Eyohana 5 - Ohwihwim Olehe

Moare a la a shaŋ okro atam

¹ Ambla he nga moaEyahuda a kpo abgo mo. Eyesu a gre Orushalima okyku o ri abgo lo.

² Anyuŋ ayizhẽ-akyeŋ a wo ma Orushalima. Moa a bzi lo Ayizhẽ ba Ékylu. Atam a wo osusku ta la Ayizhẽ ba Ékylu lo. Abro atno a wo akaŋ lo. Moa a bzi atam lo la olom moaEyahuda ma Ebetesda.

³ Moare nzenze la a no olo a ba a lom abro lo. Eshki mo, moa la a vga ayi pa la moa la a buŋ adga, pa la moa la a mom egʼba moa a wo ma. [Moa a dzu a gno omba ba ami a ba a kpo esku.

⁴ Ombayaŋ a mbo anwyeadga ba Ahogbrẽ a gre ami lo a kpo lo esku. Are la a no edgu oloyaŋ a mbo, o wo baŋ a gre ma a gre ori bgu le á shaŋ.]

⁵ Alomakyeŋ a ba atam he lo. A kpo eyi ekʼpoetra la afote baŋ a no olo.

⁶ Eyesu a ka ŋa a lom akaŋ atam lo. A yi ba alom lo a kpo eyi oshushku baŋ a no olo. Okyku eka he nga Eyesu a zhĩ ŋa a lu mi le, Aŋo o klo o shaŋ?

⁷ A tno ma a lu mi le, Andakʼpo, ame e wo arekyeŋ ma baŋ a shri me a ghwo ami omba ba moa a kpo ami esku mbo. Omba ba ame e klo o gre ma, moahwõ a la a gre me ori.

⁸ Eyesu a nyuŋ ŋa a lu mi le, O kso, o sko akpakpa boŋ nga o dzi.

⁹ Eyesu a lu eka he a khwo nga alom lo a sko akpakpa baŋ nga a dzi. Ohe lo o kpo onda Asabat angyiŋ.

¹⁰ MoaEyahuda a nyuŋ alom he lo a lu mi le, Olum anye o wo ba Asabat, aŋo o pre odaŋ bi okyku boŋ o shri akpakpa boŋ anye he.

¹¹ A tno mo ma a lu mi le, Are la a shaŋ me angyiŋ a da me ekʼpo a da me e sko akpakpa me olum anye he.

¹² Moa a zhĩ ŋa a lu mi le, Ayi angyiŋ a wo edgu are la a doŋ ekʼpo a doŋ o sko akpakpa boŋ nga o la o dzi?

¹³ Ambo alom he lo a yi are lo mbo. Okyku eshi Eyesu a sheŋ a zhiŋ ogbu bgu, nga eshki e gre eshri okro he lo.

¹⁴ Ambla he nga Eyesu a ka alom lo Anyuŋ-akulu nga a nyuŋ ŋa a lu mi le, O ka, aŋo o shaŋ ohuhuhi bgu. Ambo aŋo o kyu odlobi boŋ o kpo abgo, okyku o da ekplokyeŋ la e gre ehi e hwiŋ ŋo mbo.

¹⁵ Ambla he nga alom lo a zhiŋ ogbu a gre a yi a lu a da moaEyahuda ba Eyesu angyiŋ a shaŋ ŋa.

¹⁶ Okyku eka he nga, moaEyahuda a zga esi ba o kpo Eyesu ewu okyku eshi aŋa a shaŋ alom he lo onda Asabat.

¹⁷ Eyesu nga a nyuŋ mo a lu mi le, Adugu a kpo otum ma-me o ta anye, okyku eka he o dzu omgbybi ba ame a mbo e kpo otum.

¹⁸ Okyku odlo ba Eyesu a lu, moaEyahuda a zga eso ba o bga ŋa. Okyku eshi Eyesu a pre odaŋ ba Asabat nga a lu mi ma Ahogbrẽ angyiŋ a wo Adaŋ. O dzu eka baŋ a sko eshri baŋ a zga okyekyeŋ angyiŋ ta la Ahogbrẽ.

Ekʼpo ba Amvye

¹⁹ Eyesu a tno mo ma a lu mi le, Ame e lu adlidzi e da gimi, Anwye a kpo ekplokyeŋ la eshrishri eŋa mbo, o wo le ekplo baŋ a ka ba Adaŋ a la a kpo.

²⁰ Ada a klo anwye okyku eka he a tsa ŋa ekployaŋ a mbo baŋ a la a kpo. Á tsa ŋa anyuŋ ayakplo la a gre ahi a mbo, nga agimi é ka egbregbre.

²¹ Eka ba Ada a da moa la a kpu a sa a hwiŋ eso, ekakahelo Anwye a mbo a la a shri eso a shri a da moarehwi baŋ a klo.

²² Ada a sõ arekyeŋ ombgu mbo, okyku eshi aŋa a sheŋ a shri ekʼpo a da Anwye okyku o daŋ a sõ ombgu.

²³ Okyku eka he moare mvye moa á hlu Anwye lo eshko eka ba moa a la a hlu Ada eshko. Areyaŋ a mbo la a hlu Anwye eshko mbo le, o dzu eka baŋ a tla o hlu Ahogbrẽ la a hom ŋa otum eshko.

²⁴ Ame e lu adlidzi angyiŋ e da gimi, areyaŋ a mbo la a yga odlo me nga a bmi ba adlidzi ta la are la a hom me otum le, a wo la eso ma gbagbu-amo. Moa á sõ ŋa omgbu nga mbo. O dzu eka baŋ a gro eku nga a hwiŋ eso.

²⁵ Ame e lu adlidzi e da gimi, omba o yi ó ba, o sheŋ o ba bgu, ba moa la a sheŋ a kpu á ba a gno enzi ba Anwye Ahogbrẽ. Moa la a gno lo nga moa á hwiŋ eso.

²⁶ Eka ba Ada angyiŋ a wo esi ba eso, ekakahelo angyiŋ, aŋa a da Anwye a dzu esi ba eso.

²⁷ Aŋa a sheŋ a shri ekʼpo a da Anwye lo okyku o daŋ a sõ moare ombgu, okyku eshi aŋa angyiŋ a wo Anwye Arehwi.

²⁸ Agimi e da lo o dzu ekplo egbregbre ku-ku mbo. Omba o yi ó ba ba areyaŋ a mbo la a wo ongybi á ba a gno enzi baŋ,

²⁹ nga moa á zgi á sku engybi. Moare la a kpo odlodzi moa á kso á hwiŋ eso, ambo moa la a kpo odlobi moa á kso moa á sõ mo ombgu.

Ozgiegŋe okyku Eyesu

³⁰ Eyesu a lu mi le, Ame e kpo ekplokyeŋ eshrishri eme e gbu mbo. Ame e la e sõ moare ombgu eka ba Ahogbrẽ a tsa me angyiŋ, okyku eka he ombgu me o wo adlidzi. Ame e zga gble okyku o kpo ekplo ba ame e klo angyiŋ mbo, ambo ekplo ba are la a hom me otum angyiŋ ame e la e kpo.

³¹ O wo ame e zgi egŋe okyku eshri me angyiŋ le, odlo ame e lu hi moa á ka lo la adlidzi mbo.

³² Ambo arekyeŋ a wo ma, aŋa angyiŋ a la a zgi egŋe okyku me, ame e yi egŋe baŋ a zgi eshri me e wo adlidzi angyiŋ.

³³ Agimi e hom moanwyeadga bimi otum okro Eyohana, nga aŋa a lu odlo okyku adlidzi.

³⁴ O dzu omgbybi angyiŋ ba arehwĩ-akyeŋ a zgi egŋe me ayga mbo. Ame e lu eka he okyku o da gimi e hwiŋ oshla angyiŋ.

³⁵ Eyohana a wo eka emgbuovo, a la a ri nga a la a shri ayimom a di. Agimi a mbo e bmi ba agimi e gno oraŋ ayimom lo okyku omba ple.

³⁶ Ame e wo egŋe eshri me, egŋe lo e gre e ba Eyohana a zgi okyku me a mbo nganga. Etum ba ame e la e kpo, etum ba Adugu a shri a da me okyku o da me e kpo, e la e zgi egŋe okyku me, nga e tsa ba Ada angyiŋ a hom me otum.

³⁷ Ada la a hom me otum nga a ia a lu odlo eshri me. Agimi e gno enzi baŋ ondakyeŋ e ka mbo, nga agimi e ka ŋa ondakyeŋ e ka mbo.

³⁸ Okyku eka he odlo baŋ o wo ka la gimi mbo, okyku bimi e bmi ta la are baŋ a hom ŋa otum okro bimi mbo.

³⁹ Agimi e klo aga Akpa ba Ahogbrẽ okyku eshi agimi e la e ka eka bimi é ba e hwiŋ eso ba gbagbu okyku lo. Akpa ba Ahogbrẽ lo a mbo a lu odlo eshri me!

⁴⁰ Ambo ekakahelo a mbo, agimi e bmi e ba okro me mbo nga okyku o da gimi e hwiŋ eso mbo.

⁴¹ Ame e klo ohlueshko moarehwi a la a hlu angyiŋ mbo.

⁴² Ambo ame e yi gimi zhezheŋ, ame e yi ba agimi e wo la oklo ma okyku Ahogbrẽ eso bimi mbo.

⁴³ Ame e ba la ekʼpo ba Adugu angyiŋ ambo agimi e yga me mbo. Ambo o wo ba arekyeŋ a ba la ekʼpo baŋ angyiŋ le, agimi é yga ŋa.

⁴⁴ Agimi e la e klo e hlu egimi eshko, ambo agimi e klo baŋ akyakyeŋ la a wo Ahogbrẽ angyiŋ a tsom gimi mbo. Agimi é kpo anyu é ba e bmi ba adlidzi?

⁴⁵ Ambo agimi e ka eka ba ame e yi e shraŋ gimi egi ayi ba Adugu mbo, Omusa angyiŋ á ba a yi á tsi oshpa ayakplo á ygi ŋa. Agimi e ka ayi ozhẽ okyku Omusa he lo angyiŋ.

⁴⁶ Agimi e bmi ba adlidzi ta la Omusa angyiŋ e mbi, agimi e bmi ba adlidzi pa la me, okyku eshi a ta oshpa eshri me.

⁴⁷ Agimi e bmi ba adlidzi ta la ekplo ba Omusa a ta mbo, okyku eka he agimi é kpo anyu é ba e bmi ba adlidzi ta la odlo me.