MoaEgalasiya 3 - Ohwihwim Olehe

Odaŋ le obmi ba adlidzi

¹ Agimi adro ba Egalasiya! Ayi a bile gimi? Egi ayi bimi owowre ba eku ba Eyesu Ekristi egŋe aki o wo ma zheŋ!

² E tno me ma la akplokyekyeŋ sha. Agimi e yga Ogbgaodzi ba Ahogbrẽ okyku o kpaŋ odaŋ angyiŋ le, okyku o gno nga o bmi ba adlidzi ta la oshpaodzadzi lo?

³ Okyku eshi agimi e wo moadro eka he! Agimi e zga esĩ la Ogbgaodzi ba Ahogbrẽ angyiŋ. Agimi e klo o mom o klu la oshye egʼba bimi angyiŋ?

⁴ Oyioyi ba ayakplo bimi e wo la alo ma pyeŋ, o wo akplokyeŋ angyiŋ ka la gimi mbo? Adlidzi angyiŋ, alo o wo akplokyeŋ angyiŋ!

⁵ Omba ba Ahogbrẽ a shri Ogbgaodzi a shri a da gimi a khwo nga baŋ a la a kpo ayakplo ba egbregbre ka la gimi, aŋa a la a kpo lo okyku ba agimi e la e kpaŋ odaŋ angyiŋ? O mbo le, okyku bimi e la e gno nga e bmi ba adlidzi ta la Oshpaodzadzi angyiŋ?

⁶ Alo o wo eka ba odlo ba Ahogbrẽ o lu eshri ba Ebrahim angyiŋ. O lu mi le, Aŋa a bmi ba adlidzi ta la Ahogbrẽ, nga okyku obmi ba adlidzi baŋ Ahogbrẽ a yga ŋa eka are ba odlodzi angyiŋ.

⁷ Okyku eka he, o raŋ o gre bimi e ka e bmye ba moare la a wo la obmi ba adlidzi angyiŋ a wo moanwye ba adlidzi ba Ebrahim.

⁸ Odlo ba Ahogbrẽ o sheŋ o ka o tspi ba Ahogbrẽ á ba a shri opyapyaŋ á zga agʼbaha baŋ pa la moa la a wo moaEyahuda mbo ozhẽ ba obmi ba adlidzi. Okyku eka he angyiŋ odlo ba Ahogbrẽ o tsa Ebrahim Oshpaodzadzi o sheŋ o ta. O lu mi le, Okro boŋ, Ahogbrẽ á shri owlama á shri á da moarehwi ba obiŋ hi pyeŋ.

⁹ Ebrahim a bmi ba adlidzi. Okyku eka he moa a shri owlama a shri a daŋ. Okyku eka he nga, areyaŋ a mbo la a bmi ba adlidzi á hwiŋ owlama eka he lo.

¹⁰ Moare la a sko oshye mo a zga ibu okpaŋodaŋ, moa a wo abgo ombgu! Okyku eshi odlo ba Ahogbrẽ o lu mi le, Areyaŋ a mbo la a la a kpaŋ ekployaŋ a mbo ba moa a ta akpa ba odaŋ ombamba mbo le, aŋa a wo abgo ba ombgu angyiŋ.

¹¹ Ohuhuhi o wo zheŋ ba opyapyaŋ o gre o ba agʼbaha ba arekyeŋ ta la Ahogbrẽ ozhẽ ba odaŋ mbo. Okyku eshi odlo ba Ahogbrẽ o lu mi le, Are ba opyapyaŋ o gre o ba agʼbaha baŋ ta la Ahogbrẽ ozhẽ obmi ba adlidzi angyiŋ á gro.

¹² Ambo odaŋ o sko oshye o zga obmi ba adlidzi angyiŋ mbo. Odlo ba Ahogbrẽ o lu mi le, Areyaŋ a mbo la a kpaŋ odaŋ le, á sko oshye baŋ pyeŋ á zga ma angyiŋ.

¹³ Ambo Ekristi a sko ogbukyu bi, nga ozhẽ he lo angyiŋ a shla gi abgo ba ogbukyu ba odaŋ o shri o ba. Odlo ba Ahogbrẽ o sa o lu mi le, Areyaŋ a mbo moa a gŋe ŋa egŋe ki, a wo are ba moa a ta ogbukyu a daŋ angyiŋ.

¹⁴ Ekristi a kpo eka he okyku o da moa la a wo moaEyahuda mbo a mbo a hwiŋ owlama ba Ahogbrẽ a hwim ta la Ebrahim ozhẽ ba Ekristi Eyesu, okyku o da gi e hwiŋ Ogbgaodzi ba Ahogbrẽ a hwim ozhẽ ba obmi ba adlidzi.

Odaŋ ta la ohwihwim

¹⁵ Agimi anáŋ, ame é ta egŋe la ayakplo ba agimi e sheŋ e yi lo. Omba ba moarehwi aha a bmi ta la akplokyeŋ nga ba moa a hwim lo a klu, arekyeŋ a kpo a gbu baŋ a ba a ngla lo o mbo le baŋ a ba a ta akplokyeŋ ma mbo.

¹⁶ E ka, Ahogbrẽ a hwim ta la Ebrahim ta la anwye baŋ. O dzu, Ta la moanwye baŋ angyiŋ mbo, alo o dzu moarehwi nzenze mbo. Ambo o lu mi le, Ta la anwye boŋ, alo o dzu are akyakyeŋ, aŋa angyiŋ a wo Ekristi.

¹⁷ Ame e sko lo e zga eka he lo angyiŋ. Ahogbrẽ a hwim nga o wo zhezheŋ angyiŋ baŋ á bli lo. Odaŋ la o ba ambla ba eyi endgaenyi la eyi ekʼpoetra, o kpo o gbu ba alo o bga odlo moa a hwim a klu lo nga ba alo o bga ohwihwim ba Ahogbrẽ mbo.

¹⁸ O wo ba odaŋ angyiŋ o wo esĩ ba ofaodi ba Ahogbrẽ le, ohwihwim baŋ o wo ba ototno angyiŋ. Ekayaŋ a mbo, Ahogbrẽ a shri ohe lo a da Ebrahim okyku eshi a sheŋ a hwim ka la ŋa okyku lo.

¹⁹ Odaŋ lo, moa a shri lo a di okyku eshi a mo? Moa a ta lo ma okyku o tsa ekplo la e wo la akpu. O wo okyku odzuma ma-me o tsa omba ba anwye ba Ebrahim á ba a ba. Moa a hwim ohwihwim lo ta la anwye he lo angyiŋ. Moanwyeadga ba Ahogbrẽ angyiŋ a shri odaŋ lo a shri a ba. Arekyeŋ nga a tspi agʼbaha mo pa la moarehwi.

²⁰ O wo owlama mbo ba arekyeŋ la a tspi agʼbaha a wo ma o wo ba alo o wo ta la arekyakyeŋ sha. Ahogbrẽ nga a wo akyakyeŋ angyiŋ.

Okũ ba odaŋ

²¹ Alo o wo eka ba odaŋ o kla ohwihwim ba Ahogbrẽ angyiŋ? O mbo, o wo eka he angyiŋ mbo! O wo ba moa a shri odaŋ a shri a di okyku o da moare a hwiŋ eso le, o dzu eka ba opyapyaŋ o kpo o gbu ba alo o gre o ba agʼbaha arehwi ta la Ahogbrẽ ozhẽ ba odaŋ.

²² Ambo odlo ba Ahogbrẽ o lu mi ma obiŋ hi pyeŋ o wo abgo ba ekʼpo ba odlobi angyiŋ, okyku o da moa la a bmi ba adlidzi, a hwiŋ egbre ba moa a hwim lo ozhẽ ba obmi ba adlidzi ta la Eyesu Ekristi.

²³ Omba ba obmi ba adlidzi o ba a wo mbo, odaŋ lo o klu gi aku ma-me o gbu omba ba moa a tsa gi obmi ba adlidzi.

²⁴ Okyku eka he, odaŋ angyiŋ o la o kʼpu gi, okyku o dzu eka ba are la a nye gi o tsa ba Ekristi a ba, okyku o da opyapyaŋ o gre o ba agʼbaha bi ta la Ahogbrẽ ozhẽ ba obmi ba adlidzi sha.

²⁵ Ohuhuhi ba alo o wo omba ba obmi ba adlidzi a mo he, are la a nye lo a wo ekʼpo ka la gi nga mbo.

²⁶ Ozhẽ ba obmi ba adlidzi angyiŋ, agimi pyeŋ e dzu moanwye ba Ahogbrẽ ozhẽ ba okŋeobga ta la Ekristi Eyesu.

²⁷ Areyaŋ a mbo ba moa a kpo ŋa abaptisma la okŋeobga ta la Ekristi, moa a sko edgu eda ba Ekristi angyiŋ a mo.

²⁸ Okyku eka he egʼbakyeŋ e wo agʼbaha ba moaEyahuda pa la moa la a wo moaEyahuda mbo mbo, nga egʼbakyeŋ e wo agʼbaha moawaghrẽ pa la moa la a wo la odzudum mbo. Egʼbakyeŋ e wo agʼbaha moarealom pa la moashe mbo. Agimi e wo okyekyeŋ angyiŋ okŋeobga ta la Ekristi Eyesu.

²⁹ O wo bimi e wo moanwye ba Ekristi angyiŋ le, agimi e wo moanwye ba Ebrahim angyiŋ. Nga agimi é hwiŋ ekplo ba Ahogbrẽ a hwim a zga ma.