2 MoaOkorinti 13 - Ohwihwim Olehe

Oshĩ ta la oshko ba amom-abgo

¹ Odgo otra angyiŋ ohuhuhi ba ame é ba e kpre gimi é ka. O raŋ o gre ba egŋe eha o mbo le etra e wo ma okyku odloyaŋ a mbo la o wo ma, eka ba odlo ba Ahogbrẽ o lu.

² Ame e klo e tsi moare la a kpo odlobi ayga e da gimi, ta la moahwõ pyeŋ. Ame e sheŋ e lu lo omba ba ame e ba e kpre gimi e ka odgo oha. Ambo ohuhuhi, ame é bla alo é lu, okyku eshi ame e wo ogyugyuŋ ka la gimi. Omba ba ame é bla é ba, arekyeŋ á gro oshrom lo mbo ku-ku.

³ Agimi é hwiŋ egŋe lo pyeŋ, okyku o tsa ba Ekristi angyiŋ a la a lu odlo okro me. Omba baŋ a la a lu odlo ka la gimi, aŋa a sheŋ a nye angyiŋ mbo, ambo aŋa a la a tsa ekʼpo baŋ angyiŋ egi ayi bimi.

⁴ Moa a gŋe ŋa egŋe aki nga a bga ŋa okyku osheŋonye, ambo la ekʼpo ba Ahogbrẽ angyiŋ aŋa a sa a wo la eso ma. Okŋeobga bi ka la ŋa, agi a mbo e sheŋ e nye. Ambo odzudzu bi ka la gimi, agi é dzu ka la ŋa la ekʼpo ba Ahogbrẽ.

⁵ O raŋ o gre ba agimi e mbga egimi e ka nga e sõ egimi ombgu, okyku o da gimi e yi zhezheŋ ba agimi e la e dzu la obmi ba adlidzi. Agimi e yi zhezheŋ ba Ekristi Eyesu a wo eso bimi mbo? O wo ba Eyesu a wo eso bimi mbo le, agimi e tsu e gbu ogbukyekyeŋ.

⁶ Ame e ka ayi ozhẽ ba agimi e yi bi e wo moa la a sheŋ a nye mbo.

⁷ Agi e vẽ Ahogbrẽ okyku o da gimi e ta akpukyeŋ mbo, ambo alo o wo okyku o tsa ba agi e gre gimi angyiŋ mbo, ambo okyku o da gimi e kpo ekplo la e raŋ e gre. Ambo o dzu mbo agimi e sko gi e zga eka ba moa la a sheŋ a nye angyiŋ.

⁸ Agi e kpo e gbu ba agi e kpo ekplokyeŋ la e tpi adlidzi ba Ahogbrẽ ayi mbo, o wo le ekplo la é da lo á tspi dne.

⁹ Agi e wo la ovye ma omba bi e sheŋ e nye, ambo agimi e wo oshye. Okyku eka he agi a mbo e la e fa olu okyku o da gimi e bli.

¹⁰ Okyku eka he angyiŋ, ame e ta akpa he lo la ba ame e wo ka la gimi mbo. O wo okyku o da me e kpo otum la ayiwuwlu angyiŋ, la ekʼpo ba Adigi-odne a shri a da me mbo omba ba ame é ba okro bimi. Ekʼpo he lo e wo okyku o mbdzi gimi angyiŋ, e wo okyku o kypi gimi e ygi obiŋ mbo.

¹¹ Ohuhuhi, agimi anáŋ, ondanda dne a mo! E zga ngre okyku ebdzu okyku o da gimi e dzu moarehwi la a bli. E ngli e gno odlo ba ame e lu. E bmi ta la egimi, nga e dzu pyapyaŋ ta la egimi. Nga Ahogbrẽ ba oklo ta la opyapyaŋ a mbo á dzu ka la gimi.

¹² Agimi e shko egimi la oshko ba oklo.

¹³ Moarehwi la a lu Ahogbrẽ ma pyeŋ a shko gimi.

¹⁴ Okpoghwo ba Adigi-odne Eyesu Ekristi ta la oklo ba Ahogbrẽ, ta la ekpom ba Ogbgaodzi o dzu ka la gimi pyeŋ.