Eyohana 14 - Ohwihwim Olehe

Eyesu angyiŋ a wo Ozhẽ la o yi okro ba Ada

¹ Eyesu a nyuŋ mo a lu le, Agimi e da eso e ngʼba gimi mbo, agimi e bmi ba adlidzi ta la Ahogbrẽ, nga e sa e bmi ba adlidzi pa la me.

² Okro o dzu ma nzenze o wo odne Adugu. Ame é yi é nyuŋ okro e kpo okyku gimi. O wo ba alo o wo eka he mbo e mbi, ame e lu eka he e da gimi mbo.

³ Ambla ba ame e gre e yi e nyuŋ okro e kpo okyku gimi bgu le, ame é sa é bla é ba nga é yga gimi, okyku o da gimi e dzu okro ba ame e wo ma.

⁴ Agimi e yi eka ba o yi okro ba ame e yi he lo.

⁵ Otoma a tno ŋa ma a lu mi le, Adigi-odne, agi e tspi okro boŋ o yi lo mbo, agi e kpo anyu e tspi ozhẽ lo?

⁶ Eyesu a tno ŋa ma a lu mi le, Ame angyiŋ e wo ozhẽ, ame angyiŋ e wo adlidzi, nga ame angyiŋ e wo eso. Arekyeŋ a sõ okrokyeŋ a yi okro Ada a gbu mbo, o wo le a sõ okro me dne.

⁷ A nyuŋ mo a lu mi le, Agimi e yi me e mbi, agimi e yi Adugu a mbo. A zga omba hi a yi nga, agimi e yi ŋa ma-me nga agimi e ka ŋa.

⁸ Efilibu a nyuŋ ŋa a lu mi le, Adigi-odne, o tsa gi Ada, agi e klo ekplokyeŋ la e gre eka he mbo.

⁹ Eyesu a tno ŋa ma a lu mi le, Aŋo Efilibu, ame e dzu ka la gimi nzenze, ambo aŋo o yi me mbo? Areyaŋ a mbo la a ka me le, a ka Ada. Okyku eshi aŋo o zhĩ ma ame e tsa gimi Ada?

¹⁰ Efilibu, aŋo o bmi ba adlidzi ba ame e wo eso Ada, nga ba Ada a wo eso me mbo? Eyesu a nyuŋ moanwyeotum a lu mi le, Odlo ba ame e lu hi, o wo o ba anyu me angyiŋ mbo. Ada la a wo eso me angyiŋ a la a kpo otum baŋ.

¹¹ Agimi e bmi ba adlidzi ba ame e wo eso Ada nga ba Ada a wo eso me. O wo bimi e bmi ba adlidzi eka he mbo le, agimi e bmi ba adlidzi pa la etum he lo.

¹² Ame e lu adlidzi e da gimi, areyaŋ a mbo la a bmi ba adlidzi pa la me, á kpo etum ba ame e kpo á gbu. Aŋa á kpo á gbu baŋ a kpo etum la e gre ehi a mbo, okyku eshi ame é yi okro Ada.

¹³ Nga ekployaŋ a mbo ba agimi e vẽ eshko me, ame é kpo gimi alo okyku o da mo a hlu Ada eshko okro Anwye.

¹⁴ Agimi e vẽ ekployaŋ a mbo eshko me le, ame é kpo lo.

Ohwihwim, ba Eyesu eshri Ogbgaodzi

¹⁵ Eyesu a lu mi le, O wo bimi e klo me le, agimi é kpaŋ odaŋ me.

¹⁶ Ame é vẽ Ada nga aŋa á shri Okpoghwokyeŋ a da gimi. Ahi lo a wo Ogbgaodzi ba adlidzi. Aŋa á dzu ka la gimi gbagbu-amo.

¹⁷ Obiŋ hi o kpo o gbu ba alo o yga ŋa mbo okyku eshi o kpo o gbu ba alo o ka ŋa mbo, o mbo le ba o yi ŋa mbo. Ambo agimi e yi ŋa okyku eshi aŋa a wo ka la gimi, nga á dzu eso bimi.

¹⁸ Ame é dzu gimi é zga ambambga mbo, ame é yi é bla e ba.

¹⁹ Ambla fi nga, obiŋ hi ó ka me nga mbo, ambo agimi é ka me. Ame e wo la eso ma, okyku eka he agimi a mbo é wo la esõ ma.

²⁰ Onda mi lo o ba bgu le, agimi é yi ba ame e wo esõ Adugu, nga agimi é yi ba agimi e wo esõ me, nga ba ame a mbo e wo esõ bimi.

²¹ Areyaŋ a mbo la a yga odaŋ me nga a la a kpaŋ lo le, are he lo a wo la a klo me. Adugu á klo are la a la a klo me. Ame a mbo é klo ŋa nga é hwile eshyẽ me é daŋ a ka.

²² Eyahuda, ahi lo angyiŋ a wo Eyahuda Eskariyoti mbo, a nyuŋ Eyesu a lu mi le, Adigi-odne, okyku eshi aŋo ó ba o hwile eshyẽ boŋ ó da gi angyiŋ e ka, okyku eshi aŋo ó hwile lo ó da obiŋ hi angyiŋ o ka mbo?

²³ Eyesu a tno ŋa ma a lu mi le, Areyaŋ a mbo la a klo me le, á kpaŋ odlo me. Adugu nga á klo ŋa. Adugu pa la me nga agi é ba okro are he lo nga é dzu ka la ŋa.

²⁴ Areyaŋ a mbo la a klo me mbo, a la a kpaŋ odlo me mbo. Oshpa bimi e gno hi, o wo oshpa ba anyu me angyiŋ mbo, ambo o zgi okro Ada la a hom me otum angyiŋ o ba.

²⁵ Ame e sheŋ e lu ohe lo e da gimi omba ba ame e wo ka la gimi.

²⁶ Okpoghwo la o wo Ogbgaodzi ba Adugu á da lo o ba eshko me, ó nye gimi ekployaŋ a mbo, nga ó da gimi e tne aga ekployaŋ a mbo ba ame e lu e da gimi.

²⁷ Ame e dzu opyapyaŋ ba eso e zga ka la gimi. Opyapyaŋ me, ame e shri e da gimi. Ame e shri lo e da gimi eka ba obiŋ hi o shri o di mbo. Okyku eka he agimi e da eso e ngʼba gimi nga e da eso e tpi gimi ayi mbo nga e kpo eyli mbo.

²⁸ Agimi e gno eka ba ame e lu ka la gimi e lu mi le, Ame é yi, ambo ame é bla é ba okro bimi. O wo bimi e klo me le, agimi é gno oraŋ angyiŋ okyku eshi ame é yi okro ba Ada, okyku eshi aŋa a wo la ekʼpo a gre me.

²⁹ Ame e lu he lo e da gimi ohuhuhi, okyku o da gimi e bmi ba adlidzi omba ba ekplo he lo e kpo.

³⁰ Ame e kpo e gbu ba ame e lu ekplokyeŋ ka la gimi ohuhuhi nga mbo, okyku eshi areŋ ba obiŋ hi a ba a mo. A wo ekʼpo eshri me mbo ku-ku.

³¹ Ambo o dzu omgbybi ba obiŋ hi o yi ba ame e la e klo Ada. Okyku eka he angyiŋ, ame e kpo ekployaŋ a mbo eka baŋ a hom me otum. Eyesu a nyuŋ mo a lu mi le, Agimi e da gi e kso e sku okro hi ohuhuhi!