2 MoaOkorinti 4 - Ohwihwim Olehe

Owlama ba Ogbgaodzi ibu eshyẽ ba ongyim

¹ La okayiekŋe ba Ahogbrẽ angyiŋ, aŋa a shri otum he a shri a da gi. Okyku eka he, agi e da egʼba e shki gi ami mbo.

² Agi e mu eshyẽ ba anzi ekployaŋ a mbo e zga agba. Nga agi e kpo otum la obile mbo, nga agi e kŋe odlo ba Ahogbrẽ e bga ta la akpro mbo. Nga agi e dzu ayimom ba adlidzi angyiŋ egi ayi ba Ahogbrẽ, nga agi e zga gble okyku o kpo otum la aga la a wo adzadzi eso ba areyaŋ a mbo.

³ O wo ba moa a ghre oshpa ba agi e nyum hi, alo o wo pa la moa la a tpi ayi sha angyiŋ.

⁴ Moa a la a bmi ba adlidzi mbo okyku eshi ahogbrẽ abi ba obiŋ hi a sheŋ a shri oso-ayi a zga egi ayi mo. A nyom mo o ka ayimom la a la a shka ayi eshri mo. Oshpaodzadzi ba ayimom ba esesla ba Ekristi angyiŋ, o la o shri ayimom he lo o ba. Ekristi angyiŋ, a wo emle ba adlidzi ba Ahogbrẽ.

⁵ Agi e la e nyum oshpa ba eshri bi angyiŋ mbo. Ambo agi e la e nyum oshpa ba Eyesu Ekristi, aŋa angyiŋ a wo Adigi-odne. Nga agi e wo moawaghrẽ bimi sha angyiŋ okyku Eyesu.

⁶ Ahogbrẽ la a lu mi le, Ayimom lo á zgi evbu angyiŋ á ba a tra! Aŋa angyiŋ a da ayimom baŋ a tra eso bi, okyku o da gi e hwiŋ ayimom ba oyioyi ba esesla ba Ahogbrẽ la a shka ayi eyayi ba Ekristi.

⁷ Ambo agi la e wo la angyiŋ ba Ogbgaodzi he lo e wo eka eshyeshyẽ ba ongyim angyiŋ, okyku o tsa ba anyuŋ ekʼpo lo e wo e ba Ahogbrẽ angyiŋ, alo e wo e bi angyiŋ mbo.

⁸ O la o kpo gi ewu ombamba pyeŋ, ambo ekplokyeŋ é jygi gi mbo. Ombabze agi e wo la ofueha ma, ambo agi e gbaŋ la okayiozhẽ mbo.

⁹ Moafpu nzenze a wo ma, ambo agi e gbaŋ la moakyegiazba mbo. Nga ombabze, agi e la e fa egʼba, ambo agi e kpu mbo.

¹⁰ Ombayaŋ a mbo eku ba Eyesu e wo egʼba bi, okyku o da mo a ka eso baŋ ka la gi.

¹¹ Ombamba pyeŋ eso bi e wo ibu oyla ba eku okyku eshko ba Eyesu, okyku o da mo a ka eso baŋ ibu egʼba bi ba eku.

¹² O dzu eka he okyku eshi eku e la e kpo otum egʼba bi, ambo eso nga e la e kpo otum egʼba bimi.

¹³ Odlo ba Ahogbrẽ o lu mi le, Ame e lu odlo okyku eshi ame e bmi ba adlidzi. Agi nga e la e lu odlo la eso ba obmi ba adlidzi angyiŋ, okyku bi e wo la obmi ba adlidzi ma.

¹⁴ Agi nga e yi ba Ahogbrẽ la a kso Adigi-odne Eyesu Ekristi eku, á ba a sa á kso gi a mbo ta la Eyesu, nga á shri gi ka la gimi á zga egi ayi baŋ.

¹⁵ Ohe lo pyeŋ o wo okyku gimi angyiŋ. Nga eka ba okpoghwo ba Ahogbrẽ o gro o gbu abgo moare o ta ma-ma he, moa nga á fa olu á ta ma-ma okyku o vye la Ahogbrẽ, nga o hlu ŋa eshko.

Odzudzu la obmi ba adlidzi

¹⁶ Okyku okũ odlo he lo, agi e da egʼba e shki gi ami ondakyeŋ mbo ku-ku. Odzudzu bi ba egʼba o la o vrẽ, ambo ekakahelo, odzudzu bi ba eso o la o zhiŋ o dzu ohe elulum.

¹⁷ Nga ela ewu ba agi e la e kpo okyku omba fi sha hi, é shri anyuŋ owlama ba gbagbu-amo la e gre ewu nzenze angyiŋ é ba é shri é kom gi.

¹⁸ Agi e la e shri aga bi e zga anzho ba agi e ka mbo, ambo agi e shri aga bi e zga anzho ba efĩ. Ayakplo ba moa a ka lo a wo okyku omba ple sha, ambo ayakplo ba moa a ka lo mbo moa á dzu ma gbagbu-amo.