MoaIbrani 11 - Ohwihwim Olehe

Obmi ba Adlidzi

¹ Obmi ba adlidzi o wo ozgaesõ zhezheŋ ta la ayakplo ba agi e la e ka ayi ozhẽ okyku lo. Alo o wo obmi zhezheŋ pa la ayakplo ba agi e ka lo e ka mbo.

² Moarehwĩ ba ogbyi, Ahogbrẽ a bmi pa la mo okyku obmi ba adlidzi ba moa a wo la alo ma angyiŋ.

³ Okyku obmi ba adlidzi bi angyiŋ, agi e ka e bmye ba Ahogbrẽ angyiŋ a kpo obiŋ hi ozhẽ ba odlo baŋ. Okyku okũ he lo, moa a kpo ayakplo ba moa a ka lo a gbu, la ayakplo ba moa a ka lo a gbu mbo.

⁴ Okyku obmi ba adlidzi angyiŋ, Ahabila a shri oshriondba la o wo odzi o gre oshriondba ba Akayinu, a shri a da Ahogbrẽ. Ahogbrẽ a bmi ka la ŋa nga a sko ŋa a zga are ba odlodzi okyku obmi ba adlidzi baŋ angyiŋ. Ahogbrẽ ababgo baŋ a bmi ta la ayakplo baŋ a shri a ndba ŋa. Ahabila a sheŋ a kpu ambo aŋa a yi a la a lu odlo ka la gi ozhẽ ba obmi ba adlidzi baŋ he lo.

⁵ Obmi ba adlidzi angyiŋ o nyom Enoki okpu-kpu. Ambo Ahogbrẽ angyiŋ a sko ŋa. Arekyeŋ nga a kpo a gbu baŋ a yi okro baŋ a wo ma mbo okyku eshi Ahogbrẽ a sko ŋa a shri a gre. Odlo ba Ahogbrẽ o lu ma okyku ba Enoki a kpo ayakplo la a raŋ Ahogbrẽ esõ angyiŋ, Ahogbrẽ a sko ŋa.

⁶ Are la a wo la obmi ba adlidzi ma mbo a kpo a gbu baŋ a raŋ Ahogbrẽ esõ mbo. Okyku eshi, are la a la a ba okro ba Ahogbrẽ, o dzu omgbybi baŋ a bmi ba adlidzi ba Ahogbrẽ a wo ma, nga baŋ a la a shri egbre a shri a da moare la a klo ŋa.

⁷ Obmi ba adlidzi angyiŋ o da Onuhu a ngli atuŋ a gno oshĩ ba Ahogbrẽ eshri ayakplo la a wo efĩ, ayakplo he lo á kpo omba la o yi o wo egi ayi. A kpaŋ odlo lo, okyku eka he lo a sẽ amgblami, nga aŋa pa la moa-odne baŋ moa a gro okyku lo angyiŋ. Ozhẽ he lo angyiŋ aŋa a sõ moarehwĩ ba obiŋ hi pyeŋ ombgu. Aŋa nga a hwiŋ odlodzi la o zgi okro ba Ahogbrẽ ozhẽ ba obmi ba adlidzi angyiŋ.

⁸ Obmi ba adlidzi angyiŋ o da Ebrahim a bmi ta la obzi ba Ahogbrẽ a bzi ŋa omba ba Ahogbrẽ a bzi ŋa okyku o daŋ a yi obiŋ ba Ahogbrẽ a hwim baŋ á shri á daŋ. A kso a sku obiŋ baŋ ambo a ka a yi okro baŋ á ba a yi mbo ku-ku.

⁹ Ibu ba obmi ba adlidzi angyiŋ a dzu obiŋ ba Ahogbrẽ a hwim ka la ŋa okyku lo. Alo o wo eka baŋ a wo azhẽ angyiŋ. Nga aŋa ta la Eshaku, ta la Eyakubu moa a dzu ábro angyiŋ. Ozhẽ okyekyeŋ angyiŋ Ahogbrẽ a hwim pa la moahi lo pyeŋ.

¹⁰ Okyku eshi Ebrahim a la a dzu a bli osku ba Ahogbrẽ a mbga nga a mbdzi. Osku he lo ó kypi nga mbo.

¹¹ Obmi ba adlidzi angyiŋ o da Ebrahim a dzu ada, ambo omba he lo a sheŋ a tsoŋ nzenze, nga Asaratu a dga eklu. Ambo Ebrahim a la a bmi ba adlidzi ba Ahogbrẽ á ba a bli ohwihwim baŋ a hwim ka la ŋa.

¹² Aŋa a sheŋ a kpu bgu, ambo okro alom he akyakyeŋ embre moanwye e ba. Moanwye lo a wo nzenze eka ba eyi enzo la e wo ahrẽ, ta la endase ba moa a tsi lo a khwo mbo la e wo akaŋ anyuŋ-ondzu.

¹³ Moarehwĩ he lo pyeŋ a kpu la obmi ba adlidzi angyiŋ. Moa a yga ayakplo ba Ahogbrẽ a hwim a zga ma pa la mo he lo mbo. Ambo la ogyugyuŋ nga moa a ka lo nga moa a kpo ovye okyku lo. Okyku eka he moa a bmi zhezheŋ ba moa a wo moazhẽ pa la moa la a som ayi angyiŋ obiŋ hi.

¹⁴ Moa la a kpo edgu ayakplo he lo moa a lu zhezheŋ a lu ma moa a dzu a bli obiŋ ba obgo mo.

¹⁵ Moa a da aga mo a bla a gre obiŋ ba moa a dzu lo a zga mbo ku-ku. Moa a kpo eka he angyiŋ e mbi, moa á ba a wo la ozhẽ ma ba moa a bmre a yi obiŋ mi lo.

¹⁶ Ambo moa a klo obiŋ la o wo odzi o gre obiŋ hi lo angyiŋ a sku. Ongyeŋ angyiŋ o wo obiŋ lo. Okyku eka he alo o wo Ahogbrẽ akplokyeŋ ba anzi angyiŋ ba moare he lo a bzi ŋa ma Ahogbrẽ mo mbo. Okyku eshi a sheŋ a kpo osku a zga ma okyku mo bgu.

¹⁷ Obmi ba adlidzi angyiŋ o da Ebrahim a bmi okyku o shri anwye baŋ Eshaku, o shri o ndba Ahogbrẽ omba ba Ahogbrẽ a mbga ŋa a ka. Ahogbrẽ a hwim ohwihwim lo ta la Ebrahim angyiŋ, ekakahelo a mbo Ebrahim a zga esõ ekyekyeŋ angyiŋ baŋ á shri anwye baŋ akyakyeŋ lo á shri á ndba Ahogbrẽ.

¹⁸ Ahogbrẽ a nyuŋ ŋa a lu mi le, Aŋo ó hwiŋ moanwye nzenze ozhẽ ba Eshaku angyiŋ.

¹⁹ Ebrahim a yi zhezheŋ ba Ahogbrẽ a kpo a gbu baŋ a sa a kso Eshaku eku. Eshri odlo he lo Ebrahim a bla Eshaku a yga abgo ba eku.

²⁰ Obmi ba adlidzi angyiŋ o da Eshaku a hwim ta la Eyakubu ta la Esuwa, ba moa á ba a hwiŋ owlama.

²¹ Obmi ba adlidzi angyiŋ o da Eyakubu a fa anyuadzi a ygi moanwye ba Oyusufu a khwo ayga nga a kpu. A vaŋ opi odzi-oklo baŋ nga a hlu Ahogbrẽ eshko.

²² Obmi ba adlidzi angyiŋ o da Oyusufu a lu odlo eka ba moarehwĩ ba Esrayila á ba a kso á sku obiŋ ba Amasla. A lu lo omba baŋ á ba a kpu. Nga a sa a tsa mo eka ba moa á ba a kpo ta la okom baŋ.

²³ Obmi ba adlidzi angyiŋ o da moadaŋ Omusa a shri ŋa a ghre okyku ehwa etra ambla ba moa a mbre ŋa. A wo anwye adzadzi angyiŋ pa la mo, okyku eka he alo o kpo mo ewu ba moa a pre odaŋ ba anyuŋ-areŋ mbo.

²⁴ Obmi ba adlidzi angyiŋ o da Omusa a tla ba moa a bzi ŋa ma anwye ba anwye-alashle ba Efirauna ambla baŋ a bmye ayi a khwo.

²⁵ Aŋa a sla okpoewu pa la moarehwĩ ba Ahogbrẽ o sku baŋ a gno oraŋ odzudzu ba odlobi okyku omba ple sha.

²⁶ A ka tki, alo o wo owlama o gre nzenze baŋ a kpo ewu okyku Emisiya o sku baŋ a dzu a gno edgu oraŋyaŋ a mbo la o wo obiŋ ba Amasla, okyku eshi a sko aga baŋ a zga egbre la e wo egi ayi angyiŋ.

²⁷ Obmi ba adlidzi angyiŋ o da Omusa a sko olom ba anyuŋ-areŋ lo a da lo o dzu ŋa akplokyeŋ mbo, nga a kso a sku obiŋ ba Amasla lo. Aŋa á bla á yi lo nga mbo, alo o wo eka baŋ a ka Ahogbrẽ ba moa a la a ka ŋa mbo.

²⁸ Obmi ba adlidzi angyiŋ o daŋ a zga okũ ba Apaska, nga a da mo a shri amanzhli a shri a hre ayizhẽ, okyku o da Anwyeadga ba Eku lo a bga moanwye ba ori ba moaEsrayila mbo.

²⁹ Obmi ba adlidzi angyiŋ o da moanwye ba Esrayila a bmyi anyuŋ-ondzu ba Obme endase emom, ambo omba ba moanwyeakyuŋ ba Amasla a klo o mbili mo ami a mbgi mo pyeŋ.

³⁰ Obmi ba adlidzi angyiŋ o da ogli ba Ejeriko o kypi o ygi obiŋ pyeŋ ambla ba moarehwĩ ba Esrayila a dzi a ta lo a kpaŋ okyku etum efoha.

³¹ Obmi ba adlidzi angyiŋ o nyom mo a bga Arahab ashe eshra otsotse pa la moare la a tla Ahogbrẽ, okyku eshi a yga moa la a ba okyku o kpre okro o ka, la ovyevye.

³² Ame e lu e ta ma nganga? Omba o ka o ra pa la me ba ame e lu akplokyeŋ eshri ba Egidiyo ta la Abaraku, ta la Asamsõ, ta la Ejefta, ta la Adawuda, ta la Asamuila, pa la moarehwĩ ba Ahogbrẽ a hom mo otum.

³³ Okro ba obmi ba adlidzi angyiŋ moa a ta eko a ri ebiŋ lo pyeŋ. Moa a kpo ayakplo la a wo shasha okyku eka he moa a hwiŋ ekplo ba Ahogbrẽ a hwim a zga ma okyku mo. Moa a bʼbu anyu ba émbdze a mbo.

³⁴ Moa a rum ovo la o shum o gre eshri. Nga moa a gro abgo ba akõ ba ebga. Moa e mbi a wo oshye ma mbo, ambo moa a hwiŋ oshye. Moa a gre abgo okro ba o ta eko nga moa a la a ta eko a la a ri moafpu mo la a wo moazhẽ.

³⁵ Okro ba obmi ba adlidzi angyiŋ, moashe moa a yga moarehwĩ mo la a kpu, moa ba moa a kso mo eku. Moabze a kpu la ewu nzenze, nga moa a tla odzudum okyku o da mo a hwiŋ odzudzu la o wo odzadzi o gre odzudzu ba ohuhuhi.

³⁶ Moa a lu ega a ygi moabze nga moa a taŋ mo andzu. Nga moa a ta moabze aslika nga moa a shri mo a ta aku.

³⁷ Moa tra moabze ézhim, nga moa a ngʼba mo egʼba aha, nga moa a bga mo la akõ. Moa a la a dzi la aknye ba akpekpa ba ékylu ta la akpekpa ba ébme. Moa a wo la ekŋe. Moa a kpo mo ewu nga moa a gbga mo egʼba.

³⁸ Moa a raŋ la obiŋ hi mbo. Moa a gre akla ta la akukũ eka moa la a som ayi eko, nga moa a la a ghre ehwla ta la anzhe.

³⁹ Obmi ba adlidzi moare he lo o si mo eshri ongyeŋ o gre eshri! Ekakahelo a mbo, moa a ka a yga ekplo ba Ahogbrẽ a hwim a zga ma okyku mo a wo mbo,

⁴⁰ okyku eshi Ahogbrẽ a hwim ekplo la e wo edzi e gre eka he angyiŋ a zga ma okyku gi. Ahogbrẽ a zga esõ ba moa á ba a bli zhezheŋ ka la gi otsotse angyiŋ.