2 MoaOkorinti 9 - Ohwihwim Olehe

Okpoghwo okyku moarehwi ba Ekristi

¹ Alo o ka o wo ekplokyeŋ ba ame e ta gimi akpa eshri okpoghwo ba moa a shri a kom moarehwi ba Ahogbrẽ la a wo Eyahuda mbo.

² Ame e yi ba agimi e klo e kpo e ghwo, okyku eka he ame e tsom gimi egi ayi moarehwi ba Amasidoniya. Ame e lu mi le, Moanáŋ la a wo obiŋ ba Egrise a sheŋ a sko eso a zga okyku o kpo o ghwo ba ayiesosõ a mo. Ekhwo bimi e wo la alo ma, e da moare nzenze eshki mo a zga ngre okyku okpoghwo.

³ Okyku eka he ame e hom moanáŋ hi otum okro bimi okyku o da otsom he lo o dzu odlo ba ototno mbo. Ambo eka ba ame e sheŋ e lu e da gimi, agimi e shri okpoghwo bimi e nyuŋ e zga ma.

⁴ O mbo le, o wo ba moarehwi ba Amasidoniya a ba otsotse pa la me nga, a hwiŋ ekplokyeŋ mbo le, agi é gbu anzi é gre eshri, okyku eshi agi e sheŋ e zga eso ba agimi é kpo é ghwo. O wo ba agimi é kpo é ghwo mbo le, agi é gbu anzi nzenze ambo anzi bimi á gre a bi nzenze nganga!

⁵ Okyku eka he angyiŋ ame e da moanáŋ he lo, a ba okro bimi e sheŋ omba ba ame é ba e ba a ta, okyku o da gimi e shri okpoghwo bimi e hwim e zga ma o tsa ba ame e ba. Ohe lo ó tsa ba agimi e la e kpo e ghwo la moahwõ okyku bimi e klo mo angyiŋ, ambo okyku ba arekyeŋ a vu gimi omgbybi angyiŋ mbo.

⁶ Agimi e tne aga e ka. Are la a fu anzho ple sha agbi baŋ le, á hwiŋ algo ple sha, ambo are la a fu anzho nzenze agbi baŋ le, á hwiŋ algo nzenze angyiŋ agbi baŋ.

⁷ Okyku eka he o raŋ o gre ba areyaŋ a mbo a fa a di eka ekplo baŋ a hwim eso baŋ. A kpo lo la ombhi mbo, nga a sko lo a zga eka ba alo a wo otum angyiŋ mbo, okyku eshi Ahogbrẽ a la a klo are la a fa a di la ovyevye.

⁸ Ahogbrẽ a kpo a gbu baŋ a shri ayakplo nzenze a shri a da gimi okyku o da gimi e gbaŋ la emakyeŋ mbo. A kpo a gbu baŋ a shri ayakplo nzenze a shri a da gimi okyku otumyaŋ a mbo la o wo odzi.

⁹ Eka ba Odlo ba Ahogbrẽ o lu mi le, Aŋa a la a shri ayakplo nzenze a shri a da moaekŋe la eso ba oklo. Okpoghwo baŋ lo ó khwo ku-ku nga mbo.

¹⁰ Ahogbrẽ nga, la a la a shri edgo a la a shri a da are la a lbi agbi, nga a la a shri algori a daŋ, á shri edgo pyeŋ bimi e klo á shri á da gimi, nga á da lo e hlu, okyku o da gimi e yla algo nzenze okyku okpoghwo bimi e kpo.

¹¹ Aŋa á da gimi é hwiŋ ekplo la e tse gimi ma ombamba pyeŋ, okyku moare nzenze a vye la Ahogbrẽ okyku okpoghwo bimi la o sõ abgo bi.

¹² Okyku eshi otum bimi e la e kpo hi, o wo okyku o da moarewhĩ ba Ahogbrẽ a hwihwiŋ sha angyiŋ mbo, ambo okyku o da moare nzenze a vye la Ahogbrẽ.

¹³ Okyku otsotsa ba otum bimi hi o shri o ba moare nzenze á vye la Ahogbrẽ okyku bimi e bmi la eso ekyekyeŋ ta la Oshpaodzadzi ba Ekristi ba agimi e zgi egŋe eshri lo. Nga moa á vye la Ahogbrẽ okyku eso ba okpoghwo ba agimi e wo la alo ma, nga okyku ba agimi e la e gʼba ekployaŋ a mbo pa la moarehwi he lo pa la moahwõ a mbo.

¹⁴ Okyku eka he, moa á fa olu okyku gimi la eso ba oklo, okyku egbregbre okpoghwo ba Ahogbrẽ a tsa gimi.

¹⁵ Agimi e da gi e vye la Ahogbrẽ okyku okpoghwo baŋ la o gre eshri!