ba Ahogbrẽ a lu mi le, Ayi a yi eso ba Adigi? Ayi nga a kpo a gbu baŋ a shri ebra a shri a daŋ?

³⁵ Ayi a shri ekplokyeŋ a daŋ a ka, Nga baŋ á ba a bla lo a shri a daŋ?

³⁶ Aŋa angyiŋ a kpo ekployaŋ a mbo, aŋa nga a da ekployaŋ a mbo e wo ma okyku eŋa. Ekekʼpo e dzu okyku Ahogbrẽ gbagbu-amo! Amin.