Amatiyu 3 - Ohwihwim Olehe

Oshpa ba Eyohana la a kpo abaptisma a nyum

¹ Omba mi lo, Eyohana la a kpo moare abaptisma aŋa a ba a nyum oshpa akla ba obiŋ Eyahuda.

² Aŋa a nyum oshpa a lu mi le, Agimi e nyiŋ odzudzu bimi, okyku eshi Oreŋ ba Ongyeŋ o wo osusku a mo!

³ Eyohana angyiŋ a wo arehwĩ ba Eshaya arehwĩ ba Ahogbrẽ a hom otum a lu odlo eshri baŋ a lu mi le, Arekyeŋ a la a su osu akla a lu mi le, E nyuŋ ozhẽ ba Adigi-odne e kpo okyku ŋa. E kpo ozhẽ la o wo tsoŋ okyku o daŋ a dzi ma.

⁴ Moa a ngʼgo aknye ba Eyohana la amasẽ ebyi moa a bzi lo ma arakumi. Aŋa a la a ta ashye akpa osĩ baŋ. Nga a la a taŋ amgbatso, nga a ri ekapsu.

⁵ Moare a zgi Orushalima, ta la obiŋ ba Eyahuda, ta la akekaŋ ba ondzu ba Ordu a ba ibu baŋ.

⁶ Moare a zgi egŋe odlobi mo nga aŋa a kpo mo abaptisma ondzu ba Ordu.

⁷ Omba ba Eyohana a ka moaEfarisi, pa la moaEsaduki nzenze a ba okyku o daŋ a kpo mo abaptisma nga, aŋa a nyuŋ mo a lu mi le, Agimi emabi, ayi a lu a da gimi, bimi é kpo é gbu bimi é gro ombgu ba Ahogbrẽ la ó ba?

⁸ Agimi e kpo ayakplo la á ba a tsa bimi e sheŋ e nyiŋ odzudzu bimi.

⁹ Agimi e ka eka bimi e wo la ombgukyeŋ ma mbo, okyku bimi e wo moanwye ba Ebrahim angyiŋ mbo. Ame e lu e da gimi, Ahogbrẽ a kpo a gbu baŋ a zhiŋ ézhim la e shki hi, a da mo a dzu moanwye ba Ebrahim!

¹⁰ Ogyu o wo okyku o kplu akiki emgbʼbo. Akiyaŋ a mbo la a fu agbro la a wo adzi mbo, moa á kplu lo okukũ nga, moa á shri lo á ygi ovo.

¹¹ Ame e la e kpo gimi abaptisma la amihĩ okyku o tsa ba agimi e ghwo obiŋ bgu. Ambo are la á ba a ba ambla me, aŋa á kpo gimi abaptisma la Ogbgaodzi, ta la ovo. Aŋa a wo ekʼpo a gre me, nga ame e tse ma ba ame e sko akpadga baŋ mbo.

¹² Aŋa nga a wo la ofpo ma, nga aŋa á jygu ashri lo. Aŋa á pla eyi esekʼpa lo á shri á ygi anjygu baŋ nga á shri ogbagba á ygi ovo la o ri o khwo nga mbo!

Moa a kpo Eyesu abaptisma

¹³ Omba mi lo, Eyesu a zgi Egalili a ba ondzu ba Ordu okyku o da Eyohana a kpo ŋa abaptisma.

¹⁴ Ambo Eyohana a zga ngre okyku o da Eyesu a nyiŋ aga baŋ. Eyohana a nyuŋ Eyesu a lu mi le, Ame e klo boŋ angyiŋ o kpo me abaptisma, ambo aŋo o ba okro me!

¹⁵ Ambo Eyesu a tno ŋa ma a lu mi le, Aŋo o da lo o ygi eka he ohuhuhi, okyku eshi ozhẽ he lo angyiŋ, agi é ba e kpo ekployaŋ a mbo ba Ahogbrẽ a klo. Eyohana nga a bmi.

¹⁶ Ambla ba moa a kpo Eyesu abaptisma a khwo nga, aŋa a zgi ami lo, ongyeŋ o hwile, nga aŋa a ka Ogbgaodzi ba Ahogbrẽ o gile o ba obiŋ eka ba aklungu, nga o tspi eshri baŋ.

¹⁷ Ambla he nga, enzi e zgi Ongyeŋ e ba e lu mi le, Anwye me ba esesla angyiŋ a wo ahi. Esõ me e la e gno oraŋ ka la ŋa e gre eshri.