2 MoaOkorinti 1 - Ohwihwim Olehe

¹ Akpa he lo a zgi abgo ba Oblus are la a nyum oshpa ba Ekristi Eyesu, eka ba Ahogbrẽ a sheŋ a sla. Akpa he lo a zgi abgo ba Etimoti anigi bubgu. Alo a wo okyku Eklisiya ba Ahogbrẽ osku ba Okorinti, pa la moarehwi ba Ahogbrẽ la a wo obiŋ ba Egrise.

² Ahogbrẽ Adigi ta la Adigi-odne Eyesu Ekristi a shri okpoghwo ta la opyapyaŋ ba eso a shri a da gimi.

Oblus a vye la Ahogbrẽ

³ Agimi e da gi e vye la Ahogbrẽ, aŋa angyiŋ la a wo Adaŋ Adigi-odne Eyesu Ekristi, aŋa a wo Adigi la a ka ayi ekŋe. A wo Ahogbrẽ ba edgu okpoghwoyaŋ a mbo o la o zgi okro baŋ o ba!

⁴ Aŋa a la a kpo a ghwo la gi ewu bi e la e kpo pyeŋ. Okyku eka he, agi e kpo e gbu bi e kpo e ghwo la moare la a wo edgu ewuyaŋ a mbo la edgu okpoghwo bi e yga okro ba Ahogbrẽ.

⁵ Eka bi e pu ta la Ekristi ewu nzenze baŋ a kpo, ekakahelo angyiŋ agi e la e pu ka la ŋ a okpoghwo baŋ la o gre eshri.

⁶ O wo bi e kpo ewu a mbo, alo o wo okyku ohwihwiŋ bimi, nga okyku o da gimi e hwiŋ oshla. O wo ba agi e hwiŋ owlama le, agimi a mbo é hwiŋ lo, nga agimi é hwiŋ oshye ba oghwo-esõ la oheheŋ okro ba ewu pyeŋ ba agi a mbo e kpo.

⁷ Okyku eka he ekplokyeŋ bi e fu eha eshri bimi e wo ma mbo. Okyku eka he nga eka bimi e pu ka la gi okro ba ewu lo, ekakahelo angyiŋ agi e yi ba agimi e pu ka la gi owlama ba agi e hwiŋ.

⁸ Agimi anáŋ, agi e klo e dzũ gimi okyku edgu ewu ba agi e kpo ogʼba obiŋ ba Asiya angyiŋ. Ewu ba moa a kpo gi e wo egagre nga e lbi e gre eshri. Okyku eka he agi e wo la okayiozhẽ ba o dzu ma la eso mbo.

⁹ Agi e ka eka ba moa a sõ gi ombgu ba eku angyiŋ. Ohe lo o kpo okyku o da gi e dzu la eshrishri egi mbo, ambo okyku o da gi e sko oshye bi pyeŋ e zga okro ba Ahogbrẽ la a la a kso moare eku.

¹⁰ A shla gi abgo oyla ba eku, nga á sa á shla gi. Nga agi e la e ka ayi ozhẽ baŋ angyiŋ á ba a shla gi nganga,

¹¹ okyku eshi agimi e la e kpo e ghwo la gi okro olu bimi. Okyku eka he nga olu nzenze bimi e la e fa okyku gi, moa á yga lo. Ahogbrẽ nga á shri owlama á shri á da gi, nga moare nzenze moa á si enzi mo ongyeŋ nga á vye la ŋa okyku gi.

Oblus a nyiŋ ohwihwim baŋ

¹² Agi e wo la onyomegʼba ma okyku eshi enzi ba eso bi e tsa gi zhezheŋ ba esĩ ba odzudzu bi obiŋ hi ta la ekpom bi ka la gimi, e wo ibu ba ohwilesõ ta la adlidzi ba Ahogbrẽ a shri a di angyiŋ. Nga ohe lo o wo la okaobmye ba arehwĩ angyiŋ mbo, ambo alo o wo ibu ekʼpo ba okpoghwo ba Ahogbrẽ angyiŋ.

¹³ Agi nga e ta gimi ekplo bimi e kpo e gbu ba agimi e tsi lo nga e ka e bmye sha angyiŋ. Ame e la e ka ayi ozhẽ ba agimi é ba e ka lo pyeŋ é bmye,

¹⁴ ayakplo bimi e ka lo e bmye e bli mbo ohuhuhi, nga Onda ba Adigi-odne Eyesu le, agimi é vye la gi eka bi a mbo é vye la gimi.

¹⁵ Ame e ka edgu ayakplo he lo pyeŋ e bmye zhezheŋ, okyku eka he lo angyiŋ ame e zga eso okyku o kpre gimi e ka okyku o da gimi e hwiŋ owlama engyi eha.

¹⁶ Okyku eshi, ame e zga eso ba o ba o ka gimi omba ba ame e wo ozhẽ ba o yi Amasidoniya ta la omba ba ame e bmre e yi odne, okyku o da gimi e kpo e ghwo la me omba ba ame e yi Eyahuda.

¹⁷ Omba ba ame e la e hwim ohi, o wo eka ba ame e kpo lo efĩ? Nga omba ba ame e la e hwim ayakplo ba o kpo-kpo, ame e hwim lo la aga ba okloeshri angyiŋ, la eso ba obibmi o mbo le la eso ba ototla ogbu okyekyeŋ?

¹⁸ Ahogbrẽ a wo adlidzi angyiŋ, okyku eka he ohwihwim ba ame e hwim ka la gimi o wo obibmi ta la ototla angyiŋ mbo.

¹⁹ Okyku eshi Eyesu Ekristi la a wo Anwye ba Ahogbrẽ, ba Esila ta la Etimoti ta la me, bi e nyum oshpa baŋ egi ayi bimi, Ekristi a wo are la a wo obibmi ta la ototla angyiŋ mbo. Ambo aŋa a wo obibmi ba Ahogbrẽ angyiŋ.

²⁰ Okyku eshi aŋa angyiŋ a wo obibmi ba ohwihwim pyeŋ ba Ahogbrẽ a hwim. Okyku eka he lo angyiŋ agi e lu ma Amin okyku ekekʼpo ba Ahogbrẽ ozhẽ ba Eyesu Ekristi.

²¹ Okyku eshi Ahogbrẽ ababgo baŋ angyiŋ a la a da gi ka la gimi e ka zhezheŋ ba eso bi e wo ta la Ekristi. Nga Ahogbrẽ ababgo baŋ angyiŋ a shri gi a zga agba.

²² A ta engla baŋ a sheŋ a sla gi eshri bi. Nga a shri Ogbgaodzi a ghwo eso bi, okyku o tsa ekployaŋ a mbo baŋ a wo la alo ma okyku gi.

²³ Ame e bzi Ahogbrẽ angyiŋ a dzu egŋe me. Aŋa a yi eka ba eso me e wo! Ame e tla o ba Okorinti okyku eshi ame e klo o shrom gimi lo oshrom la o gre gimi eshri mbo.

²⁴ Ambo agi e zga gble okyku o lu eka ekplo ba agimi é ba e bmi ba adlidzi ta la lo angyiŋ e da gimi mbo, okyku eshi agimi e sheŋ e tspi osheshye ta la obmi ba adlidzi bgu. Ambo agi e la e kpo otum ka la gimi okyku o da gimi e dzu la ovye.