MoaEfilibi 1 - Ohwihwim Olehe

¹ Akpa he lo a zgi abgo Oblus ta la Etimoti, moawaghrẽ ba Ekristi Eyesu. Alo a wo okyku moarehwĩ la a lu Ahogbrẽ ma pyeŋ la a dzu osku ba Efilibi, moa la a bmi ba adlidzi ta la Ekristi Eyesu, pa la moandakʼpo ba Eklisiya, pa la moa la a kpo a ghwo la mo.

² Ahogbrẽ la a wo Adigi, ta la Adigi-odne Eyesu Ekristi, moa a shri okpoghwo ta la opyapyaŋ a shri a da gimi.

Olu Oblus okyku moa la a tsi akpa baŋ

³ Ombayaŋ a mbo ba ame e tne aga bimi, ame e vye la Ahogbrẽ me okyku gimi pyeŋ.

⁴ Nga ombayaŋ a mbo ba ame e fa olu okyku gimi, ame e fa lo la ovyevye,

⁵ okyku eka ba agimi e la e kpo e ghwo la me okro ba onyum Oshpaodzadzi a zga okũ oriori a bli anye he.

⁶ Okyku eka he ame e nyuŋ e ka zhezheŋ okyku ohe lo, nga ba Ahogbrẽ la a zga esĩ otum odzadzi he lo esõ bimi, á kpo lo ayi-oyioyi ma-me o tsa onda ba alo o khwo, Olum onda ba Ekristi Eyesu.

⁷ Agimi e wo esõ me ombamba pyeŋ! Okyku eka he o wo odzi ba ame e sko gimi esõ me ozhẽ he angyiŋ. Okyku eshi agimi e hwiŋ ogʼba lo ohwihwiŋ ba Ahogbrẽ a shri a da me he lo, omba ba ame e lom aku, nga omba ba moa a kyu me abgo angyiŋ okyku o da me e kpaŋ nga e shĩ Oshpaodzadzi lo.

⁸ Ahogbrẽ a yi ba ame e la e lu adlidzi angyiŋ omba ba ame e lu ba oklo ogyugyuŋ ba ame e wo la alo ma o zgi esõ ba Ekristi Eyesu angyiŋ ababgo baŋ.

⁹ Olu me okyku gimi angyiŋ o wo ohe lo. Ame e la e fa olu okyku o da oklo bimi o ta ma-ma ombayaŋ a mbo, ta la oyioyi ba adlidzi ta la okaobmye zhezheŋ,

¹⁰ okyku o da gimi e kpo e gbu nga e sla ekplo la e wo edzi e gre pyeŋ. Nga onda Olum ba Ekristi, ayakplo ba eshre o mbo le ombgukyeŋ ó wo eshri bimi nga mbo.

¹¹ Odzudzu bimi nga ó bli la edgu eda ba adlidzi ba Eyesu Ekristi sha ababgo baŋ a kpo a kpo a gbu baŋ a shri a da gimi, okyku ekekʼpo ta la ohlue-shko ba Ahogbrẽ.

Odzudzu okyku Ekristi

¹² Agimi anáŋ, ame e klo ba agimi e yi ba ayakplo la a kpo pa la me a kpo a ghwo la ovrevre Oshpaodzadzi.

¹³ Okyku eka he nga, moare la kʼpu odne ba areŋ pa la moare la a wo ahe pyeŋ, a yi ba ame e lom aku okyku ba ame e wo awaghrẽ ba Ekristi angyiŋ.

¹⁴ Olom aku ba ame e lom aku o shri obibmi ta la Adigi-odne o shri o da moanáŋ o ta ma-ma. Okyku eka he nga moa a hlu la oghwo-esõ a ta ma-ma omba-mba pyeŋ okro ba onyumoshpa ba odlo ba Ahogbrẽ.

¹⁵ Ambo moabze moa a la a nyum oshpa ba Ekristi okyku ba moa a kpo efpu nga a kla odlo angyiŋ. Ambo moabze a la a nyum oshpa baŋ la esõ ekyle angyiŋ.

¹⁶ Moahi lo moa a la a kpo lo la esõ ba oklo angyiŋ, okyku eshi moa a yi ba Aho-gbrẽ a shri otum ba okpaŋ Oshpaodzadzi lo a shri a da me.

¹⁷ Moahwõ nga moa a la a nyum oshpa Ekristi la adlidzi mbo, ambo la aga ba ovrevre ba okloeshri angyiŋ. Moa a ka eka ba moa a ta me ewu ma angyiŋ omba ba ame e wo aku.

¹⁸ Alo o wo akplokyeŋ mbo! Ame e wo la ovye eshri lo. Okyku eshi moa a nyum oshpa Ekristi ozhẽyaŋ a mbo ba alo o kpo o gbu. O zgi ozhẽ obi ta la ozhẽ odzi. Ovye me nga ó ta ma ó ta-ta,

¹⁹ okyku eshi ame e yi ba ame é hwiŋ odzudum okro ba olu bimi ta la okpoghwo la o zgi okro ba Ogbgaodzi ba Eyesu Ekristi.

²⁰ Ambo ekhwo me ta la okayiozhẽ me o wo aga ba ame é ba e sheŋ é nye otum me mbo. Ambo ombayaŋ a mbo ta la ohuhuhi a mbo, ame é tspi la oshye-esõ nzenze, okyku o da me la oshye me pyeŋ e shri ohlueshko e shri e kom Ekristi, okro odzudzu o mbo le okpukpu a mbo.

²¹ Esõ e wo eshi? Okro me alo e wo okyku Ekristi angyiŋ! Okyku eka he eku é wo owlama angyiŋ.

²² Ambo o wo ba odzuma ó ba o wo ozhẽ ba ame e kpo otum la o wo la owlama la o gre eka he le, ame e yi ososlakyeŋ eshki lo mbo.

²³ Ogʼba o so me ayi ototno. Ame e klo nzenze okyku o kso o sku edgu odzudzu he nga e yi e dzu ta la Ekristi. Ohe lo angyiŋ e wo ekplo la e raŋ e gre.

²⁴ Ambo okyku owlama bimi, o raŋ o gre ba ame e dzu ma la ayi.

²⁵ Ame e yi ohe lo zhe-zheŋ, okyku eka he ame e yi ba ame é ba e dzu ka la gimi. Ame é dzu ka la gimi pyeŋ okyku o kpo otum okyku o da gimi e vre e yi e ta ma-ma, nga okyku o da ovye bimi o ta ma-ma, obmi ba adlidzi lo.

²⁶ Okyku o da gimi e wo la ekplokyeŋ ba o hwile egʼba o ta ma okyku lo ibu ba odzudzu bimi ta la Ekristi Eyesu okyku me, omba ba ame e wo ka la gimi.

²⁷ Ohuhuhi nga ekplo la e raŋ e gre, o raŋ o gre ba edgu odzudzu bimi o wo eka ba edgu odzudzu ba Oshpaodzadzi ba Ekristi o klo. Okyku o wo ba ame e kpo e gbu e ba e ka gimi mbo a mbo, ame e klo o gno eka bimi e tspi gaŋ ta la ayaŋ akyakyeŋ, nga e la e ta eko otsotse la aga akyakyeŋ sha okyku obmi ba adlidzi ba Oshpaodzadzi he lo.

²⁸ E kpo eyli moafpu gimi ku-ku mbo. Ohe lo angyiŋ ó ba o tsa ba moa angyiŋ á ba a tsu á gbu nga ba agimi angyiŋ é ba e ri, okyku eshi Ahogbrẽ angyiŋ a wo la a shri okpogre a shri a da gimi!

²⁹ E ka, moa a hwile gimi ozhẽ okyku o kpo otum okyku Ekristi, ohi lo o wo okro obmi ba adlidzi ka la ŋa sha mbo, o wo okro ba okpoewu okyku Ekristi bubgu.

³⁰ Ohuhuhi, agimi e kpo e gbu ba agimi e ta eko lo pa la me otsotse, edgu eko ba agimi e ka ba ame e la e ta ayga angyiŋ. Edgu he lo angyiŋ ame e la e ta ma-me e bli ohuhuhi, eka ba agimi e la e gno oshpa lo.