MoaOroma 10 - Ohwihwim Olehe

¹ Agimi anáŋ, ame e klo e gre eshri eso me ba moarehwi me a hwiŋ oshla! Ame e fa olu nzenze okyku mo.

² Ame e kpo e gbu ba ame e zgi egŋe e lu mi ma moa a bmi ta la Ahogbrẽ osheshye. Ambo ekplokyekyeŋ, moa a yi adlidzi zhezheŋ ayga a bmi ta la Ahogbrẽ mbo.

³ Moa a yi ozhẽ ba Ahogbrẽ a la a shri opyapyaŋ a zga agʼbaha baŋ pa la moarehwi mbo. Moa a klo ozhẽ ba eshrishri emo ondundum, okyku eshi moa a sõ ozhẽ ba Ahogbrẽ a shri opyapyaŋ a zga agʼbaha baŋ pa la moarehwi mbo.

⁴ E gno, Ekristi a sheŋ a da otum ba odaŋ o tspi bgu, okyku eka he, areyaŋ a mbo la a bmi ba adlidzi moa á shri opyapyaŋ á zga agʼbaha baŋ ta la Ahogbrẽ.

Oshla o wo okyku areyaŋ a mbo

⁵ Omusa a ta akpa eshri oshri opyapyaŋ a zga agʼbaha moarehwi ta la Ahogbrẽ, ozhẽ okpaŋodaŋ. A ta a lu mi le, Are la a la a sko odaŋ a zga esĩ le, á hwiŋ eso okyku lo.

⁶ Ambo moa a ta akpa eshri oshri opyapyaŋ o zga agʼbaha ba Ahogbrẽ pa la moarehwi ozhẽ obmi ba adlidzi, nga a lu mi le, Aŋo o zhĩ eŋo mbo o lu mi le, Ayi á ba a yi Ongyeŋ, okykujo da Ekristi a ba obiŋ hi?

⁷ O mbo le aŋo o zhĩ mbo o lu mi le, Ayi á ba a yi ongybi eshyẽ nga á da Ekristi á ba a kso?

⁸ Moa a lu mi le, Odlo ba Ahogbrẽ o wo osusku ka la gimi nga o wo anyu bimi ta la eso bimi. Odlo he lo a mi, o wo oshpa ba obmi ba adlidzi bimi e la e nyum he lo.

⁹ O wo boŋ o zgi egŋe la anyu boŋ o lu ma Eyesu angyiŋ a wo Adigi, nga o wo boŋ o bmi ba adlidzi eso boŋ ba Ahogbrẽ a kso ŋa ongybi le, aŋo ó gro.

¹⁰ Okyku eshi moa a shri opyapyaŋ a zga agʼbaha bi ta la Ahogbrẽ okyku bi e bmi ba adlidzi ka la ŋa eso bi angyiŋ, nga agi e hwiŋ oshla okyku bi e zgi egŋe la anyu bi.

¹¹ Odlo Ahogbrẽ o lu mi le, Areyaŋ a mbo la a bmi ba adlidzi ka la ŋa, á ba a gbu anzi mbo ku-ku.

¹² Ozhẽ he lo o hwile okyku areyaŋ a mbo angyiŋ. Ekplokyeŋ e wo ondundum okyku moaEyahuda, pa la moa la a wo moaEyahuda mbo, mbo. Ahogbrẽ a wo okyekyeŋ angyiŋ, Ahogbrẽ angyiŋ a wo Adigi mvye, nga a la a shri owlama nzenze a da areyaŋ a mbo la a vẽ ŋa.

¹³ Odlo Ahogbrẽ o lu mi le, Areyaŋ a mbo la a bzi eshko ba Adigi-odne, á ba a gro.

¹⁴ Ambo moa á kpo anyu á ba a ba okro baŋ, o wo ba moa a bmi ba adlidzi mbo? Nga moa á kpo anyu á ba a bmi ba adlidzi o wo ba moa a gno oshpa a ka ondakyeŋ mbo? Nga moa á sa a kpo anyu á ba a gno oshpa lo, o wo ba arekyeŋ a nyum oshpa a ygi mo mbo?

¹⁵ Moa á nyum oshpa lo anyu, o wo ba moa a da moa la a nyum oshpa a gre mbo? Eka ba Odlo ba Ahogbrẽ o lu mi le, Oba-ba ba moa la a nyum oshpaodzadzi o wo ekplo ovye o gre eshri!

¹⁶ Ambo moare pyeŋ angyiŋ a yga oshpaodzadzi mbo, okyku eshi Eshaya a mbo eshrishri eŋa a lu mi le, Adigi-odne, ayi angyiŋ a bmi ba adlidzi ta la oshpa bi e nyum?

¹⁷ Okyku eka he, are a la a bmi ba adlidzi ambla baŋ a gno oshpa lo, nga á gno oshpa o wo ba moa la a nyum oshpa ba Ekristi a wo ma.

¹⁸ Ambo ame é sa e zhĩ, o wo adlidzi angyiŋ, ba moa a gno oshpa mbo? Adlidzi, moa a sheŋ a gno oshpa lo, okyku eshi odlo Ahogbrẽ o tsa o lu mi le, Enzi moa la a nyum oshpa e tsu e gre okroyaŋ a mbo obiŋ hi. Odlo lo o tsu o gre eygi ba obiŋ hi lo.

¹⁹ Nga ame e sa e zhĩ nganga. O dzu eka ba moarehwi ba Esrayila a yi mbo ku-ku angyiŋ? Omusa ababgo baŋ a shri otnoma a shri a ba oriori, a tno ma a lu mi le, Ame é da gimi é kpo efpu pa la moarehwi la a wo okyekyeŋ ka la gimi mbo. Ame é da olom o kpo gimi pa la moarehwi la a wo eka moadro.

²⁰ Eshaya a zga eso gble nga a lu mi le, Moa la a klo me mbo ayga, a sa a hwiŋ me, Nga ame e ra e tspa egi ayi moa la a klo me mbo.

²¹ A lu odlo eshri moaEsrayila a lu mi le, Ame e ndba abgo me ma-me o tsa ba olum o gbu egi ayi moarehwi la a shye eshri, nga a fa eso.