MoaIbrani 6 - Ohwihwim Olehe

¹ Agimi e da gi e zga ayi e yi egi ayi ta la onyenye la o wo okyku moare la a bmye ayi a klu, nga e dzu edgu onyenye ba odlo ba Ekristi ba moa a zga esĩ ta la alo e zga. O raŋ o gre ba agi e bla e zga esĩ la onyenye la o nyom gi okyku o kpo otum ba ototno mbo, nga okyku o da gi e bmi ba adlidzi ta la Ahogbrẽ,

² ta la onyenye eshri ba abaptisma, ta la oshki-abgo ba moa a la a shki moare eshri, ta la okokso moare eku, ta la ombgu ba gbagbu-amo.

³ Agimi e da gi e zga ayi e yi egi ayi! Nga agi é kpo ohe lo o wo ba Ahogbrẽ a bmi le.

⁴ Nga moa á kpo anyu á ba a shri moare la a tsi a gbu á ba a bla á ba a da mo a sa a ghwo obiŋ? Ayga moa a wo ozhẽ ba ayimom ba Ahogbrẽ angyiŋ. Moa a sheŋ a ka owlama ba Ongyeŋ lo a bmye bgu, nga moa a sheŋ a yga ogʼba mo ba Ogbgaodzi.

⁵ Moa a nye nga a yi zhezheŋ ba odlo ba Ahogbrẽ o wo odzi, nga ba ekʼpo ba omba la ó ba o ba lo e kpo otum pa la mo.

⁶ Nga ambla fi nga moa a sheŋ a nye! Alo o kpo o gbu ba moa a tsa mo edgu he lo a da mo a ba a bla a ghwo obiŋ nga mbo, okyku eshi o dzu eka ba moa a bla a la a gŋe Anwye ba Ahogbrẽ egŋe aki angyiŋ, nga moa a sa a ta ŋa anzi egi ayi moarehwĩ.

⁷ Ahogbrẽ a la a shri owlama a shri a da obiŋ lo, owlama he lo angyiŋ o wo o wa amiogbu. Ami lo a la a ygi obiŋ ombamba pyeŋ, nga a da ama lo a la a hlu, nga alo a wo la owlama pa la moarehwĩ ba moa a fu lo okyku mo.

⁸ Ambo o wo ba ezga ta la asoso a zgi ma le, alo o wo la owlamakyeŋ mbo. O wo ozhẽ ba Ahogbrẽ a ta anyuabi a ygi lo nga á jygi lo la ovo.

⁹ Nga eka ba agi e lu ka la gimi akyegiazba ba adlidzi eka he a mbo, agi e fu esõ eha okyku gimi mbo. Agi e yi ba agimi e wo la owlama la o wo odzi o gre pyeŋ okyku oshla ba agimi e hwiŋ.

¹⁰ Ahogbrẽ a wo are odlodzi mbo angyiŋ mbo. Aŋa á gre esõ otum bimi e kpo á ghre mbo, ta la oklo bimi e tsa okyku ŋa ibu okpoghwo bimi e tsa moanigi ba Ekristi, nga ba agimi e kpo lo ma-me o tsa anye he.

¹¹ Agi e wo la ekhwo ma nzenze okyku o da areyaŋ a mbo a zga ayi a ta ma-ma, okyku o da ayakplo ba agimi e ka ayi ozhẽ okyku lo a bli.

¹² Agi e klo ba agimi e kpo oreŋ mbo, ambo agi e klo ba agimi e dzu eka moare la a bmi ba adlidzi nga moa a kpo heheŋ, okyku o da mo a yga ekplo ba Ahogbrẽ a hwim okyku mo.

Ohwihwim adlidzi ba Ahogbrẽ

¹³ Omba ba Ahogbrẽ a hwim ta la Ebrahim, a kʼpi ashum okyku o daŋ a kpo ekplo baŋ a sheŋ a hwim. Arekyeŋ a wo la ekekʼpo a gre Ahogbrẽ mbo, okyku eka he a kpo otum la eshko baŋ angyiŋ omba baŋ a kʼpi ashum.

¹⁴ Aŋa a hwim a lu mi le, Ame e hwim ka la ŋo ba ame é ba e shri owlama pa la moanwye nzenze é ba e shri é doŋ.

¹⁵ Ebrahim a wo heheŋ, okyku eka he a hwiŋ ekplo ba Ahogbrẽ a hwim okyku ŋa.

¹⁶ Omba ba are a la a kʼpi ashum aŋa a la a kpo otum la eshko are la e gre eshko baŋ. Ohe lo angyiŋ o la o shri opyapyaŋ o shri o zga agʼbaha moarehwĩ.

¹⁷ Ahogbrẽ a klo okyku o da ekployaŋ a mbo e dzu zhezheŋ egi ayi ba moare la á ba a hwiŋ ekplo baŋ a hwim okyku mo, nga okyku o da mo a yi baŋ á ba a nyiŋ ekplokyeŋ mbo. Okyku eka he aŋa a hwim la okʼpiashum.

¹⁸ Ayakplo aha he lo a wo ma. Alo a nyiŋ a gbu mbo. Nga Ahogbrẽ a sheŋ akpro eshri lo ku-ku mbo. Okyku eka he moa a la a shĩ gi la e hwiŋ odzudum okro baŋ, okyku o da gi e kom okayiozhẽ ba moa a shri a zga egi ayi bi osheshye.

¹⁹ Agi e wo la okayiozhẽ he lo la o da esõ bi e tspi osheshye. Ofuehakyeŋ o wo eshri lo mbo nga o wo zhezheŋ. Alo o sõ ashye oknye ba ayizhẽ ba Anyuŋ-akulu ba ongyeŋ angyiŋ, a gre aku ba egi eshyẽ.

²⁰ Eyesu a gre lo eshyẽ a sku gi. Aŋa a gre okyku gi angyiŋ. A dzu anyuŋ-andakʼpo olu ba Ahogbrẽ gbagbu-amo eka ba Amalkizedeki angyiŋ.