MoaIbrani 8 - Ohwihwim Olehe

Eyesu la a wo Anyuŋ-andakʼpo olu ba Ahogbrẽ

¹ Okũ odlo ba agi e la e lu o lu mi le, Agi e wo la anyuŋ-andakʼpo olu ba Ahogbrẽ la a wo edgu ahe lo. A la a dzu obgori ba emgbakyiŋ Ahogbrẽ be Esesla Ongyeŋ.

² A la a kpo otum eka ba anyuŋ-andakʼpo olu ba Ahogbrẽ angyiŋ Enjygu la e wo Esesla Nzenze. Alo angyiŋ e wo abro ba adlidzi ba Adigi-odne angyiŋ a ta lo. Arehwĩ angyiŋ a ta lo mbo.

³ Moanyuŋ-andakʼpo olu ba Ahogbrẽ pyeŋ, moa a sla mo okyku o da mo a shri oshriondba ba anzho ta la oshriondba ba ebyi a shri a da Ahogbrẽ. Nga o raŋ o gre ba anyuŋ-andakʼpo olu bi a wo la ekplokyeŋ ma okyku o shri o di.

⁴ Aŋa a wo obiŋ hi angyiŋ e mbi, a dzu andakʼpo olu ba Ahogbrẽ mbo ku-ku, okyku eshi moandakʼpo olu ba Ahogbrẽ la a la a shri oshriondba a shri a di eka ba odaŋ moaEyahuda o lu, moa a wo ma.

⁵ Moandakʼpo olu ba Ahogbrẽ he lo, moa a la a mbiombili ototno otum lo, nga alo o zgi otum moa a la a kpo Ongyeŋ angyiŋ. O wo ekakahelo angyiŋ ta la Omusa. Omba baŋ a zga esĩ ba o ta abro lo, Ahogbrẽ a nyuŋ ŋa a lu mi le, Aŋo o ta alo o da lo a wo ondundum ta la emle ba moa a tsa ŋo aku lo mbo.

⁶ Eka ba alo o wo he, moa a shri otum ba andakʼpo olu ba Ahogbrẽ a shri a da Eyesu. Otum baŋ he lo o gre otum moahwõ lo la olbi pyeŋ, eka ba ohwihwim baŋ a hwim agʼbaha ba Ahogbrẽ pa la moarehwĩ o wo odzi o gre pyeŋ. Okyku eshi, okũ lo o wo ohwihwim ba ayakplo la a wo adzi a gre pyeŋ angyiŋ.

⁷ Ekplokyeŋ la e wo la akpu e wo ohwihwim ba ori mbo e mbi, moa a sa a klo ohwihwim ba odgo oha nga mbo.

⁸ Ambo okyku akpu ba Ahogbrẽ a hwiŋ pa la moarehwĩ baŋ angyiŋ a lu mi le, Adigi-odne a lu mi le, Omba lo o ba oba a mo, Omba ba ame é hwim ohwihwim ohe angyiŋ pa la moarehwĩ ba Esrayila, Ta la ogu ba Eyahuda.

⁹ Alo ó wo eka ohwihwim ba ame e hwim pa la moadimo Onda ba ame e se mo la abgo me e sku obiŋ ba Amasla mbo. Moa a kpaŋ ohwihwim ba ame e hwim pa la mo lo mbo. Adigi-odne a lu mi le, Okyku eka he, ame e sko mo e zga akplokyeŋ mbo.

¹⁰ Ohuhuhi, ohwihwim he lo angyiŋ o wo ohwihwim ba ame é hwim pa la moarehwĩ ba Esrayila. Adigi-odne a lu mi le, Ambla ba elum he lo, Ame é shri odaŋ me é ghwo esõ mo, Nga ame é ta lo esõ mo. Ame é dzu Ahogbrẽ mo, Nga moa á dzu moarehwĩ me.

¹¹ Arekyeŋ eshki mo, á nye akyeŋ osku mo nga mbo. Arekyeŋ á nyuŋ akyeŋ obiŋ mo a lu mi le, E ka Adigi-odne e bmye, aŋa á lu eka he ku-ku nga mbo, Okyku eshi omba he lo moa pyeŋ á yi me. Moandakʼpo pa la moanwye a mbo pyeŋ moa á yi me.

¹² Ame é ka mo ayiekŋe okyku odlobi moa a kpo. Nga ame é tne aga ba odlobi moa a kpo nga mbo ku-ku.

¹³ Omba ba Ahogbrẽ a lu odlo eshri ba ohwihwim ohe, aŋa a da ohwihwim ba oriori o dzu ohwihwim ogbyi. Okyku eka he nga ekployaŋ a mbo la e tsoŋ nga e dra ayi, alo é fpu ayga e ba e dom ya mbo.