2 MoaOkorinti 10 - Ohwihwim Olehe

Oblus a tspi okyku otum baŋ

¹ Ame Oblus, ame e shĩ gimi la aga ba eso me. Agimi e sko me e zga arehwĩ la a wo ble-ble omba ba ame e wo ka la gimi, nga ba ame e dzu ekplo ba eyli angyiŋ omba ba ame e wo ka la gimi mbo. Ame e vẽ gimi la eso ble-ble ta la okpoghwo ba Ekristi,

² agimi e da eso me e kso ka la gimi omba ba ame e ba mbo. Ame e yi zhezheŋ ba ame e kpo e gbu ba ame e da eso me e kso ta la edgu moare la a lu ma agi e kpo otum he lo la ayaŋ ba aga ba obiŋ hi angyiŋ.

³ O wo adlidzi angyiŋ ba agi e wo obiŋ hi lo, ambo agi e la e ta eko la aga ba obiŋ hi angyiŋ mbo.

⁴ Anzho eko ba agi e la e ta eko la alo eko bi he lo, a wo anzho eko ba obiŋ hi angyiŋ mbo, ambo alo a wo anzho eko ba ekʼpo ba Ahogbrẽ angyiŋ, nga la ahe lo angyiŋ moa á ba a kypi ekroyaŋ a mbo la e wo oshye. Agi é bga oklaodlo ba akpro,

⁵ nga é gʼbu ekployaŋ a mbo ba onyomegʼba la e shki ozhẽ okyku o nyom oyioyi ba Ahogbrẽ. Agi e la e sko agayaŋ a mbo e zga okyku o da lo a kpaŋ odlo ba Ekristi.

⁶ Nga ambla ba agimi e tsa obmi ba adlidzi ba adlidzi bimi, omba he lo agi é kpo é gbu ba agi e sõ ombgu eshri ekployaŋ a mbo ba obmi ba adlidzi o wo ma mbo.

⁷ Agimi e la e ka ayakplo egi edzi sha. Arekyeŋ la a sko eŋa a zga arehwĩ ba Ekristi a wo ma a mi lo? Ambo o raŋ o gre baŋ a bla a tne aga eka baŋ a wo, okyku eshi agi a mbo e wo moarehwi ba Ekristi angyiŋ eka baŋ a mbo a wo.

⁸ O wo me akplokyeŋ mbo, o wo ba ame e nyom egʼba nzenze ta la ekʼpo ba Adigi-odne a shri a da gi. Ekʼpo he lo e wo okyku o mbdzi gimi angyiŋ, alo e wo okyku o tpi gimi ayi angyiŋ mbo.

⁹ Ame e klo bimi e sko lo e zga eka ba ame e klo e ta gimi eyli la akpekpa me mbo.

¹⁰ O dzu mbo areabze a lu mi le, Akpekpa ba Oblus a ta a wo la a tpi moare eso ayi nga alo a sa a wo la odlo la oshye o gre eshri. Ambo omba baŋ tli angyiŋ a wo ka la gi le, aŋa a wo oshye akplokyeŋ mbo. Odlo baŋ nga o wo akplokyeŋ mbo ku-ku!

¹¹ O raŋ o gre ba edgu are he lo a ka a bmye ba ondundumokyeŋ o wo odlo bi e la e ta ta la omba ba gi e wo ka la gimi mbo. Ayakplo ba agi e la e kpo omba ba agi e wo ka la gimi a wo akyekyeŋ angyiŋ.

¹² Ambo adlidzi, agi e ka e gʼba egi, o mbo le e mbga egi pa la moare la a la a sko eshri mo a zga la onyuonyuŋ a gre eshri mbo. Okyku eshi moa a ka a bmye mbo eka he! Moa a sko odzudzu nzenze la o raŋ mo eso a zga, nga moa a la a ta amase pa la edgu odzudzu he lo!

¹³ Ambo okro bi onyomegʼba bi e la e nyom ó yi ogyugyuŋ ó gre eshri mbo. Alo o tspi ekplu ba otum ba Ahogbrẽ a shri a zga egi ayi bi, otum ba agi e la e kpo egi ayi bimi a mbo o wo eshki lo.

¹⁴ Agimi e wo ekplu he lo angyiŋ, okyku eka he agi e dzu mo e zga e gre egi ehwõ omba ba agi e shri Oshpaodzadzi eshri Ekristi e shri e ba okro bimi mbo.

¹⁵ Okyku eka he, agi e la e nyom egʼba ba otum moahwõ a kpo, e bmyi engla ba Ahogbrẽ a shri a zga gi mbo. Ambo agi e la e ka ayi ozhẽ ba obmi ba adlidzi bimi ó ba o ta ma, nga ba agi é kpo é gbu ba agi é ba e kpo otum la ó gre ohe eshki bimi, ambo agi e sko lo e zga engla ba Ahogbrẽ a shri a zga angyiŋ.

¹⁶ Okyku eka he agi é kpo é gbu ba agi é nyum Oshpaodzadzi ebiŋ ehwõ la e wo ogyugyuŋ ka la gimi. Agi nga é kpo é gbu ba agi e nyom egʼba okyku otum ba moa a kpo agbi ba arekyeŋ mbo.

¹⁷ Odlo ba Ahogbrẽ o lu mi le, Areyaŋ a mbo la a klo o nyom egʼba le, aŋa a nyom egʼba okyku ekplo ba Adigi-odne a sheŋ a kpo angyiŋ.

¹⁸ Okyku eshi, moare a la a gno oraŋ ta la are omba ba Adigi-odne a bmi ka la ŋa, ambo omba ba are lo angyiŋ a bmi ta la eŋa mbo.