Eyohana 7 - Ohwihwim Olehe

Eyesu ta la moanáŋ

¹ Ambla he nga Eyesu a dzi obiŋ ba Egalili. A klo o dzi obiŋ ba Eyahuda mbo okyku eshi moaEyahuda a la a klo o bga ŋa.

² Omba moaEyahuda á ba a kpo abgo ba Oylalgo o wo osusku a mo.

³ Moanáŋ Eyesu a nyuŋ Eyesu a lu mi le, Aŋo o yi obiŋ ba Eyahuda okyku o da moanwyeotum boŋ a ka edgu otum boŋ o kpo.

⁴ Are la a klo o gbu eshko le, a ghre ayakplo baŋ a la a kpo mbo. O raŋ o gre boŋ o da moare mvye a yi edgu ayakplo boŋ o la o kpo!

⁵ Moanáŋ a mbo, moa a bmi ba adlidzi ka la ŋa mbo.

⁶ Eyesu a tno mo ma a lu mi le, Omba ba ame é ba e yi o kpo a wo mbo, ambo ombamba mvye agimi e wo la omba ma.

⁷ Moarehwi ba obiŋ hi a bmi ka la gimi, ambo moa a tla me okyku ba ame e la e lu odlo pa la mo eshri ayakplobi moa a la a kpo.

⁸ Agimi e yi egimi oriabgo. Ame é yi oriabgo lo a wo mbo, okyku eshi omba ba ame é yi o kpo a wo mbo.

⁹ A lu eka he a khwo nga a dzu eŋa obiŋ ba Egalili.

Eyesu okro Oriabgo ba Oylalgo

¹⁰ Ambla ba moanáŋ a gre oriabgo lo nga, Eyesu a mbo a gre. A gre la eyayi mbo, a gre shu.

¹¹ MoaEyahuda a la a klo Eyesu okro oriabgo lo. Moa a zhĩ a lu mi le, Eyesu a wo ayaŋ?

¹² Moare nzenze eshki a la a lu ahibĩ odlo eshri Eyesu. Moakyeŋ a lu mi le, Aŋa a wo la odlodzi a gre eshri. Moakyeŋ a lu mi le, Aŋa a wo la odlodzi ma mbo, a la a bile moare sha angyiŋ.

¹³ Ambo arekyeŋ a lu odlo eka he eyayi moare mbo, okyku eshi moa a kpo eyli moaEyahuda.

¹⁴ Moa a wo agʼbaha ba oriabgo angyiŋ a mo omba ba Eyesu a gre Anyuŋ-akulu nga a yi a zga esi o nye moare.

¹⁵ MoaEyahuda a ka egbregbre a gre eshri, nga moa a lu mi le, Alom he a kpo anyu a yi engla nzenze eka he, ambo a gre engla ondakyeŋ a ka mbo!

¹⁶ Eyesu a tno mo ma a lu mi le, Ekplo ba ame e la e nye hi, ame e fa e ba eshri me angyiŋ mbo, ambo e zgi okro Ahogbrẽ la a hom me otum angyiŋ e ba.

¹⁷ Areyaŋ a mbo la a bmi nga a la a kpo ekplo ba Ahogbrẽ a klo, á kpo á gbu baŋ á ka á bmye ba onyenye me he o wo o ba Ahogbrẽ angyiŋ le, o wo o ba ekʼpo eshri me angyiŋ.

¹⁸ Are la a lu odlo ekyku eshri baŋ, a klo o gbu eshko angyiŋ. Are la a klo o da are la a hom ŋa otum angyiŋ a gbu eshko, are he lo a la a kpo adlidzi, nga a la a kpo ekplokyeŋ bli-bli mbo.

¹⁹ Omusa a shri odaŋ a da gimi mbo? Ambo arekyeŋ eshki bimi a kpaŋ odaŋ lo mbo. Okyku eshi agimi e klo e bga me?

²⁰ Eshki e tno ŋa ma e lu mi le, Ogbgabi o la o kpo otum ka la ŋo tli! Ayi angyiŋ a klo o bga ŋo?

²¹ Eyesu a tno mo ma a lu mi le, Ame e kpo anyuŋ akplo egbregbre akyekyeŋ nga agimi e ka egbregbre.

²² Okyku ba Omusa a jygu gimi odaŋ ma agimi e sheŋ moanwye bimi ongyum. Omusa angyiŋ a zga esi lo mbo, moadigimi angyiŋ a zga esĩ lo. Agimi e la e sheŋ moanwye ongyum onda Asabat.

²³ O wo ba moa a la a sheŋ moanwye ongyum onda Asabat okyku o bli odaŋ ba Omusa le, okyku eshi agimi e klo odlo pa la me okyku ba ame e shaŋ are ololo onda Asabat?

²⁴ Agimi e da ayakplo moare a la a kpo angyiŋ a dzu ozhẽ bimi e sheŋ ombgu mbo, ambo e da adlidzi angyiŋ a dzu ozhẽ bimi e sheŋ ombgu.

Aŋa angyiŋ a wo Emisiya?

²⁵ Moarekyeŋ osku Orushalima a zhĩ a lu mi le, Alom hi angyiŋ moa a klo o bga ŋa mbo?

²⁶ Agimi e ka! Aŋa a la a kpla egba pa la moare la eyayi, ambo arekyeŋ a lu ekplo-kyeŋ eshri baŋ mbo! O dzu mbo, moandakʼpo a mbo a yi zhezheŋ baŋ a wo Emisiya e mbo?

²⁷ Ambo omba ba Emisiya á ba a ba, arekyeŋ á yi okro baŋ á zgi lo á ba mbo. Agi mvye nga e yi okro ba alom he lo a zgi lo a ba.

²⁸ Omba ba Eyesu a la a nye moare Anyuŋ-akulu, a ta enzi angyeŋ a zhĩ a lu mi le, Agimi e yi me zhezheŋ a mi? Nga, agimi e yi okro ba ame e zgi lo e ba a mi? Ambo ame e ba eshrishri eme angyiŋ mbo. Are la a hom me otum a da me e ba a wo adlidzi angyiŋ, nga agimi e yi ŋa mbo.

²⁹ Ambo ame e yi ŋa. Ame e zgi okro baŋ angyiŋ e ba, nga aŋa angyiŋ a hom me otum.

³⁰ Omba he lo, moare a klo ozhẽ okyku o vu ŋa, ambo arekyeŋ a shri obgo a vu ŋa mbo, okyku eshi omba baŋ o kpo a wo mbo.

³¹ Moare nzenze eshki he lo, moa a bmi ba adlidzi ka la ŋa nga moa a lu mi le, O wo ba Emisiya a yi a ba le, á kpo ayakplo egbregbre á gre alom he lo?

Moa la a kʼpu a ba okyku o vu Eyesu

³² MoaEfarisi a gno ba eshki e lu ahihĩ odlo eshri baŋ nga, moa pa la moandakʼpo olu ba Ahogbrẽ moa a hom moa la a kpʼu otum okyku o da mo a vu Eyesu.

³³ Eyesu a ka eka he nga a nyuŋ mo a lu mi le, Ame é ta abyi fi ka la gimi ayga, ambla he nga ame é bla é yi okro ba are la a hom me otum.

³⁴ Agimi é klo me ambo agimi é hwiŋ me mbo, okyku eshi okro ba ame é ba e yi lo, agimi e kpo e gbu ba agimi e yi lo mbo.

³⁵ MoaEyahuda a la a zhĩ emo a lu mi le, Aŋa á yi ayaŋ angyiŋ ba agi é ba e hwiŋ ŋa mbo? Aŋa á yi esku ba moaEgrise, pa la moaEyahuda a wo ma nga á dzu ma á nye moaEgrise?

³⁶ Aŋa a lu mi le, Agimi é klo me ambo agimi é hwiŋ me mbo. Nga agimi é kpo é gbu ba agimi é yi okro ba ame é yi lo mbo. Ekplo baŋ a lu hi e ri eshi angyiŋ?

Ehwlo ami ba eso

³⁷ Olum ba okpyemgbyeŋ ba oriabgo he lo o wo anyua-nyuŋ o gre mvye. Onda mi lo Eyesu a kso angyeŋ nga a lu odlo la enzi angyangyeŋ a lu mi le, Areyaŋ a mbo ba oŋo o kpo ŋa o raŋ o gre baŋ a ba a wa ami okro me.

³⁸ Eka ba Odlo Ahogbrẽ o lu mi le, Areyaŋ a mbo I a bmi ba adlidzi pa la me, ehwlo ami ba eso é zgi eso baŋ.

³⁹ Eyesu a lu odlo he lo eshri Ogbgaodzi ba moa la a bmi ba adlidzi ka la ŋa á ba a hwiŋ. Omba mi lo, moare a hwiŋ Ogbgaodzi a wo mbo, okyku eshi moa a kso Eyesu a gre okro ayimom ba esesla baŋ Ongyeŋ a wo mbo.

Moare a gʼba emo aha

⁴⁰ Moare nzenze eshki lo a gno ba Eyesu a lu eka he. Moa a lu mi le, Alom he lo angyiŋ a wo Arehwi ba Ahogbrẽ a hom ŋa otum a daŋ a ba!

⁴¹ Moakyeŋ a lu mi le, Aŋa angyiŋ a wo Emisiya. Moakyeŋ a lu mi le, Emisiya lo á zgi Egalili angyiŋ á ba a ba mbo!

⁴² Odlo Ahogbrẽ o lu mi le, Emisiya á ba ogu ba Adawuda angyiŋ. Nga moa á mbre ŋa osku ba Ebetalami osku ba Adawuda a dzu ma.

⁴³ Odlo he lo o da moare a gʼba emo aha okyku Eyesu.

⁴⁴ Moakyeŋ a klo o vu ŋa, ambo arekyeŋ a shri obgo a vu ŋa mbo.

Moandakʼpo ba moaEyahuda a bmi mbo

⁴⁵ Moa la a kʼpu a bla a gre okro moandakʼpo olu ba Ahogbrẽ, pa la moaEfarisi, nga moandakʼpo a zhĩ mo a lu mi le, Okyku eshi agimi e shri ŋa e shri e ba mbo?

⁴⁶ Moa la a kʼpu lo a tno ma a lu mi le, Adlidzi angyiŋ agi e gno arekyeŋ a kpla edgu egba ba alom he a la a kpla ondakyeŋ mbo!

⁴⁷ MoaEfarisi a zhĩ mo a lu mi le, Agimi e daŋ a zhiŋ gimi a mbo?

⁴⁸ Agimi e ka, andakʼpo bi akyeŋ, o mbo le akyeŋ eshki bi a bmi ba adlidzi ka la ŋa ondakyeŋ?

⁴⁹ Moare he lo a yi odaŋ ba Omusa mbo, okyku eka he ombgu ba Ahogbrẽ o wo eshri mo!

⁵⁰ Enikodimo a wo eshki mo lo. Aŋa angyiŋ a gre okro Eyesu ombakyeŋ. A nyuŋ mo a lu mi le,

⁵¹ Eka ba odaŋ bi o wo, agi e kpo e gbu ba agi e sõ are ombgu ayga e gno odlo baŋ mbo.

⁵² Moahwõ a zhĩ ŋa a lu mi le, Aŋo a mbo o wo arehwĩ ba Egalili lo angyiŋ? O klo aga Akpa ba Ahogbrẽ adzadzi, ó ka okrokyeŋ ba moa a lu ma arehwĩ ba Ahogbrẽ a hom ŋa otum á zgi Egalili mbo ku-ku.