2 MoaOkorinti 2 - Ohwihwim Olehe

¹ Okyku eka he nga ame e zga eso ba ame é ba e yi nga mbo, okyku o da me e tpi gimi eso ayi mbo.

² Okyku eshi, o wo ba ame e tpi gimi eso ayi le, ayi a ra baŋ á ba a gbu me eso obiŋ? Moarehwi ba ame e tpi mo eso ayi sha a ra!

³ Okyku eka he angyiŋ ame e ta gimi akpa mi. Ame e klo o ba okro bimi mbo, okyku o da gimi e tpi me eso ayi. Agimi angyiŋ e wo moarehwi la a raŋ a gre ba agimi e gbu me eso obiŋ. Ame e yi zhezheŋ ba agimi e wo la ovye omba ba ame a mbo e wo la ovye.

⁴ Ame e ta gimi akpa la esõ-etpiayi, ta la eso la e bli ta la amanyi nzenze ayi okyku o da eso e tpi gimi ayi mbo, ambo ame e kpo lo okyku o da gimi e yi eka ba ame e klo gimi pyeŋ nzenze.

O kyu moa la a ta akpu abgo

⁵ O wo ba arekyeŋ a tpi arekyeŋ eso ayi le, a kpo me angyiŋ mbo ambo a kpo gimi, o mbo le moakyeŋ eshki bimi angyiŋ, okyku eshi ame e klo e wlu ayi angyiŋ ka la gimi mbo.

⁶ Okyku are he lo ombgu bimi e sõ ŋa anyu moarehwi nzenze eshki bimi o tse ma.

⁷ Nga ekayaŋ a mbo, agimi e sa e kyu ŋa abgo nga e shĩ ŋa, okyku o da eso e tpi ŋa ayi mbo, okyku o daŋ a sheŋ a nye ozhẽ ogbu-okyekyeŋ mbo.

⁸ Ame e vẽ gimi, agimi e daŋ a ka a bmye ba agimi e klo ŋa la adlidzidzi.

⁹ Okyku eka he ame e ta gimi akpa mi lo. Ame e klo o ka eka bimi e tspi osheshye ombambga lo. Nga ame e klo o yi agimi e la e kpaŋ onyenye me omba pyeŋ le, a gimi e la e kpaŋ lo mbo a mu!

¹⁰ Omba ba agimi e kyu are la a ta akpu egi ayi bimi abgo, ame a mbo e kyu ŋa abgo. Omba ba ame e la e kyu are la a ta akpu abgo, o wo ba ame e kpo eka he lo e sa e ka angyiŋ le, ame e kpo lo okyku gimi angyiŋ egi ayi ba Ekristi,

¹¹ okyku o da Eshitaŋ e kpo e gre gi mbo, okyku eshi agi e yi edgu eda baŋ a la a kpo ka la gi.

Esõ e ngʼba Oblus osku ba Otrosa

¹² Omba ba ame e gbu osku ba Otrosa okyku o nyum oshpaodzadzi ba Ekristi, ame e ka Adigi-odne a sheŋ a hwile ozhẽ okyku otum baŋ a mi lo.

¹³ Ambo eso e ngʼba me e gre eshri, okyku eshi ame e ka anime Etitu mbo. Okyku eka he nga, ame e shri oyiamo e shri e da moare la a wo ahe lo e khwo nga, ame e bre e gre Amasidoniya.

Okpogre okro Ekristi

¹⁴ Agi e vye la Ahogbrẽ! Okyku eshi okro ba okŋeobga bi ta la Ekristi angyiŋ, Ahogbrẽ a la a kpaŋ gi eka moa-oprusuna okyku ba Ekristi a kpo a gre. Ahogbrẽ a la a kpo otum ka la gi okyku o da gi e nyum oshpa ba Ekristi e ygi moarehwi pyeŋ, eka ba efpi edzadzi la e ngla okro pyeŋ.

¹⁵ Agi e wo eka oturare la o shka efpi edzadzi. Ekristi nga a ta lo ovo okyku Ahogbrẽ. Efpi lo e gre okro moa la a hwiŋ oshla pa la moa la a tpi ayi.

¹⁶ Okro moa la a tpi ayi efpi he lo e wo efpi ebi angyiŋ la e bga mo, nga e wo efpi edzi angyiŋ la e la e shri eso e shri e da moa la a hwiŋ oshla. Ayi angyiŋ a kpo edgu otum he a gbu?

¹⁷ Agi e wo eka moahwõ nzenze angyiŋ mbo. Moa a la a kpo otum ta la oshpa ba Ahogbrẽ eka ba ama egbmo la a wo ofa. Ambo okyku ba Ahogbrẽ angyiŋ a hom gi otum, agi e la e zgi egŋe baŋ la adlidzidzi egi ayi baŋ eka moawaghrẽ ba Ekristi.