2 Etimoti 3 - Ohwihwim Olehe

Omba ba amom-abgo

¹ Aŋo o ka, ewu é wo ma é gre eshri omba ba amom-abgo.

² Okyku eshi moare á klo eshri, nga moa á kpo ogroayi, nga moa á nyom egʼba, nga moa á sko emo á zga eka moa a yi ayakplo nzenze. Nga moa á dzĩ moare, nga moa á fa olbi á da moadimo mbo. Moa á vye la ekplokyeŋ mbo ku-ku, nga moa á sko ozhẽ ba Ahogbrẽ á zga akplokyeŋ mbo.

³ Moa á kpo á ghwo la moare ku-ku mbo, nga moa á ka moare ayie-kŋe mbo. Moa á tpi moare ashko ayi, nga moa á kpo engre nga moa á kpo efye la eda owluayi nga moa á tla ayakplo la a wo shasha.

⁴ La eda moa á ngʼga ekplo arekyeŋ la e wo e mo mbo, nga moa á nyom egʼba. Nga moa á ygi egʼba, nga moa á dzu Ahogbrẽ á zga nga moa á klo oraŋ ba obiŋ hi sha.

⁵ Moa á sko ozhẽ ba Eyesu á shki edzi sha, ambo moa á tla ekʼpo ba adlidzi ba ozhẽ he lo. Aŋo o ngʼba o sku moa edgu moarehwĩ he lo.

⁶ Moabze eshki mo, moa a la a dzi adne nga a la a zhiŋ moashe la a wo oshye esõ mbo. Okyku eshi odlobi moashe he lo o dzu olbi pa la mo, nga edgu ogroayi andandandim o kom mo o hwro.

⁷ Edgu moashe he lo moa a la a klo onyenye ombayaŋ a mbo, ambo moa a la a ka adlidzi ba odlo lo a bmye mbo ku-ku.

⁸ Eka ba Ejane ta la Ejamba a tla odlo ba Omusa, ozhezhẽ he lo moa edgu moarehwĩ he lo a la a tla adlidzi. Esõ moahi lo e la e ka ayakplo e bmye mbo nga moa a dzu osheŋonye angyiŋ ozhẽ ba obmi ba adlidzi he lo.

⁹ Ambo moa edgu moarehwĩ he lo moa á tspi nzenze mbo, okyku eshi areyaŋ a mbo á ka adro mo lo á bmye. Ekakakhelo angyiŋ e kpo ta la Ejane ta la Ejamba.

Onyenye ba amom-abgo

¹⁰ Ambo aŋo nga o sko abgo ba onyenye me ta la odzudzu me, ta la edgu ozga-esõ me obiŋ hi. Aŋo nga o sheŋ o yi obmi ba adlidzi me, ta la ota esõ akpyli me ta la oklo me ta la oghwo-esõ ba ame e wo la alo ma.

¹¹ Aŋo nga o ka eka ba ame e la e kpo avuolo nga e kpo ewu. Aŋo o yi edgu ayakplo pyeŋ la a la a kpo pa la me omba ba ame e wo osku ba Antakiya, ta la Ekoniyom, ta la Elistra. Aŋo o yi eka ba ame e kpo ekŋe e gre eshri! Ambo Ahogbrẽ a shla me abgo ewu he lo pyeŋ.

¹² Moare pyeŋ la a klo o dzu moarehwĩ ba Ahogbrẽ okŋeo-bga ta la Ekristi Eyesu, moa á kpo ewu zheŋ.

¹³ Ambo moarehwĩ ba odlobi pa la moarehwĩ la a la a bile moare, moa á tpi ayi á ta ma o ta-ta. Moa á bile moare, nga moare a mbo á sa á bile emo.

¹⁴ Ambo aŋo o kom adlidzi ba moa a nye ŋo nga boŋ o bmi ta la alo gble. Okyku eshi aŋo o sheŋ o yi moare la a nye ŋo ohe lo.

¹⁵ Nga o sheŋ o yi boŋ o yi Akpa ba Ahogbrẽ ba esesla, a zga omba boŋ o yi o wo anwye afifi. Okro obmi ba adlidzi ta la Ekristi Eyesu, Akpa ba Ahogbrẽ ba esesla he lo, a wo la ekʼpo ba ó shri okaobmye la ó shri oshla ó doŋ.

¹⁶ Okyku eshi Ahogbrẽ angyiŋ a da mo a ta ekployaŋ a mbo la e wo Akpa baŋ ba esesla. Akpa lo a wo adzi okyku o nye adlidzi, okyku oshrom, ta la o tsa are akpu baŋ, nga o nye are ozhẽ odlodzi.

¹⁷ Okyku o da are la a kpo otum okyku Ahogbrẽ, okyku o daŋ a bmye a khwo adzadzi, nga a tse ma baŋ a kpo otum la o zhiŋ o tspi adzadzi.