Eyohana 15 - Ohwihwim Olehe

Eyesu a wo Esi Awandzi ba adlidzi

¹ Eyesu a lu mi le, Ame angyiŋ e wo Esi Awandzi ba adlidzi nga Adugu a wo areagbi lo.

² Aŋa a la a kplu ombguyaŋ a mbo la o wo o me o wo ba alo o fu agbro mbo, nga a la a hli ombguyaŋ a mbo la o la o fu agbro, okyku o da lo o fu agbro o ta ma-ma.

³ Agimi e sheŋ e wo shasha bgu okyku odlo ba ame e sheŋ e lu lo e da gimi.

⁴ E dzu eso me le, ame a mbo é dzu eso bimi. O wo bimi e dzu eso me mbo le, agimi é kpo é gbu bimi é fu agbro mbo. Okyku eshi ombgu awandzi o kpo o gbu ba alo o fu agbro mbo o wo le alo o dzu ésĩ andzi lo dne.

⁵ Ame angyiŋ e wo Esi Awandzi, nga agimi angyiŋ e wo embgu. Areyaŋ a mbo la a dzu eso me le, ame a mbo e dzu eso baŋ, á fu agbro nzenze. Adlidzi angyiŋ, agimi e kpo e gbu bimi e kpo ekplokyeŋ mbo o wo le ame e wo ka la gimi ayga dne.

⁶ Areyaŋ a mbo la a dzu eso me mbo le, moa a se ŋa a ta a bi eka moa a kplu ombgu aki, nga ó mom o khwo nga le moa a la a pla lo á shki nga moa á ta lo ovo.

⁷ O wo bimi é dzu eso me le, odlo me a mbo ó dzu eso bimi nga, ekployaŋ a mbo ba agimi é vẽ, agimi é hwiŋ lo.

⁸ Moa a la a hlu Adugu eshko ozhẽ agbro ba agimi e la e fu nzenze. Ozhẽ he lo sha angyiŋ agimi é dzu moanwyeotum me.

⁹ Ame e klo gimi eka ba Ada a klo me. Agimi e dzu oklo me.

¹⁰ O wo ba agimi e bmi ta la odlo me le, agimi é dzu oklo me, eka ba ame e bmi ta la odlo ba Ahogbrẽ, nga ba ame e dzu oklo baŋ.

¹¹ Ame e lu ohe lo e da gimi okyku o da gimi e hwiŋ ovye ba ame e shri e di, okyku o da gimi e hwiŋ lo nzenze.

¹² Ame e shĩ gimi, agimi e klo egimi eka ba ame e klo gimi.

¹³ Are a wo la oklokyeŋ la o gre oklo baŋ a bmi nga a kpu okyku moa-kyeŋazba mbo.

¹⁴ O wo ba agimi e kpo ekplo ba ame e klo le, agimi e wo moakyemeazba.

¹⁵ Ame é bzi gimi awaghrẽ nga mbo, okyku eshi awaghrẽ a yi ekplo ba adaŋ-odne a kpo mbo. Ambo ame e bzi gimi moakyemeazba okyku eshi ame e sheŋ e lu ekployaŋ a mbo ba ame e gno okro Adugu e da gimi.

¹⁶ Agimi angyiŋ e sla me mbo, ame angyiŋ e sla gimi. Ame e hom gimi otum okyku o da gimi e yi e fu agbro nzenze. Agbro edgu he lo, á tpi ayi mbo. Ada á shri ekployaŋ a mbo bimi e vẽ eshko me á shri á da gimi.

¹⁷ Ame e shĩ gimi, agimi e klo egimi.

Efpu moarehwi ba obiŋ hi

¹⁸ O wo ba obiŋ hi o tla gimi, agimi e tne aga e ka, o sheŋ o tla me bgu.

¹⁹ O wo bimi e wo moarehwi ba obiŋ hi le, obiŋ hi ó klo gimi eka ba alo o klo moarehwi ba obiŋ hi. Ambo ame e sla gimi esla angyiŋ nga agimi e wo moarehwi ba obiŋ hi angyiŋ mbo. Okyku eka he lo angyiŋ, obiŋ hi o la o tla gimi.

²⁰ Agimi e tne e ka, eka ba ame e lu ka la gimi ba awaghrẽ a wo anyuanyuŋ a gre adaŋ-odne mbo. O wo ba moa a kpo me ewu le, moa á kpo gimi a mbo ewu. O wo ba moa a bmi ta la odlo me le, moa á bmi ta la odlo bimi a mbo ko-ko.

²¹ Moa á kpo edgu he lo ka la gimi, okyku ba agimi e wo moarehwi me angyiŋ, okyku eshi moa a yi are la a hom me otum mbo.

²² Ame e ba e lu odlo e ygi mo mbo e mbi, ombgu odlobikyeŋ ó wo eshri mo mbo. Ambo ohuhuhi, moa a wo la elomekyeŋ ma okyku odlobi mo mbo ku-ku.

²³ Areyaŋ a mbo la a tla me, a tla Adugu.

²⁴ Ame e kpo otum ba egbregbre ba moahwõ a kpo mbo egi ayi mo mbo e mbi, ombgu odlobikyeŋ o dzu eshri mo mbo. Ambo, moa a ka ayakplo ba ame e kpo, ambo moa a tla me ta la Adugu.

²⁵ Ohe lo o kpo okyku o bli ekplo ba odlo odaŋ mo o lu mi le, Moa a tla me okyku ekplokyeŋ angyiŋ mbo.

²⁶ Are Okpoghwo á ba, aŋa angyiŋ a wo Ogbgaodzi ba adlidzi la o zgi okro Ada. Ame é da lo o zgi okro ba Ada ó ba, alo angyiŋ ó zgi egŋe me.

²⁷ Agimi a mbo é zgi egŋe me, okyku eshi a zga okũ oriori agimi e la e wo pa la me.