Etitu 2 - Ohwihwim Olehe

Onyenye la o wo shasha

¹ Ame e lu e doŋ, aŋo o nye moare ekplo la e wo ozhẽ ba onyenye la o wo shasha.

² O lu o da moakpoatsoŋ-alom, o da mo a nyuŋ eshri mo a zga, nga moa a wo la eda, nga moa a nyuŋ emo a zga, nga a tspi adzadzi ibu obmi ba adlidzi mo, nga a tspi osheshye la oklo ta la oghwo-esõ.

³ Nga o nyuŋ moakpoatsoŋ-ashe a mbo ekakahelo. O lu o da mo a kpo ayakplo eka moashe la a kpaŋ eshri mo adzadzi okyku Ahogbrẽ. Moa a kpo onjygu nga a dzu moawaghrẽ ba ami anab mbo. Ambo o raŋ o gre ba moa a nye ekplo la e wo edzi,

⁴ okyku o da mo a nye moashe la a yi a wo ola okyku o da mo a klo moalalom mo pa la moanwye mo.

⁵ Nga okyku o da mo a nyuŋ eshri mo a zga nga a dzu kye, okyku o da mo a dzu moashe la a kpaŋ odne adzadzi, nga okyku o da mo a tsi odlo moalalom mo a ghwo ayi, okyku o da moare a lu odlo ba ototno eshri ba oshpa ba Ahogbrẽ mbo.

⁶ Nga ekakahelo, o shĩ moa ola anwye, okyku o da mo a nyuŋ eshri mo a zga.

⁷ Aŋo eshrishri eŋo nga, o raŋ o gre boŋ angyiŋ o dzu egŋe okyku o da moahwõ a nye ayakplodzi okro boŋ. Aŋo nga o kpo adlidzi nga o zga ayi onyenye boŋ lo.

⁸ Aŋo o kpo otum la amgboŋ odu la o wo shasha, okyku o da moafpu ŋo a hwiŋ ekplokyeŋ ba ototno okyku olu-lu eshri bi mbo, nga o da mo a gbu anzi.

⁹ O raŋ o gre ba moawaghrẽ a fa olbi a da moadimo-odne, nga moa a kpo mo ekployaŋ a mbo la e raŋ mo esõ. Nga o raŋ o gre ba moa a kla akplokyeŋ pa la mo mbo.

¹⁰ Nga moa a wla abgo mbo. Ambo o raŋ o gre ba moa a tsa moadimo-odne ba moa a wo la eda edzi nga a wo la adlidzi, okyku o da moare a ka odlodzi ibu onyenye ba Ahogbrẽ Areoshla bi okro otumyaŋ a mbo ba moa a la a kpo.

¹¹ Alo o wo eka he, okyku eshi Ahogbrẽ a shri okpoghwo a shri a ba okyku o da areyaŋ a mbo a hwiŋ oshla.

¹² Okpoghwo he lo angyiŋ o tsa gi okyku o da gi e kyu ayakplo ba Ahogbrẽ a la a gno oraŋ ta la alo mbo abgo, nga alo angyiŋ o da gi e kyu ogroayi ba obiŋ hi abgo, nga e kpaŋ eshri bi adzadzi, nga e tspi kyekye. Nga okpoghwo he lo angyiŋ o da gi e dzu okyku o raŋ Ahogbrẽ sha esõ obiŋ hi.

¹³ Agi é kpo eka he lo ma-me o tsa Onda ba owlama ba agi e ka ayi ozhẽ okyku lo. Omba he lo angyiŋ areyaŋ a mbo á ba a ka ekekʼpo ba Ahogbrẽ bi la a wo ekʼpo ta la Areoshla bi Eyesu Ekristi.

¹⁴ A shri eshri baŋ a di okyku gi, okyku o shla gi abgo odlobi pyeŋ nga okyku o zhiŋ gi o zga moarehwĩ la a wo kye. Moahi lo a wo a baŋ angyiŋ, nga moa a la a gno oraŋ o kpo ayakplo la a wo adzi.

¹⁵ Aŋo o nye moare ayakplo he lo, nga o kpo otum la ekʼpo boŋ pyeŋ omba boŋ o shĩ moare nga o shrom moare. O da akyeŋ anvaŋ okyku o daŋ a dzĩ ŋo mbo.