MoaIbrani 2 - Ohwihwim Olehe

Oshla Ogagre

¹ Okyku eka he lo angyiŋ o raŋ o gre ba agi e kom osheshye ta la oshpa ba adlidzi ba agi e gno, okyku o da gi e ta ozhẽ akpu mbo.

² Oshpa ba moanwyeadga a shri a di, o tsa ba alo o wo adlidzi angyiŋ. Nga areyaŋ a mbo la a lu lo ma mbo, o mbo le a kpaŋ lo mbo le, a yga ewu la e tse ŋa ma.

³ Agi nga é kpo anyu é ba e gro o wo ba agi e tla e tsi oshla ogagre eka he e ghwo ayi? Adigi-odne ababgo baŋ a zga esĩ a su oshla he lo. Nga moare la a gno osu baŋ he lo moa a tsa gi ba alo o wo adlidzi angyiŋ.

⁴ Nga Ahogbrẽ a sa a kpo ayakplo a ta egŋe mo ozhẽ ba ayakplo ba egbregbre, ta la ayakplo nzenze ba moare a ka lo a bmye mbo. Nga a shri okpogbu ba Ogbgaodzi a shri a da moare eka baŋ a klo.

Andakʼpo ba oshla

⁵ E ka, Ahogbrẽ a da moanwyeadga ekʼpo eshri ba obiŋ hi baŋ a klo o kpo-kpo he lo mbo. Obiŋ hi lo angyiŋ agi e lu odlo eshri lo.

⁶ Ambo moa a lu okrokyeŋ Akpa ba Ahogbrẽ a lu mi le, Arehwĩ a wo eshi angyiŋ, boŋ o sko o zga akplokyeŋ? Arehwĩ a wo eshi angyiŋ, boŋ o la o kpaŋ ŋa?

⁷ Okyku omba fi nga, aŋo o kpo ŋa o da ekʼpo baŋ e siŋ eʼkpo moanwyeadga boŋ. Aŋo nga o shri ekekʼpo ta la anyuanyuŋ la e wo e ba anyuŋ-areŋ o shri o daŋ.

⁸ Nga o daŋ a ri ekʼpo eshri ekployaŋ a mbo. Akpa ba Ahogbrẽ a sa a lu ma Ahogbrẽ a da arehwĩ ekʼpo eshri ekployaŋ a mbo. Ekployaŋ a mbo e wo eshki lo. Ambo ohuhuhi agi e ka arehwĩ a la a ri ekʼpo eshri ekployaŋ a mbo nga mbo.

⁹ Ambo agi e ka Eyesu angyiŋ a la a ri ekʼpo lo! Okyku omba ple moa a da ekʼpo baŋ e siŋ ekʼpo moanwyeadga fi, okyku okro okpoghwo ba Ahogbrẽ a kpu okyku moarehwĩ pyeŋ. Ohuhuhi agi e ka ŋa la a wo anyuŋ-areŋ la ekekʼpo ta la anyuanyuŋ okyku ewu baŋ a kpo okro eku.

¹⁰ O wo shasha angyiŋ okro ba Ahogbrẽ la a kpo ekployaŋ a mbo nga a la a kpaŋ lo. Aŋa a kpo eka he okyku o da Eyesu a bli shasha okro ba ewu lo, okyku o da moare nzenze a pu ekekʼpo baŋ he lo ka la ŋa. Okyku eshi Eyesu angyiŋ a wo are la a tsa mo ozhẽ ba oshla he lo.

¹¹ A ndza odlobi moare pyeŋ a sku mo. Nga aŋa pa la moare baŋ a ndza odlobi mo he lo, adimo a wo akyakyeŋ angyiŋ ka la ŋa. Okyku eka he lo angyiŋ o wo ekplo ba anzi angyiŋ ta la Eyesu baŋ a bzi moahi lo ma moanáŋ mbo.

¹² Aŋa a lu mi le, Aŋo Ahogbrẽ, ame é lu odlo eshri boŋ é da moanime, Nga ame é fu abmo ba ohlueshko é ygi ŋo egi ayi ba eshki lo pyeŋ.

¹³ A sa a lu mi le, Ame é vaŋ Ahogbrẽ. Nga a lu mi le, Aŋo o ka me pa la moanwye ba Ahogbrẽ a shri a da me.

¹⁴ Eka ba alo o wo moarehwĩ baŋ a bzi mo ma moanwye baŋ, moa a wo moarehwĩ ba ebyi ta la amanzhli angyiŋ. Eyesu a mbo a zhiŋ a dzu eka mo, nga a pu pa la mo edgu odzudzu ba arehwĩ. A kpo eka he lo okyku o daŋ a bga Eshitaŋ okro ba eku baŋ a kpu. Eshitaŋ he lo e wo ekʼpo ba eku ma.

¹⁵ Ozhẽ he lo angyiŋ Eyesu a shri odzudum a da moare la a wo moawaghrẽ okyku eyli ba eku odzudzu mo pyeŋ.

¹⁶ Alo o wo zheŋ baŋ a kpo a ghwo la moanwyeadga angyiŋ mbo, ambo eka ba odlo ba Ahogbrẽ o lu, alo o lu mi le, Aŋa a kpo a ghwo la moanwye ba Ebrahim angyiŋ.

¹⁷ O dzu omgbybi angyiŋ baŋ a sko edgu odzudzu ba moanáŋ ozhẽyaŋ a mbo, okyku o daŋ a dzu andakʼpo olu ba Ahogbrẽ la a wo adlidzi, nga a ka ayiekŋe ibu ba otum baŋ egi ayi ba Ahogbrẽ, okyku o da Ahogbrẽ a kyu moarehwĩ abgo odlobi moa a la a kpo.

¹⁸ Ohuhuhi nga a kpo a gbu baŋ a kpo a ghwo la moa ba ombambga o hwiŋ mo, okyku eshi ombambga lo o hwiŋ ŋa o ka nga a sa a kpo ewu a ka.