2 MoaOkorinti 6 - Ohwihwim Olehe

¹ Agimi e sheŋ e hwiŋ okpoghwo ba Ahogbrẽ. Okyku eka he ibu otum bi ta la Ahogbrẽ, agi e la e vẽ gimi okyku o da gimi e da okpoghwo he lo o tpi ayi ototno mbo.

² Agimi e gno ekplo ba Ahogbrẽ a lu. A lu mi le, Ame nga e ngli atuŋ e gno gimi, omba la o wo pyaŋ. Ame nga e kpo e ghwo la gimi, olum onda ba oshla. Agimi e ngli atuŋ e gno! Omba he angyiŋ o wo omba ba o yga okpoghwo ba Ahogbrẽ. Anye angyiŋ a wo olum ba o yga oshla!

³ Agi e klo ba arekyeŋ a klo odlo ka la gi otum bi mbo. Okyku eka he, agi e la e klo odlo pa la moare mbo.

⁴ Ambo, agi e la e tsa bi e wo moawaghrẽ ba Ahogbrẽ ekployaŋ a mbo ba agi e la e kpo. Agi e la e ghwo eso ta la ewu ta la avuolo, la eso ekyekyeŋ.

⁵ Moa a taŋ gi andzu. Moa a vu gi a ygi aku, nga moa a klo odlo ka la gi. Moa a da gi e kpo otum la o gre gi eshri, nga agi e hwiŋ algori mbo, nga agi e ka e ndze enu mbo.

⁶ Ozhẽ ba okyekye bi ta la oyioyi, ta la oheheŋ, ta la okpoghwo, agi e tsa moare ba agi e wo moawaghrẽ ba Ahogbrẽ okro Ogbgaodzi, ta la oklo bi ba adlidzi,

⁷ ta la oshpa bi ba adlidzi, ta la ekʼpo ba Ahogbrẽ. Odlodzi angyiŋ o wo ema ba o ta eko bi. O wo okyku o da gi e ta eko nga e ra e kpaŋ eshri bi.

⁸ Moa a la a ka gi la ekekʼpo, nga moa a la a sa a ta gi anzi. Nga moa a dzĩ gi nga moa a tsom gi. Moa a la a kpo ka la gi eka bi e wo moa la a sheŋ akpro, ambo agi e la e lu adlidzi.

⁹ Agi e wo eka moa a ka a yi gi mbo ku-ku, ambo moare pyeŋ angyiŋ a yi gi. Agi e wo eka bi e kpu bgu, ambo agi e yi e wo la ayi ma. Moa a la a kpo gi ewu ambo moa a bga gi mbo.

¹⁰ Moa a tpi gi eso ayi, ambo egi e wo la ovye ma ombamba pyeŋ. Agi e wo eka bi e wo la ekŋe ototno, ambo agi e da moare nzenze a gbu angyiŋ. Alo o wo eka bi e wo la emakyeŋ ma mbo, ambo agi angyiŋ e wo la emayaŋ a mbo e ma.

¹¹ Agimi akyemeazba la e wo osku ba Okorinti! Agi e sheŋ e lu adlidzi ba ekployaŋ a mbo e da gimi. Agi nga e sheŋ e hwile eso bi pyeŋ angyiŋ a mo.

¹² Agi e ka e ghre gimi ekplokyeŋ mbo, o wo le agimi dne e hwile gi eso bimi mbo.

¹³ Ohuhuhi, ame e la e lu odlo ka la gimi eka bimi e wo moanwye me. Ame e klo ba agimi a mbo e kpo ka la gi eka bi e kpo ka la gimi nga e hwile eso bimi adzadzi.

Oshĩ eshri ayakplo ba moaevbu

¹⁴ Agimi e la e ta amase pa la moa la a bmi ba adlidzi mbo. Alo o kpo o gbu eka he mbo. Odzi ta la obi o kpo anyu o dzu otsotse o gbu? Nga ayimom ta la evbu moa a kpo anyu a dzu otsotse a gbu?

¹⁵ Ekristi ta la Areabi moa a kpo anyu a bmi ta la emo? Odzudzu ba are la a bmi ba adlidzi o kpo anyu o wo ozhẽ okyekyeŋ ta la are la a bmi ba adlidzi mbo?

¹⁶ Nga akulu ba Ahogbrẽ a kpo anyu a wo ozhẽ okyekyeŋ ta la okpko ba moaevbu? Okyku eshi agi e wo akulu ba Ahogbrẽ la a wo la eso ma angyiŋ! Eka ba Ahogbrẽ ababgo baŋ a mbo a lu mi le, Ame é kpo odne me pa la mo nga é dzu eshki mo. Ame é dzu Ahogbrẽ mo, nga moa a mbo á dzu moarehwi me.

¹⁷ Nga Adigi-odne a lu mi le, O dzu omgbybi ba agimi e dzu mo e zga, nga e ngʼba eshri bimi e sku mo. Agimi e tka ekplokyeŋ ba eshre mbo, Nga ame é yga gimi.

¹⁸ Ahogbrẽ la a wo ekʼpo pyeŋ, a lu mi le, Ame é dzu adigimi, Nga agimi é dzu moanwyealom me pa la moanwye-alashle me.