MoaIbrani 5 - Ohwihwim Olehe

¹ Areyaŋ a mbo la a wo anyuŋ-andakʼpo olu ba Ahogbrẽ, Ahogbrẽ angyiŋ a sla ŋa eshki moarehwĩ okyku o daŋ a kpo Ahogbrẽ otum okyku mo. A la a shri anzho ta la oshriondba a la a shri a di okyku odlobi moare.

² Aŋa a mbo a sheŋ a nye ezhẽ nzenze, okyku eka he aŋa a la a kpo ble-ble pa la moare la a dzu efĩ nga a la a ta akpu.

³ Okyku baŋ a mbo a sheŋ a nye, o raŋ o gre baŋ a shri oshriondba ba odlobi ba moare sha a shri a di mbo, ambo oshriondba ba odlobi baŋ a mbo ko-ko.

⁴ Arekyeŋ angyiŋ a la a sla eŋa ababgo baŋ a daŋ a kpo otum ba olbi ba anyuŋ-andakʼpo olu ba Ahogbrẽ mbo. Obzi ba Ahogbrẽ angyiŋ o la o da are a dzu anyuŋ-andakʼpo olu ba Ahogbrẽ, eka ba moa a bzi Aharuna.

⁵ Nga ekakahelo, Ekristi a shri olbi ba o dzu anyuŋ-andakʼpo olu ba Ahogbrẽ a shri a da eŋa ababgo baŋ mbo. Ambo Ahogbrẽ angyiŋ a nyuŋ ŋa a lu mi le, Aŋo o wo Anwye me angyiŋ, Nga ame e dzu Adoŋ anye.

⁶ Nga okrokyeŋ a sa a lu mi le, Aŋo ó dzu anyuŋ-andakʼpo olu ba Ahogbrẽ gbagbu-amo, Oluŋ ba Amalkizedeki la a wo andakʼpo olu ba Ahogbrẽ.

⁷ Odzudzu baŋ obiŋ hi, Eyesu a la a wu okũ a fa olu nga a la a vẽ la amanyi ayi egi ayi ba Ahogbrẽ la a kpo a gbu baŋ a shla ŋa abgo ba eku. Okyku baŋ a pre esõ obiŋ nga okyku baŋ a shri eshri baŋ a shri a di ekpyemgbyeŋ, Ahogbrẽ nga a gno ŋa.

⁸ Aŋa a wo Anwye ba Ahogbrẽ angyiŋ, ambo a nye o fa olbi o di okro ba ewu baŋ a kpo, okyku o daŋ a bli ekplo ba Ahogbrẽ a klo.

⁹ Omba ba moa a bli ŋa a khwo, a dzu esĩ ba oshla ba gbagbu-amo, okyku moare pyeŋ la a la a kpaŋ odlo baŋ.

¹⁰ Nga Ahogbrẽ a sla ŋa okyku o daŋ a dzu anyuŋ-andakʼpo olu ba Ahogbrẽ eka ba Amalkizedeki.

Oshĩ eshri ongʼba o sku ozhẽ

¹¹ Odlo o wo ma nzenze ba agi é lu eshri odlo he lo, ambo o wo ewu ba o wre lo o da gimi, okyku eshi o wo ewu ba agimi e ka ayakplo e bmye shoshoŋ.

¹² Omba o wo la gimi nzenze okyku o da gimi e dzu moa la a nye, ambo o raŋ o gre ba agimi e hwiŋ arekyeŋ la á zga esĩ á nye gimi odlo ba Ahogbrẽ. Agimi e la e wa abmo-andu sha okyku eshi agimi e kpo e gbu ba gimi e ri algo la a shye mbo.

¹³ Areyaŋ a mbo la a la a wa abmo-andu a yi a wo anwye-able angyiŋ ayga. Nga a yi ekplokyeŋ eshki odzi ta la obi mbo ku-ku.

¹⁴ Ambo algo la a shye, a wo okyku moare la a bmye ayi a klu angyiŋ. Moahi lo moa a nye mo nga moa a kpo a gbu ba moa a gʼba ekplo la e wo edzi ta la ekplo la e wo ebi.