2 Etimoti 2 - Ohwihwim Olehe

Anwyeakyuŋ adlidzi ba Ekristi Eyesu

¹ Aŋo Etimoti anwye me, o tspi osheshye okpoghwo ba okŋeobga bi e wo la alo ma ta la Ekristi Eyesu.

² Aŋo o sko odlo boŋ o gno ba ame e nyum lo e ygi moare nzenze. Aŋo o shri lo o shri o da moarehwĩ boŋ o bmi pa la mo. Moa-rehwĩ he lo, o raŋ o gre ba moa a dzu moa la á ba a kpo á gbu moa á nye moahwõ odlo lo.

³ O bmi o kpo ewu eka anwyeakyuŋ ba adlidzi ba Ekristi Eyesu.

⁴ Anwyeakyuŋ la a wo okro ba eko a la a kpo edgu otum moahwõ a la a kpo mbo, okyku eshi aŋa a klo ba andakʼpo mo a gno oraŋ ka la ŋa.

⁵ Are la a knye oŋe a kpo a gbu baŋ a knye a ri mbo o wo le a kpaŋ odaŋ ba oŋe lo ayga dne.

⁶ Areagbi la a kpo otum ngre, o raŋ o gre baŋ angyiŋ a zga esĩ a yga ogʼba baŋ omba ba moa a yla algo lo.

⁷ O tne aga eshri ekployaŋ a mbo ba ame e la e lu e doŋ, Ahogbrẽ nga á hwile ŋo esõ á doŋ o ka ekployaŋ a mbo o bmye.

⁸ Aŋo o tne aga ba Eyesu Ekristi ba moa a kso ŋa eku. Aŋa a wo a ba ogu ba Adawuda angyiŋ, eka ba moa a ta lo akpa ba Oshpaodzadzi ba ame e la e nyum eshri lo.

⁹ Okyku ba ame e la e nyum Oshpaodzadzi he lo angyiŋ, ewu he e hwiŋ me. O ka, moa a ta me aslika eka ba ame e gre abgo. Ambo odlo ba Ahogbrẽ lo o wo aslika lo ko mbo.

¹⁰ Okyku moarehwĩ ba Ahogbrẽ a sla angyiŋ, ame e bmi nga e ghwo esõ gble, okyku o da mo a mbo a hwiŋ oshla ta la ekʼpo ba gbagbu-amo okro ba Ekristi Eyesu.

¹¹ Odlo he lo o wo adlidzi angyiŋ, alo o lu mi le, O wo bi e bmi e kpu ka la ŋa le, agi é dzu ma ka la ŋa.

¹² O wo bi e bmi e ghwo esõ le, agi é ri ekʼpo ka la ŋa otsotse. Nga o wo bi e kpo evom baŋ le, aŋa a mbo á kpo evom bi.

¹³ O wo bi e kpo adlidzi mbo le, aŋa á wo adlidzi angyiŋ. Okyku eshi aŋa a kpo a gbu baŋ a kpo esõ baŋ evom mbo.

Anwyeotum ba adlidzi

¹⁴ Aŋo o dzu moarehwĩ boŋ nga o shĩ mo osheshye egi ayi ba Ahogbrẽ okyku o da mo a kla odlo mbo. Alo o la o kpo o ghwo la moare mbo, o wo le o so mo ayi o so sha.

¹⁵ O zga gble okyku o da Ahogbrẽ a gno oraŋ ka la ŋo eka ba anwyeotum la a gbu anzi la otum baŋ mbo, ambo o kpo lo eka ba are la a nye odlo ba Ahogbrẽ la adlidzi.

¹⁶ O ngʼba o sku odlo ototno la o wo o ba Ahogbrẽ mbo ta la oklaodlo. Ohe lo o la o som moare ayi o la o sku Ahogbrẽ angyiŋ.

¹⁷ Ayakplo moa edgu he lo a la a nye a wo eka ba ero la e kpo ami nga e taŋ are azhga egʼba. Moaha la a la a nye edgu he lo moa a wo Ehemaniyu ta la Efilitu.

¹⁸ Moa a dzu ozhẽ ba adlidzi a zga nga moa a la a so obmi ba adlidzi moakyeŋ ayi, okyku eshi moa a la a nye mo ma oksongybi o sheŋ o bre o gre bgu.

¹⁹ Ambo esĩ la e wo oshye ba Ahogbrẽ a sheŋ a ta, arekyeŋ a kpo lo esku a gbu mbo ku-ku. Moa a ta odlo he lo ma a lu mi le, Ahogbrẽ a yi moare la a wo moarehwĩ baŋ. Nga moa a sa a ta a lu mi le, Areyaŋ a mbo la a lu baŋ a wo a ba Ahogbrẽ angyiŋ bgu le, o dzu omgbybi baŋ a kyu ayakplobi pyeŋ abgo.

²⁰ Nga odne ogre, angóngo ta la atku nzenze a wo ma. Moa a kpo abze la azurfa, moabze moa a kpo lo la ezanariya, moa a kpo abze la aki, moa a tra abze la ongyim. Anzho he lo, abze moa a kpo otum ta la alo omba ba oriabgo sha, abze moa a la a kpo otum ta la alo ombayaŋ a mbo.

²¹ O wo ba areyaŋ a mbo a ngʼba eshri baŋ a sku ayakplo ba eshre he lo le, moa á daŋ a kpo otum odzadzi. Okyku eshi moa a kpaŋ ŋa a zga okyku Adaŋ-odne he lo angyiŋ, okyku o daŋ a kpo otumyaŋ a mbo la o wo odzi.

²² Aŋo o ngʼba o sku okoklo ba egʼba moa ola anwye, nga aŋo o la o zga gble okyku odlodzi, ta la obmi ba adlidzi, ta la oklo, ta la opyapyaŋ. Aŋo o kpo eka he lo otsotse pa la moa la a wo la esõ pse, nga ba moa a la a bzi Adigi-odne okyku o daŋ a kpo a ghwo la mo.

²³ Ambo aŋo o ngʼba o sku oklaodlo ba ototno la o wo o ba evbueshri. Okyku eshi aŋo o yi ba alo ó shri okʼpiohwa ba ototno angyiŋ ó ba.

²⁴ O wo odzi ba anwyeotum ba Adigi-odne a kʼpi ohwa mbo ku-ku. O raŋ o gre baŋ a wo la okpoghwo ma okyku areyaŋ a mbo, nga baŋ a dzu are la a nye adzadzi la eda heheŋ.

²⁵ Nga a dzu are la a kpo ble-ble omba baŋ a nye moare la a tla ŋa. O dzu mbo, Ahogbrẽ á da mo anvaŋ okyku o ghwo obiŋ, okyku o da mo a yi adlidzi lo.

²⁶ Ambla he nga moa á sa a bla a ba eda mo, nga moa á gro amgbaŋ ba Eshitaŋ, la a vu mo nga a da mo a kpo ekplo baŋ a klo.