MoaOkolosi 1 - Ohwihwim Olehe

¹ Akpa he lo a zgi abgo me Oblus. Ahogbrẽ la okoklo baŋ angyiŋ a da me e dzu are la a nyum oshpa ba Ekristi Eyesu. Akpa lo a zgi abgo ba anigi Etimoti a mbo.

² Alo a wo okyku moarehwĩ ba Ahogbrẽ la a wo osku ba Okolosi, moa la a wo moanigi ba adlidzi ba Ekristi. Ahogbrẽ la a wo Adigi a shri okpoghwo ta la opyapyaŋ a shri a da gimi.

Olu okyku o vye

³ Ombamba pyeŋ agi e vye la Ahogbrẽ la a wo Adaŋ Adigi-odne Eyesu Ekristi omba ba agi e fa olu okyku gimi.

⁴ Agi nga e gno oshpa eshri obmi ba adlidzi bimi okro ba Ekristi Eyesu, ta la oklo bimi okyku moarehwĩ ba Ahogbrẽ pyeŋ.

⁵ Omba ba oshpa ba adlidzi, Oshpaodzadzi he lo, o ba okro bimi, agimi e gno eka ba oshpa lo o shri okayiozhẽ o la o shri o ba. Okyku eka he obmi ba adlidzi bimi ta la oklo bimi, moa a tspi ayakplo ba agimi e la e ka ayi ozhẽ okyku lo angyiŋ. Moa a shri lo a zga Ongyeŋ adzadzi okyku gimi.

⁶ Oshpaodzadzi o shri owlama nzenze o la o shri o ba, nga o ngla o tsu o gre yoŋ obiŋ hi pyeŋ, eka ba alo o kpo ka la gimi omba ba agimi e zga esĩ e gno oshpa ba okpoghwo ba Ahogbrẽ, nga e yi okpoghwo lo zhezheŋ eka ba alo o wo.

⁷ Agimi e gno lo abgo ba Ebafara, aŋa angyiŋ a wo anwye-odne bi ba agi e klo ŋa. Aŋa nga a wo are la a kpo otum la adlidzi okyku Ekristi okyku gimi angyiŋ.

⁸ Aŋa a lu a da gi eka ba Ogbgaodzi o shri oklo o shri o da gimi.

⁹ Okyku eka he a zga omba ba agi e gno oshpa bimi, agi e fa olu okyku gimi. Agi e la e vẽ Ahogbrẽ okyku o daŋ a bli gimi la oyioyi eshri okoklo baŋ, nga a bli gimi la okaobmye pyeŋ ta la okoka ba Ogbgaodzi angyiŋ o la o shri o di.

¹⁰ O wo eka he, agimi é kpo é gbu ba agimi é dzu la edgu odzudzu ba Adigi-odne a klo, nga agimi é kpo é gbu ba o kpo ekployaŋ a mbo ombamba pyeŋ, okyku o raŋ ŋa esõ. Odzudzu bimi nga ó wo la owlama okyku edgu otumyaŋ a mbo la o wo odzi ba agimi e kpo. Nga agimi é hlu la oyioyi eshri ba Ahogbrẽ.

¹¹ A da gimi e hwiŋ oshye okro oshye pyeŋ la o zgi okro ba anyuŋ ekʼpo baŋ la e wo egre, okyku o da gimi e kom ekployaŋ a mbo la esõ oheheŋ.

¹² Nga okyku o da gimi e vye la Adigi la ovye, okyku eshi aŋa angyiŋ a da gimi e tse ma okyku o da gimi e hwiŋ ogʼba bimi eshki ekplo baŋ a shri a zga ma oreŋ ba ayimom.

¹³ Okyku eshi aŋa angyiŋ a se gimi a sku oreŋ ba evbu, nga a shri gimi a ba oreŋ ba Anwye baŋ ba esõ baŋ.

¹⁴ Okro Anwye baŋ lo angyiŋ moa a shri odzudum a shri a da gi, nga moa a kyu gi abgo odlobi bi.

Ekristi ta la otum baŋ

¹⁵ Ekristi angyiŋ a wo emle la e wo zheŋ ba Ahogbrẽ ba moa a ka ŋa mbo. Aŋa angyiŋ a wo Anwyealom ba ori baŋ a mbre. A wo la ekekʼpo a gre ekployaŋ a mbo ba Ahogbrẽ a kpo lo.

¹⁶ Okro baŋ angyiŋ Ahogbrẽ a kpo ekployaŋ a mbo la e wo ongyeŋ ta la obiŋ hi. Ayakplo ba moa a ka lo ta la ayakplo ba moa a ka lo mbo, ta la ekʼpo ba egbga, pa la moandakʼpo, pa la moa la a ri ekʼpo, ta la edgu ekʼpo ba egbga ba obiŋ hi. Ahogbrẽ a kpo obiŋ hi pyeŋ okro baŋ, nga okyku ŋa.

¹⁷ Aŋa a wo ma ayga moa a kpo ekployaŋ a mbo. Nga okro okŋeobga ka la ŋa ekployaŋ a mbo e hwiŋ odzudzu baŋ.

¹⁸ Aŋa angyiŋ a wo eshri ba egʼba baŋ, alo angyiŋ e wo Eklisiya. Aŋa angyiŋ a wo ewyi ba esõ ba egʼba he lo. Aŋa angyiŋ a wo Anwyealom ba ori moa a mbre nga ba moa a kso ŋa ongybi, okyku o daŋ sha a hwiŋ okro odzuma ba ori ba ekployaŋ a mbo.

¹⁹ Anwye lo eshrishri eŋa a hwiŋ edgu odzudzu ba Ahogbrẽ zhezheŋ okoklo ba Ahogbrẽ angyiŋ.

²⁰ Ahogbrẽ nga a zga esõ ba o zhiŋ obiŋ hi pyeŋ o ba o zga abgo baŋ okro ba Anwye lo angyiŋ. Ahogbrẽ a shri opyapyaŋ a shri a ba okro eku ba Anwye baŋ a kpu egŋe aki. Okyku eka he Ahogbrẽ a bla ekployaŋ a mbo a shri a ghwo abgo baŋ, ekployaŋ a mbo la e wo obiŋ hi ta la Ongyeŋ.

²¹ Ayga, agimi e dzu ogyugyuŋ ta la Ahogbrẽ, nga agimi e dzu moafpu baŋ okyku ayakplobi ba agimi e la e kpo, ta la aga abi ba agimi e la e tne.

²² Ambo ohuhuhi okro eku ba egʼba ba Anwye baŋ a kpu angyiŋ, Ahogbrẽ a da gimi e dzu moakyeŋazba, okyku o daŋ a da gimi e dzu la esesla, nga e dzu pse, nga e dzu la ombgu eshri bimi mbo ku-ku egi ayi baŋ.

²³ O raŋ o gre ba agimi e la e kpo otum la adlidzi okũ la o wo oshye, nga o wo zhezheŋ. Nga agimi e da okayiozhẽ ba agimi e hwiŋ omba ba agimi e gno Oshpaodzadzi he lo, o suŋ mbo ku-ku. Ame Oblus, e dzu awaghrẽ okyku oshpa he lo angyiŋ. Oshpaodzadzi he lo ba moa a sheŋ a nyum lo a ygi areyaŋ a mbo obiŋ hi.

Otum Oblus okyku Eklisiya

²⁴ Ohuhuhi nga, ame e wo la ovye ma okyku ewu ba ame e la e kpo okyku gimi. Okyku eshi okro ewu ba egʼba ba ame e la e kpo he lo, ame e kpo e ghwo okyku o mom o bli ekplo ba moa a kpo a ra okro ba ewu ba Ekristi a kpo, okyku egʼba baŋ la e wo Eklisiya.

²⁵ Ahogbrẽ angyiŋ a da me e dzu awaghrẽ ba Eklisiya. Aŋa angyiŋ a shri otum he a shri a da me okyku o da gimi e hwiŋ owlama. Otum he lo o wo okyku o nyum eshyẽ oshpa lo pyeŋ.

²⁶ Alo angyiŋ o wo ayakplo baŋ a ghre moarehwĩ pyeŋ alo ba ogbyigbyi. Ambo a hwile lo okyku moarehwĩ baŋ ohuhuhi.

²⁷ Ohi lo o wo ohwihwim ba Ahogbrẽ angyiŋ, okyku o daŋ a hwile esõ baŋ a da moarehwĩ baŋ a ka. Eshyẽ baŋ a ghre he lo, e wo la anyuŋ angyiŋ nga owlama nzenze. Alo e wo okyku moarehwĩ pyeŋ angyiŋ. Eshyẽ lo e wo Ekristi esõ bimi, alo o dzu eka ba agimi é ba e hwiŋ ogʼba ba ekekʼpo ba Ahogbrẽ.

²⁸ Okyku eka he agi e la e nyum oshpa ba Ekristi e ygi moare pyeŋ. Agi e la e shĩ nga e nye areyaŋ a mbo la edgu okaobmye mvye ba agi e wo la alo ma, okyku o shri areyaŋ a mbo a ba egi ayi ba Ahogbrẽ, eka ba are la a bmye ayi a klu okro ba okŋeobga ta la Ekristi.

²⁹ Okyku o kpo otum he lo, ame e la e kpo otum ngre nga e kpo ewu. Ame e la e kpo otum la anyuŋ oshye ba Ekristi a shri a da me. Oshye lo angyiŋ o la o kpo otum egʼba me.