Eyohana 12 - Ohwihwim Olehe

Moa a khwa Eyesu awargi Ebetanya

¹ Omba ba Oriabgo ba Apaska o ra elum efĩ, Eyesu a gre Ebetanya anwye osku ba Eliyazaru a dzu ma, a ba Eyesu a kso ŋa ongybi.

² Moa a kpo ŋa algo ahe lo. Amata angyiŋ a la a shri lo a gʼba moare. Eliyazaru nga a dzu eteblo ta la Eyesu otsotse.

³ Emeri a sko embdzu awargi ba onad la a shka efpi nga la a wo egbmo nzenze, nga a zhiŋ lo a ygi adga ba Eyesu, nga a vu amasẽ eshri baŋ a khwa lo. Efpi lo e ngla e bli odne lo pyeŋ.

⁴ Akyeŋ eshki moanwyeotum ba Eyesu eshko baŋ e ri Eyahuda Eskariyoti, aŋa angyiŋ á ba a yla Eyesu. A lu mi le,

⁵ Okyku eshi moa a shri awargi he lo a gbmo eka Enaira ekʼpoefĩ nga a shri amgbaŋ lo a gʼba moaekŋe mbo?

⁶ A lu eka he okyku baŋ a klo moae-kŋe angyiŋ mbo, ambo okyku baŋ a wo asi angyiŋ. Aŋa angyiŋ a shri abre amgbaŋ a la a zga. A la a fa ekplo moa a shri a zga ma.

⁷ Ambo Eyesu a tno ŋa ma a lu mi le, O kyu ŋa abgo! Aŋo o daŋ a shri ekplo baŋ a wo la alo ma, a shri a zga okyku onda moa á ba a ngybi me.

⁸ Moaekŋe a wo ka la gimi ombamba pyeŋ, ambo ame é wo ka la gimi ombamba pyeŋ mbo.

Moa a klo adga Eliyazaru

⁹ MoaEyahuda nzenze a gno oshpa ba Eyesu a wo Ebetanya, okyku eka he moa a gre Ebetanya okyku o ka Eyesu ta la Eliyazaru, are ba Eyesu a kso ŋa ongybi.

¹⁰ Okyku eka he nga, moandakʼpo olu ba Ahogbrẽ a klo ozhẽ okyku o bga Eliyazaru a mbo.

¹¹ Okyku ekplo la e kpo he, moare nzenze a zhiŋ a dzu moandakʼpo mo a zga nga a la a bmi ba adlidzi ta la Eyesu.

Eyesu a gre Orushalima

¹² Onda oha nga, moare nzenze la a ba Oriabgo ba Apaska, moa a gno ma Eyesu a wo ozhẽ baŋ a ba Orushalima.

¹³ Okyku eka he moa a kplu anjyge elgi a gre o yi o tsa ŋa ozhẽ. Moa a ta akhi a lu mi le, E hlu Ahogbrẽ eshko! Ahogbrẽ a ta are la a ba eshko baŋ lo ma-ma! Ahogbrẽ a ta Anyuŋ-areŋ ba Esrayila lo ma-ma!

¹⁴ Eyesu a hwiŋ ashrishri nga a vre lo a dzu ma eka ba Odlo Ahogbrẽ o lu mi le,

¹⁵ Osku ba Ezayoŋ, o kpo eyli mbo! Areŋ boŋ a ba okro boŋ ohuhuhi. Aŋa a vre anwye ashrishri.

¹⁶ Ambo moanwyeotum baŋ a ka ohe lo a bmye omba he lo mbo. Ambo ambla ba Eyesu a sheŋ a vre a dzu okro ayimom ba esesla baŋ, moa a tne aga ba Odlo Ahogbrẽ o lu eka he lo, nga moa a sheŋ a kpo eka he lo okyku ŋa.

¹⁷ Moare la a wo ta la Eyesu omba baŋ a bzi Eliyazaru ongybi nga a kso ŋa, moa a lu ekplo la e kpo.

¹⁸ Okyku eka he lo angyiŋ moare nzenze a gre a yi a tsa ŋa ozhẽ. Okyku eshi moa a gno ekplo egbregbre baŋ a kpo he lo.

¹⁹ MoaEfarisi a lu ta la emo a lu mi le, Agimi e ka, agi e hwiŋ ekplo-kyeŋ ba alo ku-ku mbo! Agimi e ka, moare mvye moa a zhiŋ a lu ŋa ma!

MoaEgrise-akyeŋ moa a klo Eyesu

²⁰ MoaEgrise moa a wo eshki moare la a gre Orushalima okyku oriabgo lo.

²¹ Moa a ba okro Efilibu la a zgi Ebetseda obiŋ ba Egalili. Nga moa a lu mi le, Andakʼpo, agi e klo e ka Eyesu.

²² Efilibu a gre a yi a lu a da Andru; moaha lo nga a gre a yi a lu a da Eyesu.

²³ Eyesu a tno mo ma a lu mi le, Omba lo o kpo ba moa á ba a shri Ohlueshko á shri á da Anwye Arehwi.

²⁴ Ame e lu adlidzi e da gimi, eyi aglu-agbi e wo eyi aglu-agbi angyiŋ, o wo le moa a ta lo agbi ayga dne nga e la e kpu. Ambla ba alo e kpu angyiŋ, e la e fu eyi nzenze.

²⁵ Areyaŋ a mbo la a klo eshri baŋ angyiŋ le, eshri baŋ é yla. Areyaŋ a mbo la a tla eshri baŋ obiŋ hi, á hwiŋ eso ba gbagbu-amo.

²⁶ Areyaŋ a mbo la a klo o kpo otum me le, aŋa a lu me ma, okyku eshi ame e klo ba anwyeotum me a dzu okro ame e wo ma. Adugu á shri ekʼpo á da are la a kpo me otum.

Eyesu a lu odlo eshri eku baŋ

²⁷ Eyesu a lu mi le, O ka ohuhuhi, eso e byli me e gre eshri. Ame e lu la eshi? O wo odzi ba ame e lu mi le, Ada o da omba he lo o hwiŋ me mbo? Ambo, ame e ba okyku o kpo ewu omba he lo angyiŋ.

²⁸ Adugu, o da eshko boŋ e dzu la ekʼpo! Enzikyeŋ e zgi Ongyeŋ e ba e lu mi le, Ame e sheŋ e da lo e dzu la ekekʼpo bgu, nga ame e sa e ta lo ekʼpo ma-ma.

²⁹ Moare la a wo ahe lo, moa a gno enzi lo nga moa a lu mi le, Enzi he lo e lu odlo eka angyum-ogbu. Moakyeŋ a lu mi le, Anwyeotum Ahogbrẽ angyiŋ a lu odlo ka la ŋa.

³⁰ Ambo Eyesu a lu pa la mo a lu mi le, Enzi hi e lu odlo okyku me angyiŋ mbo, ambo okyku gimi.

³¹ Omba he angyiŋ moa á ba a sõ obiŋ hi ombgu. Omba he lo angyiŋ moa á ba a kypi areŋ ba obiŋ hi.

³² Ambla ba moa a gŋe me egŋe aki a khwo nga, ame é zhiŋ moare mvye é da mo a ba egi ayi me.

³³ Omba baŋ a lu eka he, a ta egŋe eshri edgu eku baŋ á ba a kpu angyiŋ.

³⁴ Moare a tno ma a lu mi le, Odaŋ bi o tsa gi o lu mi le, Emisiya é dzu ma gbagbu-amo. Ekayaŋ aŋo o lu mi le, O dzu omgbybi ba moa a gŋe Anwye Arehwi egŋe aki? Ayi angyiŋ a wo edgu Anwye Arehwi he lo?

³⁵ Eyesu a tno mo ma a lu mi le, Ayimom á ta abyi ka la gimi ple ayga. Agimi e nyuŋ e dzu omba ba ayimom a yi a wo ka la gimi, nga evbu é shki gimi mbo, okyku eshi are la a dzu evbu a yi okro baŋ a la a yi mbo.

³⁶ Agimi e bmi ba adlidzi ta la ayimom, okyku ba alo a yi a wo ka la a gimi, okyku o da gimi e dzu moarehwi ba ayimom. Ambla ba Eyesu a lu eka he a khwo nga, a zhiŋ eŋa ogbu nga a yi a ghre.

MoaEyahuda a bmi ba adlidzi mbo

³⁷ A kpo anyuŋ ayakplo egbregbre egi ayi mo, ambo moa a bmi ba adlidzi ka la ŋa mbo.

³⁸ Nga ekplo ba Eshaya arehwĩ Ahogbrẽ a hom otum a lu e bli. A lu mi le, Adigi-odne, ayi angyiŋ a bmi ba adlidzi ta la ekplo bi e lu? Adigi-odne a tsa ayi angyiŋ ekʼpo baŋ?

³⁹ Okyku eka he moa a kpo a gbu o bmi ba adlidzi mbo, okyku eshi Eshaya a mbo a lu mi le,

⁴⁰ O dzu eka ba Ahogbrẽ a bʼbu mo ayi, Nga a bʼbu mo eso, Okyku o da ayi mo a ka mbo, Nga okyku o da mo a zhiŋ a ba okro me Okyku o da me e shaŋ mo mbo.

⁴¹ Eshaya a lu eka he okyku baŋ a ka ayimom ba esesla ba Eyesu, nga baŋ a nyum oshpa eshri baŋ.

⁴² Ambo omba he a mbo, moandakʼpo ba Eyahuda nzenze moa a bmi ba adlidzi ta la Eyesu. Ambo okyku eyli ba moaEfarisi moa a lu akplokyeŋ eshri baŋ la eyayi mbo, okyku o da mo a se mo eshki mbo.

⁴³ Moa a klo o raŋ moarehwi angyiŋ eso, o sku Ahogbrẽ.

Odlo Eyesu o sõ ombgu

⁴⁴ Eyesu a lu odlo la enzi angyangyeŋ a lu mi le, Areyaŋ a mbo la a bmi ba adlidzi pa la a me le, á bmi ba adlidzi pa la me sha angyiŋ mbo, ambo ta la are la a hom me otum bubgu.

⁴⁵ Areyaŋ a mbo la a ka me, a ka are la a hom me otum.

⁴⁶ Ame e ba obiŋ hi eka ba ayimom angyiŋ, okyku o da areyaŋ a mbo la a bmi ba adlidzi pa la me a dzu evbu nga mbo.

⁴⁷ Areyaŋ a mbo la a gno oshpa me nga a bmi ba adlidzi ta la lo mbo, ame é sõ ŋa ombgu mbo. Ame e ba okyku o sõ obiŋ hi ombgu angyiŋ mbo, ambo okyku o shla lo.

⁴⁸ Areyaŋ a mbo la a tla me nga a bmi ba adlidzi ta la oshpa me mbo le, arekyeŋ a wo ma la á ba a sõ ŋa ombgu. Odlo ba ame e sheŋ e lu hi angyiŋ ó ba o sõ ŋa ombgu onda mi lo!

⁴⁹ O wo eka he lo angyiŋ, okyku eshi ame e lu odlo ba eshrishri eme angyiŋ mbo. Ada la a hom me otum a tsa me eka akplo ba ame é ba e lu.

⁵⁰ Ame nga e yi ba odlo baŋ lo o la o shri eso ba gbagbu-amo o di. Ayakplo ba ame e lu hi, Ada angyiŋ a da me e lu lo.