MoaIbrani 4 - Ohwihwim Olehe

¹ Ohuhuhi nga, Ahogbrẽ a dzu ohwihwim lo a zga ka la gi. Ibu ohwihwim he lo Ahogbrẽ a hwile gi ozhẽ ba agi e gre e ba okro baŋ nga e dzu e dum ka la ŋa. Okyku eka he agi e dzu la eyli okyku o da arekyeŋ eshki bimi a sheŋ anye ba o yi okro ba odzudum he lo mbo.

² Okyku eshi agi e gno Oshpaodzadzi eka ba moa a mbo a gno lo. Moa a gno oshpa he lo, ambo alo o kpo mo akplokyeŋ ba owlama mbo okyku eshi moa a yga lo la obmi ba adlidzi omba ba moa a gno lo mbo.

³ Agi la e bmi ba adlidzi ta la alo angyiŋ agi e la e yi eshyẽ nga agi e dzu e dum okro ba Ahogbrẽ. Alo o wo eka baŋ a lu angyiŋ. Aŋa a lu mi le, Ame e kpo olom, okyku eka he ame e kʼpi ashum e lu mi le, Moa á ba eshyẽ nga á dzu á dum pa la me ondakyeŋ nga mbo ku-ku! Otum baŋ o khwo ogbyigbyi omba baŋ a kpo obiŋ hi a khwo a mbo, aŋa a lu eka he lo olu-lu lo.

⁴ Ambo akrokyeŋ Akpa ba Ahogbrẽ moa a lu odlo he lo eshri ba olum ba ofoha a lu mi le, Onda olum ba ofoha angyiŋ Ahogbrẽ a kyu otum pyeŋ abgo nga a dzu a dum.

⁵ Moa a sa a lu odlo eshri ba ekplo he lo nganga. Moa a lu mi le, Moa á ba eshyẽ nga á dzu á dum pa la me ondakyeŋ nga mbo ku-ku!

⁶ Moa la a gno Oshpaodzadzi ori moa a gre a yi a dzu a dum ta la Ahogbrẽ mbo okyku eshi moa a bmi ba adlidzi mbo. Ambo moakyeŋ ba moa a bmi pa la mo a wo ma, á yi á dzu á dum ta la Ahogbrẽ.

⁷ O wo ekakahelo angyiŋ okyku eshi Ahogbrẽ a sla olumokyeŋ a zga ma, moa a bzi lo ma Anye. Aŋa a sheŋ a lu odlo eshri lo ambla ba eyi oshushku ozhẽ ba Adawuda. A lu odlo ba Ahogbrẽ ba moa a sheŋ a bla alo a lu bgu. Moa a lu mi le, O wo ba agimi e gno enzi ba Ahogbrẽ anye he, Agimi e dzu la esõ-eshpi nga mbo.

⁸ Okyku eshi Ojoshua a tsa moare ozhẽ la o yi okro ba odzudum ba Ahogbrẽ angyiŋ e mbi, Ahogbrẽ nga á sa á lu odlokyeŋ á tka olum ohwõ nga mbo.

⁹ Ekayaŋ a mbo eka ba alo o wo, odzudum o yi o ra okyku moarehwĩ ba Ahogbrẽ. Alo angyiŋ o wo odzudum la o wo eka ba odzudum ba Ahogbrẽ a dzu a dum onda ba ofoha.

¹⁰ Okyku eshi areyaŋ a mbo la a gre eshyẽ nga a la a dzu a dum ta la Ahogbrẽ, á kyu otum baŋ pyeŋ abgo, eka ba Ahogbrẽ a mbo a kyu o baŋ a mbo abgo.

¹¹ Okyku eka he o raŋ o gre ba agi e zga ayi ngre nga e yi e dzu e dum okro ba Ahogbrẽ. O raŋ o gre ba arekyeŋ eshki bi a tla a fa olbi a da Ahogbrẽ eka ba moa a kpo nga a sheŋ a nye o yi okro lo mbo.

¹² Okyku eshi odlo ba Ahogbrẽ o wo la esõ ma, nga o la o kpo otum. Alo o la o ri hwya o gre akõ ba azhga aha a mbo. O la o zga ozhẽ o yi okro ba esõ ta la ayaŋ ba esõ a la a kŋe a bga ma. Okro ba ékplu ta la ahwlu a kŋe a bga. O la o mbga okoklo ta la aga la a wo esõ moarehwĩ.

¹³ Ekplokyeŋ ba moa a ghre lo okro ba Ahogbrẽ e wo ma mbo. Ekployaŋ a mbo ba moa a kpo, e wo zheŋ nga e lom egi ayi baŋ. Nga agi é shri etsko ba odzudzu bi pyeŋ é shri é daŋ angyiŋ.

Eyesu anyun-andakʼpo olu ba Ahogbrẽ

¹⁴ O raŋ o gre ba agi e kom obmi ba adlidzi ba agi e la e tspi okyku lo osheshye. Okyku eshi agi e wo la anyuŋ-andakʼpo olu ba Ahogbrẽ la a gre egi ayi ba Ahogbrẽ a ka. Aŋa angyiŋ a wo Eyesu Anwye ba Ahogbrẽ.

¹⁵ Anyuŋ-andakʼpo olu bi a wo are la a kpaŋ la okayiekŋe ta la osheŋonye bi. Ambo, agi e wo anyuŋ-andakʼpo olu ba moa a mbga ŋa ozhẽyaŋ a mbo ba moa a la a mbga gi angyiŋ. Ambo aŋa a ka a kpo odlobi ku-ku mbo.

¹⁶ O raŋ o gre ba agi e tspi la osheshye nga e gbga e ba egi ayi ba emgbakyiŋ ba Ahogbrẽ. Okro he lo okpoghwo o wo ma. Ahe lo agi é hwiŋ okayiekŋe ta la okpoghwo la ó ba o kpo ó ghwo la gi omba ba agi e klo lo.