Amatiyu 25 - Ohwihwim Olehe

Egŋe eshri moanwyeshe okʼpo

¹ Onda mi lo, Oreŋ Ongyeŋ ó dzu eka moanwyeshe okʼpo la a bli émgbuovo mo la awargi, nga a kso a gre okyku o tsa anwyealom ozhẽ.

² Moanwyeshe atno eshki mo a wo la eda ma, moanwyeshe atno ahwõ a wo la eda mbo.

³ Moanwyeshe la a wo la eda ma mbo, a sko émgbuovo mo, ambo moa a shri émgbu awargi mbo.

⁴ Ambo moanwyeshe la a wo la eda ma a shri émgbu awargi la e bli slu, ta la émgbuovo.

⁵ Anwyealom a ba shoshoŋ mbo nga omba o mbla nzenze. Okyku eka he moanwyeshe lo pyeŋ a ndze enu.

⁶ La ekpatspe okyukyku moa a gno enzi e lu mi le, E ka anwyealom lo a ba oba a mo, agimi e ba e yi e tsa ŋa ozhẽ!

⁷ Moanwyeshe okʼpo lo a kso nga a ta ovo émgbuovo mo.

⁸ Moanwyeshe la a wo la eda mbo, moa a nyuŋ moa la a wo la eda ma a lu mi le, agimi e bmi le, e kpo e ghwo la gi la awargi bimi ple, okyku eshi awargi bi a khwo nga émgbuovo bi é rum.

⁹ Moa la a wo la eda a tno ma a lu mi le, Agi e tla. A bi a mbo á tse gi, ka la gimi mbo. Okyku eka he, agimi e yi ekyku nga e gbmo ma.

¹⁰ Moanwyeshe la a wo eda mbo a gre o yi o gbmo awargi. Omba he lo angyiŋ anwyealom lo a gbu. Moanwyeshe atno la a nyuŋ a kpo a kʼpu okyku oba-ba ba anwyealom á ba, moa a gre okro o ri abgo ka la ŋa, nga moa a klu ayizhẽ.

¹¹ Ambla fi nga moanwyeshe atno ahwõ a gbu. Moa a lu mi le, Andakʼpo, o hwile gi ayizhẽ o da gi e ba.

¹² Anwyealom a tno mo ma a lu mi le, Ame e yi gimi mbo ku-ku.

¹³ Eyesu a ta egŋe lo a khwo nga, a nyuŋ moanwyeotum baŋ a lu mi le, Agimi e kʼpu okyku eshi agimi e yi onda, ta la omba mbo.

Egŋe eshri moanwye-odne atra

¹⁴ Oreŋ Ongyeŋ o dzu eka ba arekyeŋ la a yi odzi nga baŋ a bzi moanwye-odne baŋ, nga a shri otum a da mo.

¹⁵ A gʼba mo otum eka ekplo ba areyaŋ a mbo eshki mo a kpo a gbu. A shri Enaira etno a da anwye-odne ba ori okyku o daŋ a ta ekyku la alo. A shri Enaira eha a da a ba oha okyku o daŋ a ta ekyku la alo. Nga a shri Enaira ekyeŋ a da a ba otra okyku o daŋ a ta ekyku la alo. Ambla he nga a gre odzi.

¹⁶ Are la a yga Enaira etno a gre a yi a ta ekyku ta la alo nga a hwiŋ Enaira etno a ta ma.

¹⁷ Are la a yga Enaira eha, a yi a ta ekyku la alo nga a hwiŋ Enaira eha a ta ma.

¹⁸ Are la a yga Enaira ekyeŋ nga a yi a kʼpa enzhe a shri lo a ghre ma.

¹⁹ Ambla fi nga Adimo-odne a zgi odzi a ba okyku o ka ekplo ba moa a ta ekyku a hwiŋ.

²⁰ Anwye-odne la a yga amgbaŋ Enaira etno a shri Enaira okʼpo a ba a shki obiŋ nga a lu mi le, Aŋo o shri Enaira etno o shri o da me, ame e kpo e gbmo la alo nga, e hwiŋ etno e ta ma.

²¹ Adaŋ-odne a lu mi le, Ame e vye la ŋo, aŋo o wo anwye-odne adzadzi. Aŋo o tsa me adlidzi ekplo etsitsi, okyku eka he, ame é shri ekplo la é gre eka he é shri é doŋ. O ba nga o dzu o gno oraŋ pa la me otsotse.

²² Anwye-odne la a yga Enaira eha a shri Enaira enyi a shri a ba a shki obiŋ, nga a lu mi le, Aŋo a shri Enaira eha o shri o da me, ame e kpo e gbmo la alo nga e hwiŋ eha e ta ma.

²³ Adaŋ-odne lo a lu mi le, Ame e vye la ŋo, o wo anwye-odne adzadzi. Aŋo o tsa me adlidzi ekplo etsitsi, okyku eka he ame é shri ekplo la é gre eka he é shri é doŋ. O ba nga o dzu o gno oraŋ pa la me otsotse.

²⁴ Anwye-odne la a yga Enaira ekyeŋ a ba a lu mi le, Ame e yi boŋ o wo are la a wo eda edzi mbo, nga aŋo o la o yla algo okro boŋ o fu mbo.

²⁵ Ame e kpo eyli boŋ. Okyku eka he, ame e gre e yi e kʼpa enzhe nga e shri lo e ghre ma. O yga amgbaŋ boŋ.

²⁶ Adaŋ-odne lo a kpo olom ka la ŋa nga a lu mi le, Aŋo o wo ototno o gre eshri. Aŋo o yi ba ame e la e yla algo okro ba ame e fu mbo?

²⁷ E mbi aŋo o shri amgbaŋ lo o zga abanki, okyku o da me e hwiŋ otama.

²⁸ Adaŋ-odne a lu mi le, E ngʼga amgbaŋ lo nga e shri e da anwye-odne la a hwiŋ Enaira okʼpo.

²⁹ Areyaŋ a mbo la a wo emakyeŋ ma, moa á shri á ta ŋa ma. Ambo are la a wo emakyeŋ ma mbo, ofi baŋ a wo alo ma a mbo, moa á yga lo á sku ŋa abgo.

³⁰ E shri anwye-odne la a wo ototno hi, e shri ŋa e ta evbu edzi. A mi lo nga, aŋa á wu okũ nga á taŋ azhga anyu.

Ombgu moa á ba a sõ moa-obiŋ hi

³¹ Omba ba Anwye Arehwĩ á ba a ba eka Anyuŋ-areŋ, pa la moanwyeadga ba Ahogbrẽ, á dzu emgbakyiŋ ba oreŋ baŋ.

³² Moarehwĩ obiŋ hi pyeŋ nga, moa á shki á ta ŋa á kpaŋ. Nga aŋa á gʼba mo aha eka ba are la a kpaŋ a la á gʼba ékylu ta la ebme.

³³ Á shri ékylu á zga obgori baŋ, nga á shri ebme á zga obgoehre baŋ.

³⁴ Anyuŋ-areŋ nga á nyuŋ moare la a wo obgori baŋ á lu mi le, Agimi moarehwĩ owlama ba Adugu, e ba! Agimi e ba e yga oreŋ ba moa a kpo okyku gimi ombamba ba moa a zga esĩ a kpo obiŋ hi.

³⁵ Omba ba embyle e kpo me, agimi e shri algo e da me e ri. Omba ba oŋo o kpo me, agimi e shri ami e da me e wa. Nga omba ba ame e wo okro o tum ma mbo, agimi e yga me odne bimi.

³⁶ Omba ba ame e dzi oso, agimi e shri aknye e da me. Omba ba ame e no, agimi e kpo e ghwo la me. Omba ba moa a vu me a ta aku, agimi e gre e yi e kpre me e ka.

³⁷ Moa la a bmi ba adlidzi he lo á tno ŋa ma á lu mi le, Adigi-odne, ombayaŋ agi e ka ŋo o kpu embyle nga, agi e shri algo e doŋ? Ombayaŋ agi e ka ŋo o kpu oŋo agi e shri ami e doŋ o wa?

³⁸ Ombayaŋ agi e ka ŋo boŋ o wo azhẽ nga, agi e yga ŋo odne bi abgo ahaha? Ombayaŋ agi e ka ŋo ososo agi e shri aknye e doŋ?

³⁹ Ombayaŋ aŋo o no agi e gre e yi e kpo e ghwo la ŋo? Ombayaŋ agi e ka moa a vu ŋo a ta aku nga, agi e gre e yi e ka ŋo?

⁴⁰ Areŋ á tno mo ma á lu mi le, Omba bimi e la e kpo e ghwo la moanime la a wo ekplokyeŋ mbo, o dzu eka bimi e kpo e ghwo la me angyiŋ!

⁴¹ Areŋ á nyuŋ moa la a wo obgoehre baŋ a lu mi le, Agimi e kyoŋ e sku me. Ahogbrẽ a sheŋ a ta anyuabi a ygi gimi bgu. Moa á shri gimi á ygi ovo ba gbagbu-amo moa a kpo a zga Eshitaŋ, pa la moanwyeadga baŋ.

⁴² Omba ba ame e kpu embyle, agimi e shri algo e da me e ri mbo. Omba ba ame e kpu oŋo agimi e shri ami e da me e wa mbo.

⁴³ Omba ba ame e wo azhẽ okro bimi, agimi e yga me adne bimi mbo. Omba ba ame e dzi oso, agimi e shri aknye e da me mbo. Omba ba ame e no olo, agimi e kpo e ghwo la me mbo. Omba ba moa a vu me a ta aku, agimi e gre e yi e kpre me e ka mbo.

⁴⁴ Moare odlobi he lo á zhĩ Areŋ lo á lu mi le, Ombayaŋ agi e ka ŋo o kpu embyle, nga o kpu oŋo, nga o wo azhẽ, nga boŋ o dzi oso, nga boŋ o no olo, nga moa a vu ŋo a ta aku, agi e tla e kpo e ghwo la ŋo?

⁴⁵ Areŋ á tno mo ma á lu mi le, Ame e lu e da gimi, omba bimi e tla e kpo e ghwo la moa la a wo ekplokyeŋ mbo, o dzu eka bimi e tla e kpo e ghwo la me angyiŋ.

⁴⁶ Moahi lo, moa á shri mo á gre ewu la e vu olo gbagbuamo. Moa la a bmi ba adlidzi, moa á hwiŋ esõ ba gbagbuamo.