MoaOkolosi 3 - Ohwihwim Olehe

¹ Ahogbrẽ a da gimi e kso eku nga e hwiŋ esõ ta la Ekristi. Okyku eka he, agimi e shri esõ bimi e zga ayakplo la a wo Ongyeŋ. Ahe lo angyiŋ Ekristi a dzu emgbakyiŋ baŋ ba oreŋ, obgori ba Ahogbrẽ.

² Agimi e shri esõ bimi e zga ayakplo la a wo Ongyeŋ, nga e shri esõ bimi e zga ayakplo la a wo obiŋ hi mbo.

³ Okyku eshi agimi e sheŋ e kpu, nga esõ bimi e yi e ghre ta la Ekristi okro ba Ahogbrẽ.

⁴ Esõ bimi ba adlidzi angyiŋ e wo Ekristi. Nga omba baŋ á zgi, agimi a mbo é zgi ka la ŋa nga agimi é kŋe é bga ekekʼpo baŋ ka la ŋa otsotse!

Esõ elegbyi ta la esõ elehe

⁵ O dzu omgbybi ba agimi e bga okoklo ba anzho ba obiŋ hi la a la a kpo otum esõ bimi. Edgu ayakplo he lo a wo ayakplo ba eshre ta la ayakplo la a wo eka lo mbo, ta la okayiogro, ta la ekhwo ba ayakplo la a wo abi, ta la oriayi. Oriayi o wo eka moa a hlu okpko eshko angyiŋ.

⁶ Okyku edgu ayakplo he lo angyiŋ, Ahogbrẽ á ba a kpo olom pa la moa la a kpaŋ odlo baŋ mbo.

⁷ Omba ba okoklo he lo o ri ekʼpo eshri bimi, agimi a mbo e dzu eshki ba edgu moarehwĩ he lo angyiŋ.

⁸ Ambo o raŋ o gre ba agimi e ngʼba e sku ayakplo he lo pyeŋ. Alo a wo olom, ta la ogroayi, ta la aga ba ofpu. Nga moa a klo ba odzi, ta la odlo ba eshre o zgi anyu bimi mbo, ku-ku.

⁹ E sheŋ akpro e ghwo egimi mbo, okyku eshi agimi e sheŋ e nyiŋ are agbyi lo ta la edgu odzudzu mi lo bgu,

¹⁰ nga agimi e sko are ahe angyiŋ e ygi egʼba bimi a mo. Ahogbrẽ la a kpo are alahe he lo angyiŋ, a la a nyiŋ ŋa ombamba pyeŋ odzudzu ba Ahogbrẽ, okyku o da gimi e yi ŋa zhezheŋ.

¹¹ Okyku ohe lo, egʼba eka ba egʼba moaEyahuda pa la moa la a wo moaEyahuda mbo, ta la are la a sheŋ ongyum, ta la are la a sheŋ ongyum mbo, ta la are la a wo evbu, ta la are la a hwile ayi mbo, ta la awaghrẽ, ta la are la a wo awaghrẽ mbo, e wo ma mbo. Ambo Ekristi angyiŋ a wo ekployaŋ a mbo. Ekristi nga a wo ékployaŋ a mbo!

¹² Agimi e wo moarehwĩ ba Ahogbrẽ. Aŋa a klo gimi nga a sla gimi okyku o da gimi e dzu moarehwĩ baŋ. Okyku eka he o raŋ o gre ba agimi e sko okayiekŋe ta la okpoghwo, ta la opresõ-obiŋ, ta la esõ ble-ble, ta la oghwo-esõ, e ygi egʼba.

¹³ Agimi e kpo e ghwo la egimi, nga e kyu egimi abgo ombgu, omba ba akyeŋ a wo odlo ta la akyeŋ. O raŋ o gre ba agimi e kyu egimi abgo ombgu eka ba Adigi-odne a mbo a kyu gimi abgo.

¹⁴ Ekplo la e bre e gre pyeŋ, moa a shri a ta ma, e wo oklo. Alo angyiŋ e wo ekplo la e kŋe ekployaŋ a mbo e bga e da mo a dzu okyekyeŋ la adlidzi.

¹⁵ Opyapyaŋ ba Ekristi a la a shri a di angyiŋ ó sõ ombgu esõ bimi, okyku eshi okyku opyapyaŋ he lo angyiŋ Ahogbrẽ a bzi gimi a ba okyku o da gimi e ba e kŋe e bga egʼba ekyekyeŋ. Agimi e vye.

¹⁶ Oshpa ba Ekristi ozhẽyaŋ a mbo eka ba alo o wo, o raŋ o gre ba agimi e da lo o dzu esõ bimi. Agimi e nye nga e tsa egimi la okaobmye pyeŋ. E fu abmo nga e fu abmo ba ohlueshko. E fu abmo egi ayi ba Ahogbrẽ la ovye esõ bimi.

¹⁷ Okro ekployaŋ a mbo ba agimi e la e kpo nga e la e lu, e kpo lo eshko ba Adigi-odne Eyesu, eka ba agimi e la e vye la Ahogbrẽ Adigi okro baŋ.

Odzudzu bimi okro ba esõ elehe

¹⁸ Agimi ashe, e fa olbi e da moarealom bimi, okyku eshi agimi e wo moarehwĩ ba Ekristi, nga o raŋ o gre ba agimi e kpo eka he lo.

¹⁹ Agimi arealom, e klo moashe bimi nga e tpi mo esõ ayi mbo.

²⁰ Agimi anwye okyku agimi e lu Ekristi ma, o dzu omgbybi ba agimi e fa olbi e da moadigimi ombamba pyeŋ, okyku eshi ohe lo o raŋ Ahogbrẽ esõ.

²¹ Agimi adimoanwye, e tpi moanwye bimi esõ ayi mbo okyku o da lo o khwo mo ka la gimi mbo.

²² Agimi moawaghrẽ, e fa olbi e da moadigimi-odne ba obiŋ hi ekployaŋ a mbo, nga e kpo eka he omba ba moa a wo okro lo sha angyiŋ okyku o da gimi e hwiŋ otsom okro mo mbo. Ambo agimi e kpo la esõ ekyekyeŋ okyku oklo ba agimi e wo la alo ma okyku Adigi-odne.

²³ Okro ekployaŋ a mbo ba agimi e kpo, e kpo lo la esõ ekyekyeŋ eka ba agimi e la e kpo lo okyku Ahogbrẽ angyiŋ, ambo eka ba agimi e kpo lo okyku moarehwĩ mbo.

²⁴ E tne aga eka ba Adigi-odne á ba a hre gimi. Agimi nga é hwiŋ ekplo baŋ a hwim a zga ma okyku moarehwĩ baŋ. Okyku eshi Ekristi angyiŋ a wo Adaŋ-odne ba agimi e la e kpo otum okyku ŋa.

²⁵ Nga are la a ta akpu, o wo baŋ a wo ayi a mbo, aŋa á hwiŋ egbre baŋ okyku ayakplobi baŋ a la a kpo, okyku eshi Ahogbrẽ a la a kpo pa la moare pyeŋ ozhẽ okyekyeŋ angyiŋ.