2 MoaOkorinti 11 - Ohwihwim Olehe

Oblus pa la moa la a nyum oshpa ba akpro

¹ Ame e klo ba agimi e kpo oheheŋ pa la me. O wo ba ame e lu akplokyeŋ ba adro angyiŋ le, ame e vẽ gimi e kpo oheheŋ eka he lo.

² Ame e wo la oklo nzenze eso me okyku gimi, eka ba Ahogbrẽ a mbo a wo la oklo nzenze eso baŋ okyku gimi. Agimi e wo eka eyi anwyeshe ba adlidzi ba ame e kpo eshra baŋ e zga arekyeŋ la a ri Ekristi.

³ Ame e wo la eyli okyku ba aga eso bimi á zhiŋ á dzu la eshre, nga ba agimi é kyu oklo la o bli abgo. O wo o ba adlidzi angyiŋ okyku Ekristi. Ekakahelo a mi emabi e bile Ahawawu la eda ba akpro.

⁴ Agimi nga e gba e la e bmi ta la areyaŋ a mbo la a ba a nyum oshpa ba Eyesukyeŋ ondundum a la a ygi gimi. Eyesu he lo angyiŋ a wo a bi e nyum oshpa eshri baŋ mbo. Agimi nga e la e bmi ta la ogbga, ta la oshpa la o wo ondundum ta la Ogbgaodzi, ta la Oshpaodzadzi ba agimi e yga okro bi.

⁵ Ame e bmi ba ame e wo ambla e gre moa edgu moare la a nyum gimi oshpa, ba agimi e sko mo e zga la anyuanyuŋ hi mbo!

⁶ O dzu mbo, ame e wo are la a yi odlo o lu mbo, ambo ame e gbaŋ oyioyi ko mbo. Agi e sheŋ e hwile ekployaŋ a mbo pendeŋ egi ayi bimi ombayaŋ a mbo, nga agi e tsa gimi ozhẽyaŋ a mbo.

⁷ Ame e klo ohre okro bimi omba ba ame e nyum Oshpaodzadzi ba Ahogbrẽ e ygi gimi mbo. Ame e pre eso me obiŋ okyku o da gimi e dzu la ekʼpo. Ame e ta akpu angyiŋ eka he lo?

⁸ Omba ba ame e la e kpo otum ka la gimi, ame e hwiŋ ohre me okro Eklisiya ehwõ. O dzu eka ba ame e la e kpgo mo angyiŋ okyku o kpo o ghwo la gimi.

⁹ Nga omba ba ame e wo ka la gimi, ame e kpo gimi ewu okyku okpoghwokyeŋ mbo omba ba ame e gbaŋ amgbaŋ. Okyku eshi moanáŋ la a zgi Amasidoniya a ba, moa a shri ekployaŋ a mbo a shri a kom me ma. Eka ba alo o wo ayga, alo ó ba o sa ó dzu asheŋayi-asheŋayi mi. Ame é da eme é dzu olbi okro bimi mbo ku-ku!

¹⁰ Okyku adlidzi ba Ekristi eso me, ame e zga eso ba ame é ba e da ekplokyeŋ é tspi la oshpa ba ame e nyum hi okrokyeŋ obiŋ ba Egrise mbo.

¹¹ Okyku eshi ame e lu eka he? Okyku ba ame e klo gimi mbo angyiŋ? Ahogbrẽ a yi ba ame e klo gimi!

¹² Ame é gba é zga gble ta la otum ba ame e kpo ohuhuhi, okyku o da moahwõ la a nyum oshpa hi a nyom egʼba a lu ma moa a kpo otum ozhẽ okyekyeŋ angyiŋ ka la gi mbo.

¹³ Moahi lo a wo moa la a nyum oshpa ba adlidzi angyiŋ mbo. Moa a wo moa la a kpo otum ba akpro angyiŋ, nga moa a sko eshri mo a zga eka moa la a nyum oshpa ba Ekristi ba adlidzi.

¹⁴ E ka, alo o wo ekplo ba egbregbre mbo! Eshitaŋ a mbo e kpo e gbu baŋ a zhiŋ eshri baŋ a da lo e dzu eka ba anwyeadga ba ayimom!

¹⁵ O wo ekplo ba egbregbre angyiŋ mbo, o wo ba moanwyeotum ba Eshitaŋ a sko eshri mo a zga eka moanwyeotum ba adlidzi. Ambo ambla ba okpyemgbyeŋ moa á hwiŋ egbre mo.

Ewu ba Oblus okyku o nyum oshpa

¹⁶ Ame e lu e ta ma, o raŋ o gre ba arekyeŋ a ka eka ba ame e wo adro mbo. Ambo o wo ba agimi e sko me e zga eka adro le, ame e vẽ gimi okyku o da gimi e yga me eka adro, okyku o da me e hwiŋ ekplokyeŋ ple ba o nyom egʼba okyku lo.

¹⁷ Ambo ekplo ba ame e lu he, Adigi-odne a klo ba ame e lu eka he angyiŋ mbo. Onyomegʼba ba ame e la e nyom hi, ame e lu odlo eka adro angyiŋ.

¹⁸ Ambo okyku ba moare nzenze a la a nyom egʼba okyku okpo-kpo ba egʼba, ame a mbo é kpo ekakahelo.

¹⁹ Agimi a mbo e wo la eda ma nzenze. Okyku eka he nga agimi e la e kpo oheheŋ pa la moadro la ovyevye!

²⁰ Agimi e la e kpo oheheŋ ta la areyaŋ a mbo la a vu gimi omgbybi o mbo le areyaŋ a mbo la a kpgo gimi, o mbo le areyaŋ a mbo la a zhĩ gimi eda, o mbo le areyaŋ a mbo la a dzĩ gimi, o mbo le areyaŋ a mbo la a sheŋ gimi abgo agba.

²¹ Alo o wo me ekplo ba anzi angyiŋ ba ame e bmi ba eyli e nyom gi o kpo gimi ekakehelo. Ame nga e lu odlo eka ba adro angyiŋ omba ba ame e lu ma o wo ba arekyeŋ a la a shye eso a nyom egʼba okyku akplokyeŋ le, ame a mbo é shye eso nga é kpo ekakahelo.

²² Moa a wo moaEyahuda angyiŋ? Ame a mbo e wo a ba Eyahuda angyiŋ. Moa a wo moaEsrayila angyiŋ? Ame a mbo e wo a ba Esrayila angyiŋ. Moa a wo moa ba ogu ba Ebrahim angyiŋ? Ame a mbo e wo a ba ogu ba Ebrahim angyiŋ.

²³ Ame é zhĩ ozhĩ he lo eka ba adro angyiŋ. Moa a wo moawaghrẽ ba Ekristi angyiŋ? Ambo ame e wo awaghrẽ ba owlama e gre mo pyeŋ! Ame e kpo otum e gre mo. Moa a vu me a ta aku a gre mo. Moa a yla me andzu a gre mo, nga ame e gre osusku ta la eku ombamba e gre mo.

²⁴ MoaEyahuda a yla me abgo andzu ekʼpoetra la atronyi, engyi etno.

²⁵ Nga moaOroma moa a yla me andzu engyi etra. Moa a tra me ézhim odgo okyeŋ. Amgblami a dam la ame engyi etra, nga odgo okyeŋ ame e kpo awa ekʼpoeha la anyi amihĩ ba anyuŋ-ondzu.

²⁶ Engyi oshushku omba ba ame e dzi odzi, ami la a bli a ba a shri me a yi, nga ame e gre abgo moasi, pa la moanime moaEyahuda, pa la moa la a wo moaEyahuda mbo. Oyla nga o la o kso esku lo ta la akakla, ta la anyuŋ-ondzu nzenze, ta la moakyemeazba ba akpro.

²⁷ Otum ta la ewu o wo ma. Engyi oshushku ame e ndze enu mbo. Embyle ta la oŋo o bga me. Ame e hwiŋ algo mbo ta la okro odzuma mbo, ta la aknye la a tse me ma mbo engyi oshushku.

²⁸ Ame é lu ple sha. Ombamba pyeŋ ewu ba Eklisiya ehwõ pyeŋ e wo abgo me angyiŋ.

²⁹ Omba ba arekyeŋ a sheŋ a nye le, alo o kpo me a mbo ewu, eka ba ame angyiŋ e sheŋ e nye. Nga omba ba arekyeŋ a kpo odlobi le, eso e bili me e gre eshri.

³⁰ O wo ba ame é nyom egʼba a mbo, ame é nyom egʼba ta la ayakplo la a tsa ba ame e sheŋ e nye angyiŋ.

³¹ Ahogbrẽ la a wo Adaŋ Adigi-odne Eyesu, eshko baŋ nga e dzu la esesla gbagbu-amo! Aŋa a yi ba ame e sheŋ akpro mbo.

³² Omba ba ame e wo osku ba Adamasku ogomna la a wo abgo ba anyuŋ-areŋ la a ri Areta, a da moa la a kʼpu, a kʼpu anyuŋ ayizhẽ pyeŋ okyku o da mo a vu me.

³³ Ambo moa a shri me a sõ ewyle la e wo ogli lo, nga a gile me aksu a ba obiŋ. Ame nga e gro abgo baŋ.