MoaIbrani 9 - Ohwihwim Olehe

Edgu ohlueshko ba obiŋ hi ta la o ba Ongyeŋ

¹ Ohwihwim ba oriori o wo la odaŋ ba ohlueshko ta la okro ba o hlu eshko ba arehwĩ a kpo.

² Moa a ta abro. Enjygu ba egi edzi, moa a bzi lo ma Enjygu ba Esesla. Amgbu ovo, ta la eteblo, ta la agbrotsa ba moa a shri a ndba Ahogbrẽ moa a wo eshyẽ ahe lo angyiŋ.

³ Ashye oknye angyiŋ a gʼba enjygu ba egi eshyẽ, ba moa a bzi lo ma Enjygu ba Esesla Nzenze a sku Enjygu ba Esesla.

⁴ Ambgu ba azurfa a wo ma ahe lo. Moa a la a kpoŋ ema la a shka efpi ovo ahe lo angyiŋ. Akpati ba ohwihwim lo a wo ahe lo. Moa a tsiŋ lo pyeŋ la azurfa. Embdzu ba azurfa e wo akpati he lo. Amana a wo embdzu lo eshyẽ. Opi ba Aharuna la o jygu aya a mbo o wo akpati lo. Nga ashye ayaŋ aha ba moa a ta odlo ba ohwihwim lo ma a mbo a wo akpati.

⁵ Etserabobi eha moa a tspi eshri akpati lo ongyeŋ. Moa a wo la esesla. Moa a la a tsa eka ba Odzudzu ba Ahogbrẽ o wo ahe lo angyiŋ. Moa a da angʼbo mo a hwile a shki okro ba moa a sheŋ a kyu abgo odlobi. Ambo omba he lo angyiŋ o wo omba ba moa a wre ekployaŋ a mbo adadga mbo.

⁶ Ambla ba moa a nyuŋ ayakplo he lo pyeŋ a zga eka he angyiŋ, moandakʼpo olu ba Ahogbrẽ a la a yi enjygu ba egi edzi ba abro lo elulum okyku o kpo otum mo.

⁷ Anyuŋ-andakʼpo olu ba Ahogbrẽ sha a wo la ekʼpo ma baŋ a gre a yi enjygu ba eshyẽ. A la a yi lo eshyẽ okyku odgo okyeŋ sha eyiyaŋ a mbo. A la a shri amanzhli pa la ŋa okyku o daŋ a shri a ndba Ahogbrẽ okyku odlobi baŋ ta la odlobi ba moarehwĩ a kpo lo efĩ.

⁸ Ogbgaodzi o nyuŋ o nye zhezheŋ o lu ma odzudzu ba ayakplo eka ba alo a wo he, ma ayizhẽ ba o gre o yi Enjygu ba Esesla Nzenze a hwile a wo mbo okyku eshi ma enjygu ba egi edzi e nyom lo.

⁹ Ohe lo angyiŋ o tsa ekplu ba ohuhuhi. Alo o tsa ba anzho ta la oshriondba ba ebyi ba moa a la a shri a ndba Ahogbrẽ, ahe lo a da esõ are la a hlu Ahogbrẽ eshko e dzu pse e gbu mbo.

¹⁰ Moa a la a kpo otum ta la algo ta la owa-wa, ta la edgu ondzandza andandandim ezhẽ ofaolu mo. Ayakplo he lo pyeŋ a wo odaŋ ba egi edzi sha angyiŋ. Moa a kpo otum la lo o tsa omba ba Ahogbrẽ á ba a zhiŋ ekployaŋ a mbo á da lo é dzu elehe.

¹¹ Ambo Ekristi a sheŋ a ba, eka ba anyuŋ-andakʼpo olu ba Ahogbrẽ ba ayakplodzi la a sheŋ a wo ahe lo. Abro baŋ a la a kpo otum ma, a wo agre nga alo a wo obiobli a gre. Moarehwĩ angyiŋ a kpo lo mbo. Alo a wo eshki ba ayakplo ba moa a kpo lo obiŋ hi mbo.

¹² Omba ba Ekristi a gre abro lo, a gre Enjygu ba Esesla Nzenze he lo odgo okyekyeŋ nga o khwo. A shri amanzhli ba ébme ta la ashom andu angyiŋ a shri a di okyku o shri o ndba mbo, ambo a shri amanzhli baŋ ababgo baŋ angyiŋ. Ozhẽ he lo angyiŋ, a shri esõ ba gbagbu-amo a shri a da gi.

¹³ Moa a la a shri amanzhli ba ébme ta la andu-alalom ta la otutuŋ ba ashom andu a la a shri a hre egʼba moare ba odzudzu mo o wo shasha mbo. Nga moa a la a hwiŋ oshasha odzudzu mo ozhẽ ba moa a la a nglo mo eshrlu angyiŋ.

¹⁴ Okyku ozhẽ he lo o wo adlidzi angyiŋ, ozhẽ ba amanzhli ba Ekristi nga a kpo ekplo la e gre eka he nzenze! Ozhẽ ba Ogbgaodzi ba gbagbu-amo, Ekristi a shri eŋa a ndba Ahogbrẽ eka oshriondba la o bli angyiŋ. Amanzhli baŋ nga á sko enzi ba esõ bi á sku otum ba ototno, okyku o da gi e hlu Ahogbrẽ la a wo la esõ ma angyiŋ eshko.

¹⁵ Okyku okũ he lo, Ekristi angyiŋ a wo are la a shri ohwihwim olehe a shri a ba, okyku o da moarehwĩ ba Ahogbrẽ a bzi mo a hwiŋ owlama ba gbagbu-amo ba Ahogbrẽ a hwim a zga ma. Ohe lo o kpo o gbu ibu eku baŋ a kpu. Alo angyiŋ e shri okyuabgombgu o shri o da moare okro akpu ba moa a ta omba ba moa a wo abgo ba ohwihwim ba oriori.

¹⁶ O wo ba ogu o wo ma le, o dzu omgbybi ba moa a tsa zhezheŋ ba are la a shri lo a zga lo a sheŋ a kpu bgu.

¹⁷ Ogu o wo akplokyeŋ angyiŋ mbo, o wo ba are ba ogu lo a wo ma la ayi. Moa á ri ogu baŋ la ayayi mbo, o wo le aŋa a kpu ayga dne, arigu a ri.

¹⁸ Okyku okũ he lo angyiŋ, ohwihwim ba oriori a mbo o hwiŋ okũ odzadzi omba ba moa a kpo otum ta la amanzhli sha.

¹⁹ Ekplo ba ori Omusa a lu odaŋ lo pyeŋ a da moare ayga, eka ba moa a ta lo akpa lo. Ambla he nga a sko amanzhli ba ashom andu ta la amihĩ, nga a shri lo a hre akpa ba odaŋ pa la moarehwĩ, la akyoelgi, ta la amasẽ ba ékylu. Amasẽ lo a wo abme.

²⁰ Nga a lu mi le, Amanzhli he lo angyiŋ a wo la a bli ohwihwim ba Ahogbrẽ a jygu gimi odaŋ ma agimi e kpaŋ lo.

²¹ Ozhezhẽ he lo angyiŋ, Omusa a sa a shri amanzhli lo a hre abro lo ta la ekployaŋ a mbo ba moa a la a kpo otum ta la alo omba ba moa a la a hlu Ahogbrẽ eshko.

²² Adlidzi angyiŋ, ozhẽ ba odaŋ lo o wo eka ba ekployaŋ a mbo ba moa a ndza lo ozhẽ ba amanzhli lo, nga ozhẽ ba ozhiŋ amanzhli o ygi a bi sha angyiŋ Ahogbrẽ a la a kyu moare abgo odlobi.

Oshriondba ba Ekristi angyiŋ o kyku odlobi

²³ Ayakplo he lo a dzu egŋe ayakplo ba Ongyeŋ la a wo okũ angyiŋ. O raŋ o gre ba moa a ndza ayakplo he lo a da lo a dzu pse ta la alo ozhẽ ba amanzhli he lo. Ambo ayakplo ba Ongyeŋ a klo oshriondba la a wo odzi o gre eka he.

²⁴ Okyku eshi Ekristi a gre Enjygu ba Esesla ba moarehwĩ angyiŋ a kpo lo mbo. Enjygu lo e zgi okro ba adlidzi e zgi sha angyiŋ. A gre Ongyeŋ lo angyiŋ. Ahe lo a la a tspi egi ayi ba Ahogbrẽ okyku gi ohuhuhi.

²⁵ Andakʼpo olu ba Ahogbrẽ la a wo a ba Esrayila a la a yi Enjygu ba Esesla eyiyaŋ a mbo la amanzhli ba ébyi. Ambo Ekristi a gre okyku o shri eŋa o shri o ndba engyi oshushku angyiŋ mbo.

²⁶ Okyku eshi o wo ba alo o wo eka he angyiŋ le, ó dzu ŋa omgbybi baŋ a kpo ewu engyi oshushku, a zga ekplu ba moa a kpo obiŋ hi. Ambo a ba odgo okyeŋ nga o khwo, alo ó dzu eka he ma-me o tsa onda ba amom-abgo omba baŋ a ba okyku o daŋ a se odlobi a sku moare ozhẽ baŋ a shri eshri baŋ a ndba.

²⁷ O dzu omgbybi ba areyaŋ a mbo a kpu odgo okyeŋ, ambla he nga Ahogbrẽ á sõ ŋa ombgu.

²⁸ Ozhẽ he lo angyiŋ moa a shri Ekristi a shri a ndba odgo okyeŋ okyku o daŋ a sko odlobi moarehwĩ nzenze. Aŋa á bla á ba odgo oha okyku o sko odlobi angyiŋ nga mbo, ambo okyku o shla moa la a la a dzu a bli ŋa angyiŋ a mo.