2 Eyohana 1 - Ohwihwim Olehe

¹ Akpa he lo a zgi abgo ba Andakʼpo, A yi okro Ashe moa a sla ŋa pa la moanwye baŋ, ba ame e klo mo la adlidzi. Ame sha angyiŋ mbo, ambo moare pyeŋ la a yi adlidzi moa a klo gimi,

² Okyku eshi adlidzi a wo ka la gi, nga alo á dzu ka la gi gbagbu-amo.

³ Ahogbrẽ la a wo Ada, ta la Eyesu Ekristi Anwye baŋ, moa a shri okpoghwo ta la okayiekŋe, ta la opyapyaŋ, a shri a da gi. Ahi lo pyeŋ a dzu anzho bi ozhẽ ba adlidzi ta la oklo.

Adlidzi ta la oklo

⁴ Ame e wo la ovye ma nzenze omba ba ame e gno eka ba moanwye bimi abze a la a dzu ta la adlidzi, eka ba Ada a sheŋ a jygu gi odaŋ.

⁵ Okyku eka he ame e vẽ ŋo Ashe ba moa a sla, agimi e da gi e klo egi. Ambo ame e ta gimi odaŋ ohe angyiŋ mbo. Odaŋ he lo agi e wo la alo ma okũ oriori angyiŋ a mo.

⁶ Oklo ba ame e lu odlo eshri lo hi, alo o dzu, o raŋ o gre ba agi e dzu nga e kpaŋ odlo ba Ahogbrẽ ombamba pyeŋ. Odaŋ ba agimi e gno okũ oriori lo o lu mi ma agimi pyeŋ e dzu la oklo.

⁷ Moare nzenze la a la a bile moare, moa a ngla a bli obiŋ hi. Moa a la a lu mi ma Eyesu Ekristi a sko egʼba ba arehwĩ mbo ku-ku. Edgu arehwĩ he lo a wo are la a bile moare angyiŋ, nga a wo Afpu ba Ekristi.

⁸ Agimi e nyuŋ eshri bimi e ka okyku o da gimi e gbaŋ ekplo ba agi e kpo e gbu okyku o kpo o ghwo la gimi mbo, ambo okyku o da gimi e hwiŋ egbre bimi fkatka.

⁹ Areyaŋ a mbo la a tspi ta la onyenye ba Ekristi mbo nga a ngʼba a sku lo le, a wo la Ahogbrẽ ma mbo. Ambo areyaŋ a mbo la a tspi ta la onyenye he lo le, a wo la Ada ta la Anwye ma.

¹⁰ O wo ba arekyeŋ a ba okro bimi la edgu onyenye he lo angyiŋ mbo le, agimi e yga ŋa adne bimi mbo. Nga agimi e nyuŋ ŋa e lu mi le, Opyapyaŋ o dzu ka la ŋo, mbo.

¹¹ Okyku eshi areyaŋ a mbo la a klo ba are he lo a hwiŋ opyapyaŋ le, a dzu eka baŋ a mbo a la a kpo ayakplobi ta la are he lo otsotse.

Odlo ba amom-abgo

¹² Ame e wo la odlo ma nzenze, ambo ame é ta lo ota angyiŋ mbo, ambo ame e ka ayi ozhẽ ba ame é ba e ba é kpre gimi e ka nga é ba e lu odlo ka la gimi la eyayi, okyku o da gi e dzu la ovye la o bli.

¹³ Moanwye ba Anigimi-alashle moa a la a shko gimi.