MoaIbrani 3 - Ohwihwim Olehe

Eyesu a wo la ekekʼpo a gre Omusa

¹ Agimi anáŋ la e lu Ekristi ma nga ba Ahogbrẽ angyiŋ a bzi gimi! Agimi e tne aga ogyugyuŋ eshri ba Eyesu, aŋa angyiŋ Ahogbrẽ a hom ŋa otum okyku o daŋ a dzu anyuŋ-andakʼpo olu ba Ahogbrẽ, okyku obmi ba adlidzi ba agi e tspi okyku lo.

² Okyku eshi aŋa a la a kpo adlidzi ta la Ahogbrẽ la a sla ŋa okyku o daŋ a kpo otum he lo, eka ba Omusa a kpo adlidzi okro otum baŋ odne ba Ahogbrẽ pyeŋ.

³ Are la a mbdzi odne a wo la ekekʼpo a gre odne lo. Nga ekakahelo angyiŋ, Eyesu a mbo a wo la ekekʼpo nzenze a gre Omusa.

⁴ Odneyaŋ a mbo, arekyeŋ angyiŋ a mbdzi lo. Nga Ahogbrẽ angyiŋ a wo are la a mbdzi ekployaŋ a mbo.

⁵ Omusa nga a kpo adlidzi angyiŋ odne ba Ahogbrẽ lo pyeŋ. Aŋa a wo anwyeodne angyiŋ, nga a lu odlo eshri ayakplo ba Ahogbrẽ á ba a lu asheŋayi-asheŋayi.

⁶ Ambo okyku ba Ekristi a wo Anwye adlidzi, ba odne Ahogbrẽ o wo abgo baŋ. Agi e dzu eka ba odne baŋ o wo ba agi e kom oghwo-esõ ma-me la osheshye le, la esõ ekyekyeŋ okyku ekplo ba agi e ka ayi ozhẽ okyku lo.

Odzudum okyku moarehwĩ ba Ahogbrẽ

⁷ Ogbgaodzi ba Ahogbrẽ o lu mi le, O wo bimi e gno enzi ba Ahogbrẽ anye he,

⁸ E shpi esõ eka ba agimi e kpo omba bimi e sle okro ayi ta la Ahogbrẽ ayga mbo, Eka ba agimi e kpo akla omba bimi e mbga ŋa e ka.

⁹ Ahogbrẽ a lu mi le, Akla he lo angyiŋ moadigimi a mbga me. Nga moa a sko ayakplo ba ame e kpo akla okyku eyi ekʼpoenyi a zga akplokyeŋ mbo.

¹⁰ Okyku eka he ame e kpo olom pa la moarehwĩ he lo. Nga ame e nyuŋ mo e lu mi le, Moa a ta akpu ombamba pyeŋ ekployaŋ a mbo ba moa a tne aga, Nga moa a ka ozhẽ me a bmye ondakyeŋ mbo ku-ku.

¹¹ Ame e kpo olom, okyku eka he ame e kʼpi ashum e lu mi le, Moa á ba eshyẽ nga á dzu á dum pa la me ondakyeŋ ku-ku nga mbo!

¹² Agimi anáŋ, agimi e nyuŋ e kpo-kpo okyku o da akyeŋ eshki bimi a dzu la esõ ebi, nga baŋ a tla obmi ba adlidzi a ta, nga baŋ a gba a ngʼba a sku Ahogbrẽ la a wo la esõ ma mbo.

¹³ O wo bimi e klo moa a bile akyeŋ eshki bimi a yi ozhẽ ba odlobi mbo, nga a daŋ a shpi esõ mbo le, o dzu omgbybi ba agimi e kpo e ghwo la egimi elelum, eka ba olum anye ba odlo ba Ahogbrẽ o lu o da gi.

¹⁴ Okyku eshi agi pyeŋ e pu ta la Ekristi, o wo ba agi e kom oyioyi bi la osheshye ba agi e zga esĩ la alo ma-me o tsa amom-abgo.

¹⁵ Odlo ba Ahogbrẽ o lu mi le, O wo bimi e gno enzi ba Ahogbrẽ anye he, E shpi esõ eka ba agimi e kpo Omba ba agimi e sle okro ayi ta la Ahogbrẽ ayga mbo.

¹⁶ Ayi a gno enzi ba Ahogbrẽ a khwo nga a sa a shye eshri ka la ŋa? Adlidzi, moare pyeŋ ba Omusa a se mo obiŋ ba Amasla angyiŋ.

¹⁷ Ahogbrẽ a kpo olom pa la moayi angyiŋ okyku eyi ekʼpoenyi? A kpo olom pa la moarehwĩ la a kpo odlobi lo. Moa la a tsi a ygi obiŋ akla nga a kpu.

¹⁸ Omba ba Ahogbrẽ a kʼpi ashum a lu mi le, Moa á ba eshyẽ á dzu á dum pa la me ondakyeŋ ku-ku nga mbo. A lu odlo he lo eshri ba ayi angyiŋ? A lu odlo lo eshri moa la a shye eshri ka la ŋa angyiŋ.

¹⁹ Agi e ka e bmye ba moa a nyom mo okyku o da mo a gre a yi okro lo okyku eshi moa a bmi ba adlidzi mbo.