Amatiyu 4 - Ohwihwim Olehe

Obile ba Areabi a bile Eyesu

¹ Ambla he nga, Ogbgaodzi o da Eyesu a gre akla okyku o da Areabi a mbga ŋa a ka.

² Ambla baŋ a kpo elum ekʼpoenyi, ta la okyukyku ekʼpoenyi nga, a ri algo mbo nga embyle e kpo ŋa.

³ Areabi a ba okro ba Eyesu nga a nyuŋ ŋa a lu mi le, O wo boŋ o wo Anwye Ahogbrẽ angyiŋ bgu le, o zhiŋ ézhim hi o da lo e dzu agbrotsa.

⁴ Eyesu a tno ŋa ma a lu mi le, Odlo Ahogbrẽ o lu mi le, Arehwĩ a dzu ma okyku algori sha mbo, ambo á dzu ma okyku odloyaŋ a mbo la o zgi anyu Ahogbrẽ.

⁵ Ambla he nga Areabi a sko Eyesu a shri a gre osku ba Esesla. Aŋa a shri ŋa a zga eshri Anyuŋ-akulu la a si a gre pyeŋ.

⁶ Ambla he nga, Areabi lo a nyuŋ Eyesu a lu mi le, O wo boŋ o wo Anwye Ahogbrẽ angyiŋ le, aŋo o ta egʼba obiŋ okyku eshi Odlo Ahogbrẽ o lu mi le, Ahogbrẽ á da moanwyeadga baŋ á kpaŋ ŋo Nga moa á ta ŋo á kõ la abgo mo, Okyku o da adga boŋ a yla ezhim mbo.

⁷ Eyesu a tno ŋa ma a lu mi le, Ambo Odlo Ahogbrẽ o sa o lu mi le, Alo o wo odzi boŋ o mbga Adigi-odne la a wo Ahogbrẽ boŋ mbo.

⁸ Ambla he nga Areabi, a sko ŋa a shri a gre anyuŋ akũ, nga a tsa ŋa ereŋ andandandim ba obiŋ hi mvye, la ekekʼpo mo.

⁹ Nga Areabi a nyuŋ ŋa a lu mi le, O ka, alo pyeŋ ame é shri lo é doŋ, o wo boŋ o kne o dzu obiŋ egi ayi me nga o hlu me eshko bgu le.

¹⁰ Omba he lo Eyesu a tno ŋa ma a lu mi le, Aŋo Eshitaŋ o ngʼba o sku me! Okyku eshi Odlo Ahogbrẽ o lu mi le, O hlu Adigi-odne Ahogbrẽ boŋ sha eshko, nga o lu ŋa ma!

¹¹ Okyku eka he Areabi a ngʼba a sku ŋa, moanwyeadga ba Ahogbrẽ a ba nga a kpo a ghwo a Eyesu.

Eyesu a zga esĩ otum baŋ obiŋ ba Egalili

¹² Omba ba Eyesu a gno oshpa ba moa a vu Eyohana a ta aku nga, aŋa a gre eŋa obiŋ ba Egalili.

¹³ Aŋa a dzu osku ba Anazarata mbo, ambo a gre a yi a dzu Akafanahum, osku lo o wo osusku ta la atam ba Egalili, ogʼba obiŋ ba Ezabulu, ta la Anaftali.

¹⁴ Ohi lo o kpo okyku o bli ekplo ba Eshaya arehwĩ ba Ahogbrẽ a hom otum a lu. Aŋa a lu mi le,

¹⁵ Obiŋ ba Ezabulu, ta la Anaftali, Evom ba anyuŋ-ondzu ongre olum-ore ba Ordu, Aŋo Egalili, obiŋ moa la a wo moaEyahuda mbo!

¹⁶ Moarehwĩ la a dzu evbu, Moa á ka ayimom agagre! Eshri moa la a dzu obiŋ evbu ba eku, Ayimom á tra!

¹⁷ A zga omba he lo angyiŋ, Eyesu a zga esĩ ba o nyum oshpa baŋ. Aŋa a la a nyum oshpa a lu mi le, Agimi e ngʼba e sku odlobi bimi, okyku eshi, Oreŋ Ongyeŋ o wo osusku a mo!

Eyesu a bzi moanyi la a kpo atsa

¹⁸ Omba ba Eyesu a dzi akaŋ atam ba Egalili nga, aŋa a ka moanáŋ aha la a la a vu atsa. Moa a ri Esima la a sa a ri Ebitru, ta la anáŋ Andru. Moa a la a vu atsa atam la ekyeŋ.

¹⁹ Eyesu a nyuŋ mo a lu mi le, Agimi e lu me ma, okyku o da me e nye gimi okyku o da gimi e vu moarehwĩ.

²⁰ Ebuebu, moa a ndbi ekyeŋ a ygi, nga moa a gba a lu ŋa ma.

²¹ Aŋa a la a bre a yi nga, a sa a ka moanáŋ aha-akyeŋ. Moa a ri Eyakubu, ta la Eyohana. Moa a wo moanwye Azabadi. Moa a wo amgblami ta la adimo, moa a la a nyuŋ ekyeŋ mo a kpo. Eyesu nga a bzi mo.

²² Ebuebu, moa a dzu amgblami lo, ta la adimo a zga nga, moa a lu Eyesu ma.

Eyesu a nye moarehwĩ, a nyum oshpa, nga a shaŋ moare

²³ Eyesu a dzi obiŋ da Egalili pyeŋ nga, a la a nye moare anwyeakulu. Nga a nyum Oshpaodzadzi ba Oreŋ lo, nga a shaŋ moare la a wo edgu elolo andandandim.

²⁴ Oshpa baŋ lo o ngla obiŋ ba Esiriya pyeŋ. Okyku eka he, moa a shri moare la a no elolo andandandim, pa la moare la a kpo edgu ewu andandandim, moa ba egbgabi e kpo otum pa la mo, moa la a gbu andom, pa la moa la a shla egʼba, Eyesu a shaŋ mo edgu ahe lo mvye.

²⁵ Moare nzenze nga a la a lu ŋa ma. Moa a zgi Egalili, ta la Esku Ekʼpo, ta la Orushalima, ta la Eyahuda, ta la obiŋ la o wo ongre ba Ordu.