Amatiyu 24 - Ohwihwim Olehe

Eyesu a lu ba Anyuŋ-akulu á ba a kypi

¹ Eyesu a kso a sku Anyuŋ-akulu nga a la a yi eŋa a mo. Nga moanwyeotum baŋ a ba a tsa ŋa edgu ombimbdzi ba moa a mbdzi Anyuŋ-akulu.

² A tno mo ma a lu mi le, Alo o wo eka he lo angyiŋ, ame e lu e da gimi, ézhim la e fki eŋa he pyeŋ, ekyeŋ a mbo é ra e dzu ahe mbo. Moa á kypi lo pyeŋ á ygi obiŋ.

Ewu nzenze

³ Omba ba Eyesu a dzu Akũ ba Olivi nga, moanwyeotum baŋ a ba okro baŋ shu nga moa a zhĩ ŋa a lu mi le, O lu o da gi omba ba edgu ayakplo he lo pyeŋ á ba a kpo. Nga eshi angyiŋ é ba e tsa, ba omba boŋ ó ba o ba o kpo, nga ba omba lo o sheŋ o bli?

⁴ Eyesu a tno mo ma a lu mi le, Agimi e nyuŋ e ka, nga e da arekyeŋ a bile gimi mbo.

⁵ Okyku eshi moare nzenze, moa á ba eshko me, nga moa á lu mi le, Ame e wo Emisiya! Nga moa á bile moare nzenze.

⁶ Nga agimi é gno oshpa ba eko osusku, ta la ogyugyuŋ. Ambo agimi e da esõ e ngʼba gimi mbo. O dzu omgbybi ba edgu ayakplo he lo á ba a kpo, ambo a tsa ba omba lo o sheŋ o bli angyiŋ mbo.

⁷ Obiŋ ó kpo ambgu ta la obiŋ. Oreŋ ó kpo ambgu ta la oreŋ. Embyle é kpo, nga obiŋ ó zhga ara okroyaŋ a mbo.

⁸ Edgu ayakplo he lo a wo eka ba ewu ba ori ba ashe a la a kpo omba baŋ a mbre.

⁹ Moare á vu gimi á shri á da mo a kpo gimi ewu. Nga moa á bga gimi á ta okom. Moarehwĩ pyeŋ á tla gimi okyku me.

¹⁰ Omba he lo nga moare nzenze, moa á tla obmi ba adlidzi mo. Moa á njygu emo, nga moa á kpo efpu ta la emo.

¹¹ Moare nzenze la á ba a sheŋ akpro ma Ahogbrẽ angyiŋ a hom mo otum, moa á zgi, nga moa á bile moare nzenze.

¹² Odlobi ó gom ó ta ma-ma omba he lo o gre eshri nga, oklo moare nzenze ó ngʼba ó sku emo.

¹³ Ambo are la a zga gble o tsa onda amom-abgo le, aŋa á hwiŋ oshla.

¹⁴ Nga Oshpaodzadzi la o wo eshri Oreŋ Ongyeŋ moa á nyum lo obiŋ hi pyeŋ, okyku o zgi egŋe alo okyku o da moare a gno. Ambla he nga, omba lo ó bli.

Akplo ba Eyli Nzenze

¹⁵ Agimi é ka Akplo ba Eyli Nzenze, a ba Edaniyel a lu odlo eshri lo. Alo á tspi okro la o wo la esesla. Are la a tsi okro he lo a tne adzadzi a ka!

¹⁶ Omba he lo nga, moa la a wo obiŋ ba Eyahuda, moa a knye a yi a vre akukũ.

¹⁷ Are la a wo eshri aku ongyeŋ le, á gile á ba a yi odne okyku o tslo anzho baŋ mbo.

¹⁸ Are la a wo agbi le, á knye á ba a yi odne okyku o yi o sko ariga baŋ mbo.

¹⁹ Ó wo ekplo ayiekŋe nzenze omba he lo, pa la moashe la a wo onyi, pa la moashe la a shri moanwye!

²⁰ Agimi e fa olu okyku o da ohi lo o kpo omba ongʼbo, o mbo le onda Asabat mbo!

²¹ Okyku eshi ewu ba omba hi lo, é vu olo é gre edgu ewuyaŋ a mbo ba moa a kpo a ka a zga omba ba moa a kpo obiŋ hi ma-me a ta anye he. Nga moa á kpo edgu ewu he lo ondakyeŋ ku-ku nga mbo.

²² Ahogbrẽ a sheŋ a fa omba he lo a ra angyiŋ mbo e mbi, arekyeŋ á gro mbo. Ambo okyku moarehwĩ baŋ a sla, Ahogbrẽ á fa omba lo a ra.

²³ Ambla he nga, o wo ba arekyeŋ a nyuŋ gimi a lu mi le, E ka Emisiya a wo ahe! O mbo le, A wo a mi! Agimi e bmi ba adlidzi mbo.

²⁴ Okyku eshi omba he lo moaEmisiya ba akpro pa la moarehwĩ la a ba a sheŋ akpro ma Ahogbrẽ angyiŋ a hom mo otum, moa á ba. Moa á kpo anyuŋ ayakplo la á ba a tsa ta la ayakplo ba egbregbre okyku o bile moarehwĩ ba Ahogbrẽ a sla, o wo moa a kpo a gbu le.

²⁵ Agimi e ngli atuŋ e gno, ame e sheŋ e lu e da gimi bgu.

²⁶ O mbo le, o wo moare a lu ka la gimi a lu mi le, E ka, aŋa a wo akla a mi, agimi e yi mbo. O mbo le, o wo moa a lu mi le, E ka, aŋa a ghre ahe, agimi e bmi ba adlidzi mbo.

²⁷ Okyku eshi Anwye Arehwĩ á ba eka ogbu o tspi ayi o zgi egi etne o ba o bre o yi egi olum-ore.

²⁸ Okroyaŋ a mbo ba okom o lom ma le, ashrom nzenze á shki ma.

Oba-ba ba Anwye Arehwĩ

²⁹ Ambla ba ewu ba omba he lo nga, olum ó sa ó gbu evbu. Ohwa nga ó tra nga mbo ku-ku. Eyi enzo nga é gʼbu é zgi ongyeŋ é ygi obiŋ. Ayakplo egbregbre la a wo ongyeŋ nga, á gʼbu a sku ozhẽ mo.

³⁰ Nga moa á ka otsotsa ba oba-ba ba Anwye Arehwĩ ongyeŋ. Omba he lo nga, egu andandandim mvye ba obiŋ hi, moa á wu okũ, nga moa á ka Anwye Arehwĩ etabro ba ongyeŋ baŋ a gile a ba la ekʼpo, ta la esesla egagre.

³¹ Moa á hlu anyuŋ angzo, nga aŋa á da moanwyeadga a yi obiŋ hi pyeŋ, nga moa á pla moarehwĩ baŋ a sla obiŋ hi pyeŋ á shki.

Onyenye eshri esĩ ebro

³² Agimi e da esĩ ebro e nye gimi. Omba ba embgu lo e jygu ayeya lgilgilgi le, agimi e yi ba ongʼbo o wo osusku a mo.

³³ Nga omba bimi e ka ayakplo he lo pyeŋ bgu le, agimi é ka e tspi ba omba o wo osusku a mo, ba ekployaŋ a mbo é ba e zga esĩ.

³⁴ Agimi e tne aga e ka! Ayakplo he lo, á kpo pyeŋ ayga, moare la a wo ma ohuhuhi á ba a kpu.

³⁵ Ongyeŋ ta la obiŋ ó bre o yi, ambo odlo me ó bre o yi mbo ku-ku.

Arekyeŋ a yi onda ta la omba lo mbo

³⁶ Arekyeŋ a yi mbo ku-ku, onda, ta la omba, baŋ á ba a ba mbo. Moanwyeadga baŋ la a wo Ongyeŋ a mbo a yi mbo. Anwye a mbo a yi mbo. Ada sha a yi.

³⁷ Oba-ba ba Anwye Arehwĩ o wo eka ba ekplo la e kpo omba ba Onuhu.

³⁸ Eka ba ekplo la e kpo omba ba ami a ba a shki obiŋ hi a wo mbo, omba he lo moare a la a ri nga a wa, moarealom, pa la moashe, moa a la a kyu eble. Moa a la a kpo eka he lo ma-me a bli onda ba Onuhu a gre amgblami.

³⁹ Ambo ekakahelo a mbo, moa a ka a bmye eka ekplo la e kpo mbo, ma-me ami a ba a gnyu mo nga, a tslo mo pyeŋ a gre. Ekakahelo angyiŋ ó ba o kpo pa la moare omba ba Anwye Arehwĩ á ba a ba.

⁴⁰ Omba he lo, moarealom aha á lbi agbi otsotse, moanwyeadga ba Ahogbrẽ á sko akyeŋ nga á ra akyeŋ á zga.

⁴¹ Moashe aha á gbga algo otsotse, moa á sko akyeŋ nga á dzu akyeŋ á zga.

⁴² Okyku eka he agimi e kʼpu ba, okyku eshi agimi e yi onda ba Adigi-odne á ba a ba mbo.

⁴³ Agimi e ka, o wo ba are-odne a yi omba ba asi á ba a ba odne baŋ le, á kʼpu, okyku o da asi a ba a gom odne baŋ mbo.

⁴⁴ Okyku eka he, o raŋ o gre bimi e dzu e kʼpu ombamba pyeŋ, okyku eshi Anwye Arehwĩ á ba omba ba arekyeŋ a zga aga mbo ku-ku.

Anwye-odne ba adlidzi, ta la a ba ototno

⁴⁵ Ayaŋ angyiŋ a wo anwye-odne ba adlidzi ta la okaobmye? Aŋa angyiŋ a wo are ba adaŋ-odne a shri a zga ekʼpo eshri moahwõ, okyku o daŋ a shri algo a da mo omba la o raŋ o gre.

⁴⁶ Anwye-odne he lo á gno oraŋ á gre eshri, o wo ba adaŋ-odne he lo a ba odne a hwiŋ ŋa a la a kpo ekplo la e wo shasha!

⁴⁷ Adlidzi ame e lu e da gimi, Adaŋ-odne á shri anzho baŋ pyeŋ á shri á ghwo abgo ba anwye-odne he lo.

⁴⁸ Ambo o wo ba anwye-odne he lo a wo abi angyiŋ le, á nyuŋ eŋa á lu mi le, Adugu-odne á dga ma-me ayga á ba a ba.

⁴⁹ A kpo nga á yla moakyeŋ eshki moanwye-odne lo andzu, a gre nga á yi á ri, nga á wa pa la moa la a wa a kpo ayi.

⁵⁰ Ambla he nga, adaŋ-odne lo á ba omba anwye-odne lo a zga aga mbo, o mbo le omba baŋ a ka a yi mbo.

⁵¹ Adaŋ-odne lo á kplu ŋa agbu. Nga á daŋ a hwiŋ egbre baŋ pa la moa la a bile moare. A mi lo aŋa á wu okũ nga á taŋ azhga anyu.