MoAfisu 6 - Ohwihwim Olehe

Moanwye pa la moadimo

¹ Agimi anwye, o dzu omgbybi angyiŋ ba agimi la e lu Ekristi ma e fa olbi e da moadigimi, okyku eshi alo o wo ekplo la e raŋ e gre angyiŋ.

² Odaŋ ba oriori ba moa a shri ohwihwim a ta ma, o lu mi le, Aŋo o fa olbi o da adoŋ ta la anoŋ.

³ Okyku o da ekployaŋ a mbo e dzu pyapyaŋ ka la ŋo, nga okyku o doŋ o ri edzi obiŋ hi.

⁴ Agimi moadimoanwye, agimi e la e kpo ayakplo la a da moanwye bimi a kpo olom mbo. Ambo e nye mo la edgu odzudzu ta la onyenye ba Ekristi angyiŋ.

Moawaghrẽ ta la moadimo-odne

⁵ Agimi moawaghrẽ, agimi e fa olbi e da moadigimi-odne ba obiŋ hi la eyiyli. Agimi e kpo lo la adlidzi, e kpo eka ba agimi e kpo otum okyku Ekristi angyiŋ.

⁶ E kpo ohe lo omba ba moadigimi-odne a wo ka la gimi sha angyiŋ okyku o da mo a tsom gimi mbo. Ambo o raŋ o gre ba agimi e kpo ekployaŋ a mbo ba Ahogbrẽ a klo la esõ ekyekyeŋ. E kpo ekployaŋ a mbo eka moawaghrẽ ba Ekristi.

⁷ Agimi e kpo otum bimi eka moawaghrẽ la anyu eŋo eka ba agimi e kpo lo okyku Adigi-odne angyiŋ, ambo e kpo lo eka bimi e kpo lo okyku moarehwĩ angyiŋ mbo.

⁸ Agimi e tne aga e ka, okyku eshi Adigi-odne á shri egbre á shri á da areyaŋ a mbo. A shri á da awaghrẽ ta la are la a wo awaghrẽ mbo a mbo, okyku otum odzadzi baŋ a la a kpo.

⁹ Agimi adimo-odne, agimi a mbo e kpo ekakahelo angyiŋ pa la moawaghrẽ bimi nga e suŋ mo egʼba mbo. Agimi nga e ka e bmye ba agimi ta la moawaghrẽ he lo, ba Adigimi a wo akyakyeŋ angyiŋ Ongyeŋ. Aŋa a la a sko moare a zga okyekyeŋ angyiŋ.

Anzho eko pyeŋ ba Ahogbrẽ

¹⁰ Ekplo ba amom-abgo ekpyemgbyeŋ, o raŋ o gre ba agimi e sko oshye bimi e zga okŋeobga ba Adigi-odne okro ba ekʼpo egagre baŋ.

¹¹ Agimi e ygi anzho eko pyeŋ ba Ahogbrẽ a shri a da gimi, okyku o da gimi e kpo e gbu nga e tspi osheshye nga e tla edgu eda ebi ba obile ba Eshitaŋ.

¹² Okyku eshi agi e la e ta eko pa la moarehwĩ angyiŋ mbo, ambo agi e la e ta eko ta la ekʼpo ba egbga ebi la e wo ahrẽ angyiŋ. Moa a wo moa la a ri ekʼpo, ta la ekʼpo nzenze la e wo ahrẽ, ta la egbga ebi la e la e ri ekʼpo obiŋ hi la o hwĩ evbu he lo.

¹³ Okyku eka he, agimi e tslo anzho eko ba Ahogbrẽ ohuhuhi! Okyku o da gimi e kpo e gbu nga e tspi gaŋ ta la afpu gimi lo omba ba ewu e kso. Ambla ba agimi e ta eko e khwo le, agimi é zhiŋ é tspi gaŋ.

¹⁴ Okyku eka he agimi e tspi nga e dzu e bli a mo. E da adlidzi angyiŋ a dzu ashye akpa bimi e ta osĩ, nga e da odlodzi angyiŋ o dzu ombyli ba egi ayi bimi.

¹⁵ Nga agimi e nyuŋ e dzu okyku o su Oshpaodzadzi ba opyapyaŋ eka ba agimi e ghwo akpadga adga e la e dzi la alo.

¹⁶ Ombayaŋ a mbo e shri obmi ba adlidzi eka ba ombyli. La alo angyiŋ agimi é ba e kpo é gbu é gro abyi ba ovo ba Eshitaŋ e la e ta gimi.

¹⁷ Nga e yga oshla eka ba alo o wo etka ba ahwre, nga e yga odlo ba Ahogbrẽ. Odlo he lo angyiŋ o wo akõ ba Ogbgaodzi o shri o da gimi.

¹⁸ Agimi e kpo ohe lo pyeŋ ibu ba olu, nga e vẽ okyku okpoghwo ba Ahogbrẽ. E fa olu ombamba pyeŋ eka ba Ogbgaodzi o tsa gimi. Okyku eka he, e dzu e kʼpu, nga e da esõ e zgi e sku lo mbo, nga e fa olu okyku moarehwĩ ba Ahogbrẽ pyeŋ.

¹⁹ Nga e fa olu a mbo okyku me okyku o da Ahogbrẽ a tsa me, okyku omba ba ame e nyum oshpa baŋ la osheshye nga okyku o da moare a yi eshyẽ ba Oshpaodzadzi baŋ omba ba ame e klo o lu odlo.

²⁰ Ame e wo oprusuna ohuhuhi okyku ba ame e wo arelatspi okyku Oshpaodzadzi he lo angyiŋ. Ame e vẽ gimi okyku o da gimi e fa olu okyku o da me e hwiŋ oshye ba o nyum oshpa he lo la osheshye eka ba alo o raŋ o gre ba ame e nyum oshpa lo.

Oshko ba amom-abgo

²¹ Etikiku la a wo anigi ba adlidzi, aŋa nga a wo awaghrẽ ba adlidzi ibu otum ba Adigi-odne. Aŋa á shri oshpa ekployaŋ a mbo eshri me á shri á da gimi okyku o da gimi e yi eka ba ame e wo otum he lo e la e kpo.

²² Okyku eka he angyiŋ ame e hom ŋa otum okro bimi, okyku o lu o da gimi eka bi pyeŋ e la e wo otum e la e kpo, nga okyku o da gimi e dzu la oshye-esõ.

²³ Ahogbrẽ Adigi, ta la Adigi-odne Eyesu Ekristi, moa a shri opyapyaŋ ta la oklo ta la obmi ba adlidzi a shri a da moanáŋ pyeŋ.

²⁴ Okpoghwo ba Ahogbrẽ o dzu pa la moare pyeŋ la a klo Adigi-odne Eyesu Ekristi la oklo la o khwo nga mbo.