MoaOroma 1 - Ohwihwim Olehe

¹ Akpa he lo, a zgi abgo Oblus awaghrẽ ba Ekristi Eyesu. Ame, are la e nyum oshpa, nga Ahogbrẽ angyiŋ a sla me nga a bzi me okyku o da me e nyum Oshpaodzadzi baŋ.

² Ahogbrẽ a hwim pa la moarehwi baŋ a hom mo otum eshri Oshpaodzadzi he lo ogbyigbyi, nga moa a ta lo Akpekpa ba Esesla.

³ Oshpaodzadzi lo o wo eshri Anwye baŋ, Adigi-odne Eyesu Ekristi. Ibu odzudzu baŋ ba egʼba, moa a mbre ŋa ogu ba Adawuda.

⁴ Ambo ibu odzudzu baŋ ba Ahogbrẽ ba esesla, moa a tsa baŋ a wo Anwye Ahogbrẽ, la ekʼpo egagre, okyku ba moa a daŋ a kso ongybi.

⁵ Okro baŋ Ahogbrẽ a hwile me ozhẽ okyku o da me e dzu are la a nyum oshpa okyku Ekristi, okyku o tsa moarehwi ba obiŋ hi mvye okyku o da mo a bmi ba adlidzi nga a yga lo.

⁶ Odlo he lo o wo okyku gimi arehwĩ la e wo Oroma a mbo. Ahogbrẽ nga a bzi gimi okyku o da gimi e dzu moarehwi ba Eyesu Ekristi.

⁷ Okyku eka he ame e ta akpa e kom gimi arehwĩ ba Oroma, ba Ahogbrẽ a klo. Aŋa a bzi gimi okyku o da gimi e dzu moarehwi baŋ. Ahogbrẽ la a wo Adigi, ta la Adigi-odne Eyesu Ekristi a kpo a ghwo la gimi nga a shri opyapyaŋ a da gimi.

Olu okyku ovye

⁸ Ekplo ba oriori, ame e vye la Ahogbrẽ eshko Eyesu Ekristi okyku gimi, okyku eshi obiŋ hi mvye moa a gno oshpa ba obmi ba adlidzi bimi.

⁹ Ahogbrẽ ba ame e kpo otum baŋ la eso ekyekyeŋ, nga ba ame e nyum Oshpaodzadzi eshri Anwye baŋ lo, a yi ba ekplo ba ame e lu hi e wo adlidzi angyiŋ. Ahogbrẽ a yi ba ame e tne aga bimi ombamba mvye,

¹⁰ nga ame e fa olu okyku gimi ombamba mvye. Ame e vẽ okyku o da Ahogbrẽ la oklo baŋ, okyku o daŋ a hwile ozhẽ okyku o da me e ba e ka gimi.

¹¹ Ame e klo o ba o ka gimi e gre eshri okyku o da gi e hwiŋ owlama ba Ogbgaodzi otsotse, nga okyku o da gimi e hwiŋ oshye.

¹² Ame e klo bi e kpo e ghwo la egi. Okyku o da gimi e hwiŋ oshĩ okro obmi ba adlidzi me, nga o da me a mbo e hwiŋ oshĩ okro obmi ba adlidzi bimi.

¹³ Agimi anáŋ e tne aga e ka, engyi oshushku ame e klo o ba o ka gimi, ambo ekplokyeŋ e nyom me. Ame e klo o zhiŋ moare eshki bimi eka ba ame e zhiŋ moare eshki moahwõ la a wo moaEyahuda mbo.

¹⁴ Otum me o wo okyku moare mvye. O wo okyku moa la a hwile ayi, pa la moa la a hwile ayi mbo, pa la moa la a yi engla, pa la moa la a yi engla mbo.

¹⁵ Okyku eka he ame e zga eso okyku o nyum Oshpaodzadzi o ygi gimi la e wo Oroma a mbo.

Ekʼpo ba Oshpaodzadzi

¹⁶ Ame e bmi ba adlidzi ta la Oshpaodzadzi la o wo ekʼpo ba Ahogbrẽ, okyku o shla moare la a bmi ba adlidzi. Oriori moaEyahuda, ambla he nga, moa la a wo moaEyahuda mbo.

¹⁷ Oshpaodzadzi o la o tsa eka ba Ahogbrẽ a shri opyapyaŋ a shri a zga agʼbaha baŋ pa la moarehwi. Alo o wo ozhẽ obmi ba adlidzi angyiŋ, a zga esĩ ta la eygi. Akpa ba Ahogbrẽ a lu mi le, Are la ba moa a shri opyapyaŋ a shri a zga agʼbaha baŋ ta la Ahogbrẽ ozhẽ obmi ba adlidzi, á hwiŋ eso.

Odlobi moarehwi

¹⁸ Ahogbrẽ la a wo Ongyeŋ a tsa moare eka ba eso e tpi ŋa ayi okyku odlobi, ta la ayakplobi moarehwi a la a kpo. Ayakplobi he lo a nyom moare a yi adlidzi lo.

¹⁹ Ahogbrẽ a kpo mo ewu okyku eshi, otum ba Ahogbrẽ o wo zheŋ nga moare a ka lo a bmye, nga Ahogbrẽ ababgo baŋ a sheŋ a tsa moare alo zhezheŋ.

²⁰ A zga omba ba Ahogbrẽ a kpo obiŋ hi ayakplo egbregbre baŋ ba moa a ka lo mbo, ekʼpo baŋ ba gbagbu-amo, ta la odzudzu baŋ ba Ahogbrẽ, areyaŋ a mbo a ka lo zheŋ. Moare a kpo a gbu ba moa a ka ayakplo baŋ a kpo. Okyku eka he moa a wo la elomakyeŋ ma mbo!

²¹ Moa a yi Ahogbrẽ, ambo moa a la a ka ŋa la ekekʼpo baŋ mbo. Moa a la a vye ŋa a mbo mbo. E mbi moa a vye la ŋa, ambo moa a sko aga a zga ayakplo ba ototno. Aga eso mo nga a bli la evbu sha.

²² Moa a la a lu mi ma moa a yi eda, ambo moa a yi eda mbo ku-ku.

²³ Moa a sko ekekʼpo ba Ahogbrẽ ba gbagbu-amo a shri a da okpko. Moa a kpo mo a da mo a wo eka ba arehwĩ ta la abyebye, ta la ebyi, ta la edgu ebyi la e la e dra akpyki obiŋ.

²⁴ Okyku ba moarehwi a wo adro a gre eshri, Ahogbrẽ a kyu mo abgo okyku o da mo a kpo ayakplo eshre ba moa a la a klo o kpo-kpo. Moa a la a kpo ayakplo ba anzi ta la emo.

²⁵ Moa a la a zhiŋ adlidzi ba Ahogbrẽ a zga akpro. E mbi moa a hlu Ahogbrẽ angyiŋ eshko, ambo moa a la a hlu ayakplo baŋ a kpo angyiŋ eshko. O raŋ o gre ba moa a hlu Ahogbrẽ angyiŋ eshko gbagbu-amo! Amin.

²⁶ Okyku ba edgu ayakplo moarehwi a la a kpo, Ahogbrẽ a dzu moa a zga a da mo a gbu anzi. Moashe nga moa a tla moarealom nga moa a la a kpo ayakplo ba eshre ta la egʼba mo.

²⁷ Moarealom nga moa a tla moashe nga, moa a la a lom ta la emo. Moa a la a kpo ayakplo la a wo eshre ta la emo, okyku eka he moa a hwiŋ ewu okyku akpu ba moa a la a ta.

²⁸ Okyku ba moare a tla o kpaŋ odlo adlidzi ba Ahogbrẽ, aŋa a dzu mo a zga la eso eshre lo. Okyku eka he moa a la a kpo ayakplo la a raŋ ba moa a kpo lo mbo.

²⁹ Moa a bli la edgu ayakplobi andandandim ta la ogroayi, ta la oriayi, ta la efpu, ta la ebga, ta la ambgu, ta la obile, ta la eshre, nga moa a la a njygu emo,

³⁰ moa a la a sa a lu odlobi eshri emo. Moa a klo Ahogbrẽ mbo. Moa a la a dzĩ moare, nga moa a la a nyom egʼba, nga moa a la a ka emo la anyuanyuŋ. Moa a la a tne aga ba o kpo ayakplobi sha, nga moa a la a fa olbi a da moadimo mbo.

³¹ Moa a la a kpo ayakplo ba eshre, nga moa a la a bli ohwihwim mo mbo. Moa a la a kpo a ghwo la emo nga a ka emo ayiekŋe mbo.

³² Moa a yi zhezheŋ ba odaŋ ba Ahogbrẽ o lu ma moare la a la a dzu eka he, á hwiŋ egbre ba eku. Ambo, moa a da eso e la e ngʼba mo ku-ku mbo, nga ekplo eyiekŋe, moa a la a gno oraŋ pa la moare la a kpo edgu ayakplo ba moa a la a kpo he lo.