MoaOkolosi 2 - Ohwihwim Olehe

¹ Agimi e da me e lu e da gimi eka ba ame e kpo otum ngre okyku gimi, pa la moarehwĩ la a wo Eladosiya, pa la moarehwĩ la a yi me la eyayi mbo.

² Ame e la e kpo eka he okyku o da mo a hwiŋ oshye-esõ nzenze, nga okyku o da mo a dzu otsotse la oklo nga okyku o da mo a hwiŋ zhezheŋ ba okaobmye ba adlidzi o la o shri o ba. Nga moa á yi eshyẽ ba Ahogbrẽ eka he lo. Alo angyiŋ e wo Ekristi eshrishri eŋa.

³ Aŋa angyiŋ a wo emakuli ba o hwile angyiŋ mvye ba moa a ghre lo la a wo okaobmye ta la oyioyi ba Ahogbrẽ.

⁴ Okyku eka he, ame e la e lu e da gimi, e da arekyeŋ a bile gimi la oklaodlo ba akpro mbo, o wo ba alo o wo odzi egyagi a mbo, e bmi mbo.

⁵ Egʼba me e wo ka la gimi mbo, ambo esõ me e wo ka la gimi. Ame nga e wo la ovye ma okyku eka ba agimi e tspi otsotse la osheshye ibu obmi ba adlidzi bimi okro ba Ekristi.

Obiobli ba odzudzu okro Ekristi

⁶ Agimi e sheŋ e yga Ekristi Eyesu eka Adigi-odne, okyku eka he, agimi e dzi odzi okro okŋeobga ba Eyesu.

⁷ Agimi e da emgbʼbo bimi e ngla osheshye egʼba baŋ, e hlu odzudzu ba Eyesu, nga e tspi la obmi ba adlidzi e ta ma-ma eka ba moa a nye gimi. Nga e kpo ovye okyku ekployaŋ a mbo.

⁸ Agimi nga e la e nyuŋ e kpo-kpo okyku o da arekyeŋ a vu gimi a ghwo ewu okyku okaobmye ba arehwĩ ta la obile ba ototno mbo. Okũ ohe lo o wo ibu onyenye ba moarehwĩ a la a dzu o nyiŋ lo abgo ototno angyiŋ, ta la egbga ba obiŋ hi la e ri ekʼpo. Okũ lo o wo okro ba Ekristi angyiŋ mbo.

⁹ Okyku eshi okro ba Ekristi, okro odzudzu baŋ ba arehwĩ, odzudzu ba Ahogbrẽ nga o wo ma esõ baŋ.

¹⁰ Nga okro ba okŋeobga ta la Ekristi, agimi e hwiŋ odzudzu la o bli zhezheŋ. Aŋa a wo la ekʼpo eshri edgu ogbgayaŋ a mbo la o ri ekʼpo ta la ekʼpo a mbo.

¹¹ Nga okro ba okŋeobga bimi ta la Ekristi angyiŋ, moa a sheŋ gimi ongyum. Osheŋ ongyum he lo o wo edgu o ba moarehwĩ a la a sheŋ he angyiŋ mbo, ambo edgu osheŋo-ngyum ba Ekristi a la a sheŋ angyiŋ. Alo angyiŋ o wo ozhẽ ba o shla gi abgo ba ekʼpo ba egʼba ba odlobi he lo.

¹² Okyku eshi omba ba moa a kpo gimi abaptisma, moa a ngybi gimi ta la Ekristi angyiŋ. Nga okro ba abaptisma he lo angyiŋ moa a kso gimi ta la Ekristi, okro obmi ba adlidzi bimi ta la ekʼpo la e wo oshye la e wo e ba Ahogbrẽ, la a kso Ekristi ibu ba eku.

¹³ Ombakyeŋ agimi e wo eka ba agimi e kpu eku okyku eshi Ogbgaodzi o wo esõ bimi mbo. Okyku odlobi bimi e la e kpo angyiŋ, ohe lo o kpo ka la gimi okyku ba agimi e wo moa la a wo moaEyahuda mbo la a yi odaŋ mbo angyiŋ. Ambo ohuhuhi Ahogbrẽ a kso gimi ibu eku nga a da gimi e wo la esõ ma ta la Ekristi! Ahogbrẽ nga a kyu gi abgo odlobi bi pyeŋ.

¹⁴ A hre akŋe nzenze la a shki gi eshri ta la odaŋ la o wo ma. Ahogbrẽ angyiŋ a khwa lo pyeŋ omba baŋ a kũ lo oskusa egŋe aki.

¹⁵ Nga egŋe aki he lo angyiŋ, Ekristi a se eshri baŋ a sku ekʼpo ba egbga la e ri ekʼpo ta la ereŋ nzenze ba egbga ba obiŋ hi. Ma-me nga a ta mo anzi eshki okyku baŋ a kpo a gre mo.

¹⁶ Okyku eka he, agimi e da arekyeŋ a jygu odaŋ eshri ekplo ba agimi e ri nga e wa mbo. O mbo le eshri olum ba esesla, o mbo le eshri oriabgo ba ohwa mbo. O mbo le eshri ba onda ba asabat mbo.

¹⁷ Edgu ayakplo he pyeŋ, alo a dzu otsotsa ba ayakplo la á ba a kpo sha angyiŋ. Esĩ lo angyiŋ e wo Ekristi.

¹⁸ Are la a wo la okoka ba edguayakplokyeŋ, nga baŋ a la a tspi gaŋ la opresõ-obiŋ ba akpro, nga a la a hlu moanwyeadga ba Ahogbrẽ eshko, edgu are he lo a la a ka eŋa la ekʼpo a gre moahwõ okyku ohe lo. Agimi e daŋ a sõ gimi ombgu mbo ku-ku. Edgu are he lo a la a nyom egʼba ba ototno, okyku edgu aga ba arehwĩ la a wo esõ baŋ.

¹⁹ Nga a la a kom Ekristi la a wo eshri angyiŋ abgo mbo. Ambo okro ba ekʼpo ba Ekristi angyiŋ moa a la a vgi egʼba lo pyeŋ nga a la a kŋe lo a pu ekpukplu lo ta la emgbʼbo lo. Nga alo e la e hlu eka ba Ahogbrẽ a klo ba alo e hlu.

Okpukpu, la odzuma ta la Ekristi

²⁰ Agimi e sheŋ e kpu ta la Ekristi, nga moa a sheŋ a shla gimi abgo ba egbga la e la e ri ekʼpo obiŋ hi pyeŋ. Okyku eshi agimi e dzu eka bimi e yi e wo moarehwĩ ba obiŋ hi? Okyku eshi agimi e kpaŋ edgu odaŋ la o lu mi le,

²¹ Agimi e tka ekplo he mbo, nga agimi e ri ekplo mi mbo, nga agimi e tka ekplo mi mbo.

²² Ayakplo he pyeŋ a dzu ayakplo ba ototno o wo ba moa a la a kpo otum ta la alo. Moa a wo odaŋ ta la onyenye ba moarehwĩ sha angyiŋ.

²³ Ambo moa a wo eka ba moa a wo la okaobmye eka ba moa a la a da moare a la a hlu moanwyeadga ba Ahogbrẽ eshko omgbyimgbybi. Moa a la a pre esõ mo obiŋ la adlidzi mbo, nga moa a la a kpo egʼba mo ewu nzenze, ambo moa a wo owlama ba adlidzi okyku o nyom okayiogro ba egʼba mbo.